بارت8
جنت نايمة و فزيت على حركته وهزة السرير باوعتله كعد ساند ظهرة على السرير وفتح تلفونه يگلب بيه، حاولت ارجع انام ماكو شلت راسي دأگوم شافني وگال :ويين
..هاا هناا بالبيت
..تعاي اكعدي داحجي وياج
..رجعت كعدت بصفنه گال:گليلي انتي شلون ماتعرفين هالاشياء معقوله! اكو وحدة هسة ماتعرف سوالف الزواج ماتعرفين عروسه تبلغيني تجيبين حبوب صخام تگليلي أجلها، هسة شبقالي يمج اربع ايام بس وأولي ششفت منج بله! خل اجي بأجازتي عود وگليلي نزلت، متلومين الا نفسج، لاتظلين فاهية شغلي عقلج شويه...
هو يحجي واني بطني مغصتني عززه هذا شبيه هسة قابل شصار مايشبع،رديت عليه بضوجه..شمعرفني اني
..لاتردييين امشي ولي عني بله
..عفته و رحت گعدت بالصاله،شويه ونزل كعد يمي يهز برجله، گال باجر اعزم بيت جيرانه ام سيف تجي هي وچنتها مرت احمد وسيف واحمد ابوهم ميت، يعني كلهم تگدرين للعزيمة لو اعزمهم برا
..لاا عادي اگدر بس مسواگ..
..اي هسة اطلع اتسوگ لباجر گومي بدلي امشي وياي واشتريلج ملابس ادري ماعندج ماناسيج يلا گومي
..كمزت فرحانه وابتسم ،اي اي ثواني واكون جاهزة..
لبست الحجاب والعبايه وجواهة صايه لان ماعندي ملابس طلعه ..
طلعنه من البيت مدنگه للسيارة، اخذني للسوگ عافني بمحل نسائي جبير كلشي متوفر بيه گال اشتري التردي ملابس بيت وطلعه واني رايح اتسوك للعزيمة وارجعلج، اشتريت كم دشداشه. نوعت بالدشاديش وحدة قصيرة ووحدة مستورة ووحدة مال بيت وداخليات وملابس طلعه ،لحدما اجه شاف شمشتريه ولح عليه اخذ بعد كم ثوب ودفع الحساب وطلعنه واخذني لمحل عطورات واشياء منزليه كلشي اشتريت وجهزت نفسي وبيتي فد فرحااانه طايره واتخيل شلون يصير شكله من ارتبه، جان گدامنا محل ملابس نوم گال تعاي اشتري متت بدمي ومارضيت استحيت وهو يگلي امشيي، تحججت بالمغرب صار وتأخرنا ونرجع غير مرة يلا وافق ورجعنه للبيت محملين، جهزت العشا كباب وسلطة تعشينا، وعزلت المسواك. وكعدت ورتبت ملابسي فرحانه وهو متمدد ع السرير عين عليه وعين ع التلفون، خلصت وكعدت اجرب عطوراتي وارش بيهن بقصد خنگت الغرفه بيهن واختنگت وياها، رحت غسلت ورجعت للسرير امشي فرحانه وهالمرة متلهفة لحظنه ..باوعتله بخجل لكيت عيونه عليه صافنه مدلي ايده واخذني لحظنه
رغم جنت مرتاحه وفرحانه بس هو احسه ضايج عاصر جسمي عصر احس دينتقم مني هيج،سمعته كال
..اووف وبعدين شيخلصهن و اولي عساني ماارجع،نخبصت وخفت حطيت اصابعي على شفايفه
..اسم الله عليك، عفيه ليش تحجي هيج،
جان صافن يباوعلي نظرته خلتني اصفن بعيوني، اختلطت انفاسنا والتقط شفايفي بين شفايفه لحظات غبت عن الدنيا لحدما صار يبوسني حيل دفعته وعافني حضني يجر حسرات ونمنه،
كعدت الصبح من وكت وكعدته
..سويلي بيض وطمامه
..اني من العجله اريد اخليله جبن واخلص وهو يگلي بيض وطماطه، شسوي سويتهن سريع وكعدنه نتريگ بعدها راح اتسوك للعزيمه كل شي بطلب مني، بديت اجهز للغدة وطبخت دولمة ومقبلات وطرشي ولبن جهزته وهو شوه السمج بأيده يمشي ويتفاخر بنفسه..اليوم راح تاكلين سمج ماماكلته بحياتج
