طريق خاطيء

تفكير....

باتكلم بالعامية دي المرة لأنه احس احسن بالنسبة لي عموماً،
اليوم خرجت من قروب سناب حق اقاربي واتوقع لي تقريباً سنتين فيه ولا عمري اتكلمت فيه ولا مرة في حياتي حرفياً هو اصلاً الاشعار الوحيد اللي يجيني منه السناب غير كدا محد يكلمني حتى برى السناب..
شي طبيعي لانطوائية من الدرجة الأولى بس السؤال مو هنا السؤال هو انه بعد ما طلعت قعدت افكر،طول دي الحياة كنت عايشة ومحد قاعد يكلمني كل يوم عالجوال او انا اتواصل او احد يسأل؟
على فكرة الموضوع ما همني بس جا في بالي فجأة
فعلاً مفهوم الانطوائية غريب+ اتذكرت سالفة صارتلي في وحدة من الاختبارات كنت في قاعة ووحدة من كلاسي جنبي وطبعاً ما كلمتها لانه وسائل التواصل عندي معدومة الف عموماً سلّمت علي وانا سلمت وسكت لانه ما كنت ابا اتكلم معاها بس كدا ، بعدين قعدت افكر: تتوقعوا الناس اللي مو زينا نحن الهاديين بأيش يفكروا فينا؟
غريبين وناس مختلفة مرة؟ مافي اي اختلاف بينكم ترى بس نحن ناس نحب نختلي بنفسنا بعيداً عن ضجيجكم وصخبكم واصواتكم العالية ناس تعيش في خيالها بعيداً عنكم انتوا اللي تحبوا تلهوا في دي الحياة وتستمتعوا مع اصدقائكم وكل يوم طلعة نحن ناس عالمنا هو الفضاء حيث انه واسع ولا يعيش فيه غير امثالنا..
وفي شي فكرة فيه كمان احياناً اقاربي واهلي يسألوني: عندك اصحاب؟.
اوكي سؤالهم منطقي بصراحة مع شخصية زيي بس برضه يحسسوني كأني انسانة متوحدة تماماً وانه ابداً ما عندي اصدقاء لا عندي بس انتوا تفكيركم الجاهل والخاطيء فينا هو اللي قلكم كدا وتحسبوا عشان نحن قاعدين لحالنا يعني ما عندما اصدقاء اوكي صحيح في انطوائيين ما عندهم اصحاب بس كثير ناس عندها وشخصيات مرموقة زي واحد نسيت اسموا صراحة بس عموماً كان لكل واحد منهم اصدقاء ومعارف كثير اكثر من اللي عندكم حتى..
بعدين اكثر شي اكرهه لمن احس انوا الشخص اللي قدامي او اي شخص اخر مدري معطيني احساس اني شخص غريب لاني ما اتكلم..
مدري بس اكره الشخص لمن يحسسني بدا الشي بس في وحدة في كلاسي كيوت كانت كل يوم تسلم علي وكدا ما عمرها حسستني بدا الشعور حتى احياناً تساعدني وكدا
مرة حبوبة وكل الكلاس يشوفوها لطيفة وكدا.
انا لو ابا اتعرف على وحدة ابغاها تكون زيها ما تحسسني بشعور غريب وحتى لو كنت هادية عادي عندها وتتفهم اني انطوائية وتتكلم معاية عادي حتى لو كنت هادية واخر شي واللي اشوفوا شبه مستحيل صراحة ما تضجر مني بصراحة لأنه اصلاً انا شخصيتي تطفش ومو على اي شي اضحك اصلاً وعلى ذكر دا الموضوع في قبل فترة رحت مع اخواتي معرض الكتاب في جدة واشترينا وكدا وقابلنا صحبة اختي وعادي بتضحك مع اخواني وانا ساكتة واسوي نفسي اضحك واصلاً في هداك الوقت قاعدة ادعي انوا يخلص دا اليوم لاني حسيت بالخنقة وانا بينهم بين مجموعة اشخاص يتبادلوا الحديث مع بعض الا انا لاني ما ابغى اتكلم...
وفي النهاية صحبتها قالت لاختي(اختك ثقيلة ما تضحك) ومن دا الكلام في هداك الوقت مدري
حسيت نفسي لو اني ما جيت هنا لانه احياناً حتى مع اخواتي لمن نخرج ما اتكلم معاهم  فاتخيل الوضع انتوا،

عموماً هادا اللي كان عندي اليوم واضح طولة الف بس زي ما قلت ما اكتب الا حسيت اني ابا اكتب فا يااه see you again 👋🏻👋🏻🖤.