..ههههه لا واضح من الملح النسيته
باوعلي فاتح عيونه على وسعهن جان بأيده خاشوكه بيها معجون تقدم بسرعه ودهن وجهي بالمعجون واني خربانه ضحك
ادفع بيه واضحك واخيرا شفته مبتسم،
..تهي بهي عود تقلد نشوف بعدين منو الاطيب الدولمه لو السمج والله عمي زين من تالي عمري تضحك عليه وحدة بگد ايدي ميخالف عود نردها الج
..ههههههه بقه يدردم وماكو، رحت نظفت البيت ورتبته باللمسات الاخيرة ضفتله مزهريات وورود حلوة على اطراف الدرجات ودبادوبات ع الميز وتحفيات ناعمة وزعتهن بشكل مميز بالبيت وبخرته صار يجنن، رحت سبحت ولبست ثوب وردي مرسوم بيه ورد رصاصي جديد وطلعت امشط لگيته بالغرفه مشغل تلفزيون وگاعد من شافني گال طلعيلي ملابس خل اسبح، طلعتله ملابسه تراك بيتي نيلي مدري ليش ملابسه كلها لون غامق، رجعت كملت تمشيط شعري،جان طويل بيه كسرة بسيطه من اثر الظفيرة يصير باوعت ع المرايه عيوني كبار لون بني وجهي ابيض صافي وجسمي رشيق اتذكرت غزله بجمالي يمممه وجهي اشتعل نار من الخجل لمجرد مااتذكرته، لفيت شعري ولبست شالي وتعطرت ونزلت صارت الساعه 11،واحنه گاعدين بالصاله ننتظر وهو يباوعلي
..بعد ما عندج اضيگ من هذا الثوب
..سكتت مدنگه منيله الضيگ، جاوبته بخوف..زين والله موكلش ضيگ يعني خطار جاينه عيب يشوفني هيج عروس وملابسي مبهذله
سكت مامقتنع بكلامي ،شويه واندك الباب طلعلهم هو واني واكفه بالصاله اسمعهم برة السلام والضحك صوتهم وين واصل دخلت خاله ام سيف ووياهة چنتها مبتسمات اني هم ابتسمت وتقدمت ارحب بيهن من اول ماشفتهن وشفت ابتسامتهن ارتاحيتلهن فعلا البشر يبين من وجهة كعدت يمهن وهن يسألني ويعرفن عن نفسي شويه شويه انطلقت وياهن واخذت راحتي بالحجي بدون تكليف، عرفت انهم ماهدهم بنات فقط احمد وسيف، احمد متزوج وزجته دانيه وسيف ممتزوج بعد خطوبته لنور شال فكرة الزواج من باله، ابد ماجابن طاري خطوبه او شي فقط دانيه گالت انه تمنينه تصير بس هي قسمة وماصارت وسيف اعتكف بعدها عن الزواج
خاله ام سيف كعدت تسولفلي عن علاقتهم بمصطفى وتگول..هم اصدقاء من زمان ومن اجه لهنا وحده ماگدرت اعوفه احاول اساعده بأكله تنظيف شي بس هو ابد يگلي خاله ماتقصرين مامحتاج شي، ظلينه مرات نعزمه عدنه ومرات نوديله اكل
..كلج خير وبركه خاله هو هم گال واكفيلي وكفة اهل
سمعت صاحلي ورحت گال صبي الغده، رحت اصب وهن وياي ماقبلن يگعدن دانيه تسولف وتضحكني عدها ولد اثنين وبنيه صغار هادئين كلش ،كملنه ونقل غده الزلم للأستقبال كاعدين بيها واحنا بالصاله، حطيت بنت دانيه يمي اوكلها مدحن هواي بأكلي والسمج هم هههههه الحمدلله تعادلنا
خلصنه الغده وخاله راحت يمهم واني ودانيه بالمطبخ نغسل مواعين ونسولف سألتني ..بسرعه بسرعه زواجكم صارلكم كم يوم موو واحنه خربنه عليكم الجو ههههههه
بارت9
..هههه لا والله صارلنه شهر بس هو دوام ببغداد خلص شغله ورجعنه هنا، سكتت ورجعت كالت: اكلج هو غير بشغله لعد شوكت تزوجتو شو مافهمت، ترة الفضول كتلني اعذريني هههه
...ههههه لاعادي ،شوفي بما انه احنه صديقات راح احجيلج..حجيتلها الصار وياي هناك وهي تعاطفت وياي وكالت بحزن :ياا عمري الله يساعدج والحمدلله الي سخرلج مصطفى يحميج صدگي هو انسان رائع ورجال مثالي شهم وداعتج كلها تحمد بيه ماشفنه منه الا الخير، ماطولو بعدها وراحو ودعتهم وخاله ام احمد دلتني على بيتها قبل ماتطلع وكالت: شوفي هذا بصف بيتكم كلش من يروح رجلج سيري علينه بعد انتي صرتي هم مثل بنتي لاتستحين،
..اشكرج خاله، اكيد بعيني اجيكم، ودعونه وراحو، صعدت بعدها لكيته توه ينزع فانيلته ويتمدد اني هم لبست دشداشه خفيفه وتمددت يمه تعبانه سحبني لحظنه وباس كصتي وهمس:رفعتي راسي اليوم
..راسك دوم مرفوع، هذا واجبي ماسويت شي وانته هم ماقصرت عاشت ايدك، باوع بعيوني ودفن وجهة برگبتي يبوس بيها، اندمجت ببوساته لمن حسيت تجرأ بلمساته، احس برودة قويه تصيبني تخليني ارجف من يلمسني، صرت اتوسله يبتعد مايصير هيج يدري بيه عليه الشهريه ..وخررر عفيه شتسويي
باوع وخزرني ودار وجهة ونام، رجع دار وجهة الي وگال:نسينه نحجي بشي مهم بحياتنه
باوعتله اصغي اله وكال بعدما جر نفس :موضوع الاطفال حاليا نأجله لمن نستقر بحياتنه يعني اريدج تتعودين عليه وعلى اطباعي عدل بعدها شدي حيلج وترسي بيتي بأطفالنه تمام!!
سكتت ثواني صح كلامة بس كان بودي طفل يونس وحدتي بس اصلا مااكدر اناقشه، هزيت راسي ونمنه، مشه الايام عاديه وباجر لازم يرجع لدوامه جنت معتفسه كلش وطول اليوم ضايجه ومخنوگه لحد الليل نومني بحظنه وكل شويه يباوع بوجهي، لحدما گال:كافي عاد شبيج مبوزة من الصبح ولهسة هي هاي حالة يعني باجر اولي وبالي راح يظل يمج وانتي منا مبوزة وفوگ كل هذا اوووف اريدج ماتحمل بعد، كمت مفزوعه من يمه،
..لااا عفيه اصبر بس الليله مااكدر يعني شسوي
كعد يتأفأف
..يابه شبيه ماافهم شنو بس تعالي بحظني
حاوطني من خصري وقربني اله ضم وجهة بركبتي يتنفس بقوة ،احس گلبي حيوكف من گد ميدگ بقوة حسيت بشفايفه تمشي بمهل على رگبتي ونزلت لمكان النبض يبوس بيه لحظات و تعكر مزاجه وصار ينافخ وانتقم مني بعظاته الي ملت جسمي، جنت مااحجي بس اتوجع واكعد اتوسله يلا يعوفني، نمنه بعد ليله طويله ،كعدت الفجر من حسيت بيه يكوم، هو باوعلي وكال ارجعي نامي رايح اني، كمت مخنوگه كلشش همستله اسويلك اكل، كال: لا مااريد بالطريق اكل، بدل واخذ جنطته وطلع وكف بباب الصاله واني وراه گوة لازمة دموعي باوعلي مرة اخيرة واني انفجرت ابجي وركضت لحظنه ابجي واشهگ وهو يحاول يهديني
..اشش كافي لاتعذبيني هيج، اتحملي كلها ايام وارجع ان شاء الله والتلفون موجود كل يوم اخابرج، صبري عليه وتحملي فدوة اروحلج لاتعذبين گلبي گوة طالع ترة،حاولت ابين هدوئي كدامه وابتعدت وودعته ،رجعت لفراشي ودفنت وجهي بالمخدة ابجي مو گادرة اتحمل بعده اتعودت عليه واختنكت من وحده البيت من هسة شلون بيه، ظليت ابجي لمن صارت ب6 وغفيت ...گعدت ب9 على دگة المبايل شفت رقمه وكمزت فتحت خط واجاني صوته ..الووو
هو كال الو واني انهديت ابجي اشتاقيتله صرت مااكدر ابعد عنه، وخوفي من وحدتي زيد همي اتمنيت عندي اهل اروحلهم بوقت غيابه يبعدون وحشته عني فعلا بديت احس بالوحدة والكآبه، جان يحجي ويهديني واني ابجي
..ايوته، شكلنه احنه مو گلنه نتحمل راويني سباعيتج ولاتبجين كافي واصبري لخاطري، جر نفس وهمس البعد يزيد الاشتياق احلا شي ارجع والگاج مليانه شوگ الي، هااا راح تشتاقيلي؟
همست من بين دموعي ..امممم من هسة
..اوووف يابه يلا اني اروح وصلت للمركز اخابرج من افرغ، مع السلامه ديربالج على نفسج
..مع السلامه، سديته منه بعدما هديت شويه، بعدني نعسانه رجعت نمت وكعدت على اذان الظهر صليت وتغديت وگابلت التلفون وماكو اتصال، كل مكان اباوع اله اتذكر كعدته بيه كل شي اسويه اتذكره بيه ادركت بوكتها حجم حبي اله، حنانه ودلاله صعب اعصاب وگوة يتحاجه بس متت بكل شي بيه، بعدها بديت اتعود صرت اخلص وقتي تلفزيون لو اروح لبيت ام سيف ابقه يم دانيه وخاله ام سيف كلش محبوبات واتعودت عليهن ودانيه كل عصريه تجي يمي لان هم تضوج ،اتعودت بالليل يتصل عليه نبقه نحجي ويسأل عن يومي بالتفصيل ويقضي باقي الوقت بغزله، توني تمددت بفراشي ودگ التلفون باوعت اله مبتسمة نصيت التلفزيون ورديت عليه ..الووو
..هلا عمري شلونج
..زينه، غمضت عيوني خجلانه من كلمة عمري، مااعرف شوكت اتعود على الكلام الحلو
..شو سكتنه؟
..هممم موجودة، انت شلونك اشو بالنهار اتصل عليك هواي مترد؟ جر نفس وگال
..زين يابه الحمدلله، ايي والله موفارغ كلش قضايا عدنه ودوريات دنطلع تفتيش على عدة مناطق ببغداد بالنهار فما الحك ارد عليج
..الله يساعدك تعتبت؟
..تعبت بس متعود لاتخافين
..هممم
..شنو اليوم راح تخلصينها عليه بس هممم، مشتاااااق
..رديت بابتسامه خجوله، واني هم، شوكت تجي؟
..فد خمس ايام ان شاء الله وارجع، اييي مارديتي عليه مشتااااق؟
ضحكت بخجل وگتله ..ايي واني هم مو گتلك
..شنو انتي هم؟
..همست بصوت ناااصي خجلانه، مشتاقتلك
رد عليه بهمس وتأثير الذوبان واضح بصوته..شكد مشتاقتلي؟
..بكد ماانت مشتاقلي
..اويلييي ارجع واراويج شكد مشتااق لأطلع ايام الراحن عليه وماتهنيت بيهن من عيونج
..هممم ليش اني اكدر ابعدك؟
..لا مو على كيفج تبعديني! اوووف دارجع وارتوي ، يابه يابياضج وترافتج
..احس صخنت من كلامه همست بدلع كااافي ترا اسد التلفون
..شحدج
..نعست
..اي يابه اشردي ولايهمج اجي واعرف شلون اردج، يلا روحي نامي مع السلامه گلبي،
..بيباي، سديته فرحانه وكلامه تعلگ بذهني مشتاقه لشوفته هوااي، بعدها غلبني النعاس ونمت.....
بارت10
مشت الايام بأشتياقي اله اعدهن كم يوم ويجي بيوم العصر كاعدة اني ودانيه نسوالف وفتحت وياها موضوع ببالي
..اكلج ببالي فد شي اريد اسوي بس مااعرف شلون ووين ووحدي!
..كولي شكو بشنو اساعدج
..اا تعرفين، رجلي قرب يرجع وهذي اول اجازة اله بعد زواجنه اكيد راح يكون تعبان ومتمني يلگه الراحه ببيته لذلك اني حابه اتهيأله واستقبله بتغيير يريح نفسه يعني صالون ولبس بس ممااعرف!
...هههاي سهله اذا عندج فلوس گومي خابري رجلج كوليله طالعه للسوگ ويا دانيه وخاله محتاجه كم غرض واذا مااعندج عادي اني انطيج!
..لا عيوني عندي، رحت اتصلت عليه مارد اتصلت مرة ثانيه دگ شويه ورد ..الووو
..هلوو مصطفى شلونك
..هلا گلبي اني بخير انني شلونج شعجب داكه عليه مو گلنه بليل؟
..اسفه بس شسمه اريد اكولك شي، ااني محتاجه اطلع للسوك وي خاله ودانيه عفيه كلش ضروري ووالله مااتأخر عفيه؟
جر نفس وگال..منين طلعتيلي بهالسالفه!
..حباب
..ههه حباب، ماشي راح اصير حباب روحي وياهن لاتتأخرين ومن ترجعين رمشيلي عينج مترفعينها بالشاررع تمام؟
..اي اي تمام مااتأخر
..ديلا عندج فلوس تندلينهن اخذي شكد متحتاجين
سديته منه وركضت لدانيه گلتلها وبدلت ولبست عباتي لبين مااجت هي وخاله اول شي اخذني لصالون تعرفه دانيه كعدت وحفيت وجهي لاول مرة هي تحف واني اكمز وياها وجهي صار احمرر واباوعله متفاجاه بيه حواجبي شمرتهن صارت تجنن ووجهي صار يلمع هلكد مانظييف اباوع لدانيه وخاله واكلهن تعرفني؟ وهن يضحكن، شعري صبغته خصل بني رادت تگصه ماقبلت كلشي ولاشعري، خلصنه ودفعت اجرها وطلعت رحنه للسوك وخاله تفهمتني من گلتلها مااكدر اوكف محلات شباب واشتري استحي، اخذتني لمحل نسائي جبير طابقين طابق الارضي شباب بيه وشغلات رجاليه ونسائيه وطابقه الثاني مخصص بكل شي تحتاجه المرأه، صعدنه وبديت اشتري ملابس نوم ودانيه تركض للمشلح واني ارجعه اشتريه شغلات حلوة مستورة ومشلحه، اشتريت مكياج وعطورات وغسولات ،وكفت على اصباغ الاظافر وحطيت كل الالوان حتى الابيض من يومي اموت ع صبغ الاظافر وخاله تگلي..يا يا شجاج يمة شسوين بيهن كلهن، واخيرا رجعنه للبيت بوقت الاذان وتعذرت منهن اخرتهن وتعبتهن وياي، ردت عليه دانيه..شسالفه عادي اصلا تونسه وهم اشتري غراض محتاجتهن، رجعت لبيتي طلعت عشا سريع واتعشيت، ورحت ارتب بغراضي بالكنتور خليت كلشي بمكانه ومشى الوكت فجأة واتذكر مصطفى!!! شهكت خايفه الساعه ب10 وگمت اركض للتلفون رمشت عليه وبسرعه رجع خابرني،بس گلت الوو.اجاني صوته غاضب..ولج بلوة وين جنتيييي لاتگليلي هسة اجيتيييييي؟
..لاا والله بس نسيت والله وانشغلت ارتب والله، ااسفه
جر نفس معصبببب ورجع هد عليه يصيح ويغلط لمن هدء واني ساكته حزت بخاطري كل هالغلط فرحتي بشكلي راحت، بعد هدوئه گال..ليش هيج تحرگين گلبي ميت فكرة اجت ببالي ها صار بيها شي ها تاهت ها ندعمت وانوب ماخذة النسوان وياج وباليتني، شسوي هسة انه گليلي
..ااسفه والله موقصدي مااصار شي اهدء عفيه، بقه معصب ويلوم بيه، اختاريت اجرب اتدلع واتجرء بالكلام وياه بلكي يلين
اتمددت بمكاني وهمست..عيوني انت هدي نفسك لاتتعب اسفه حياتي موبقصدي شنو هاي اليوم ممشتاقلي؟ لعد واني داحظر ببالي اشياء لاستقبالك! اححي وصوتي يرجف منو اني ماعرفت نفسي !
رد عليه بضحكه ..ههههههه لابالله هاي كل قوتج وانتي ترجفين؟ هههههه اوووف ميخالف نجي ونشوف الاستقبال وعقابج مضموم،
..اممم ماشي مقبول منك
..اي شلونج شسويتي ششتريتي؟
..اا غراض للبيت والي محتاجتهن صدك مكتلي شوكت تجي باحر لو عگبه
..عگبه ان شاء الله، ليش ناويه على مفاجأه
..همست ابتسم، اممم يمكن
..الله ومفاجأتج شكد وقتها ؟ههههههه
..يبوو لگاها فرصه وخلصها يتغزل ..مشى اليوم طبيعي ومن الليل هبيت عالبيت تنظيف من فوگ لجوة لمعته وعطرته واخذت الشيرة وكعدت الطم اشير بجسمي وابجي الله ياخذني اذا شيرت بعد، يممماي المس ايدي ترررررفه انعجبت بنفسي فعلا هههههه، بليل خابرني يتوعد وباجر وباجر وجان مقرر يعلي سياج البرة ويخطط على الشغل من هسة، ثاني يوم كعدت بالتسعه طفرت اركض تريكت وسبحت وطلعت ثوب قصير جوة الركبه نص ردن لون احمر وفتحت شعري وتعطرت لزمت المكياج ماعرفتله، لغمطت وجهي ورجعت غسلته للحظه ضجت بس ركض للتلفون طلعت عاليوتيوب ويديت ااتعلم وامكيج مثلهم وتقريبا صار حلو صبغت اضافري احمر ولبست حجل وسوارات تلاثه يخرخشن اباوع بالمرايه حيل فرحانه بنفسي يارب ديمها، طلعت بخرت البيت وطبخت غدة مرتب وكعدت انتظر بالصاله ماكو صار وقت الغده ومااجه شفت السله متروسه زباله وطلع ريحه گلت اطلعها بالباب حتى العصر ياخذوها، لبست عبايه وطلعت فتحت باب الشارع سنطه ماكو احد مديت روحي شويه وخليت الزباله بالباب علمود ياخذوها رفعت راسي واشوف سيارته طبگت ووجهة احمررر يباوعلي ويباوع لطرف ثاني بالركن باوعت واشوفلك واحد شاب صغير يباوع عليه طبيت اركض صعدت لغرفتي وتلفلفت خايفه ارجف دقايق وسمعت طبكت الباب وركضته عالدرج شافني متلفلفه ذب المفاتيح وصاح ..خاااايفه ولج اليوم اموتج والله، كمزت ارجف وابجي اشرد لجهة ثانيه وهو يريد يلزمني ويصيح ويغلط لحدما طفر ولزمني سحل راشدي حسيت بيه وبعدها ماصرت احس منين تجيني الضربات بالحزام لو بأيده اخر شي جان تحفيه على الميز شالها رگعني بيها اجت بخصري وراحت روحي كعد شويه لازم راسه وبعده يغلط، احس جسمي انشل عيوني گوة افتحهن وصوتي مايطلع من البجي، تلفلفت اون بألم ونمت، كعدت العصر بعدني بمكاني شفته نايم بملابسه وايده على عيونه حواجبه معگودة اتسحبت على كيف ورحت سبحت جسمي موتني ازرك ومخرمش مدمة گوة تحملت ورجعت للأستقبال البرة سديتها عليه ونمت مااريد اشوفه امدايه مايستاهل كل تعبي، منين طلعلي هالكلب اليبصبص، يمكن اني صوجي شون طلعت بهذا شكلي وانوب شاف رجليه طالعه من العبايه، بس مو معناته يدميني،اسمع حركته برة صار اذان المغرب وماگمت غلست عالعشا خل يحتار بروحه سمعت خطواته جايه وسويت روحي نايمة حسيت طب وحسيت بانفاسه قريبه عليه شالني بايديه واني مغمضه خلاني على السرير وراح فتحت عيوني بغرفتنه وهو ماكو رجعت ابجي لحالي تمنيت عندي اهل جان هسة التجأت الهم اصلا جان ماتجرأ يسوي بيه هيج ..
يتبــــع
