KETEGAL PENGERAJA KAUL TUA TEBELEKA

PART 6

"Nama berita nuan wat?? ".

Pia ku tanya apai Lyn ngepun ke randau seduai iya Richard seraya nunga secangkir kupi.

"Manah berita aku aya.. ".

Saut Richard.

"Kati baka saritu enda sibuk nuan wat?? ".

Pia ku apai Lyn ga nanya Richard baru.

"Enda sibuk aku saritu aya. Maya iya enda mayuh pengawa, bisi ga maya endur belelak.. ".

Saut Richard.

"Lama seduai endu Lyn udah bekelala wat?? Laban kami duai indai iya jarang ninga endu nusi iya bisi sulu ati..".
"Lama ga udah aya, bisi setaun lebih udah tang bisi ga tua iya berunding ka manjai ke kaul tua iya. Enti aya enggau ibu setuju, aku ka ngambi Lyn nyadi ke bini".

Pia ku Richard madah ngagai apai Lyn. Nadai kakang kakang orang madah diri ka ngambi Lyn ke bini wai.

Lyn ti benung ngirup ai ba dapur ninga randau sulu ati iya ka ngambi iya ke bini nyau ensambur ai ari mulut iya. Tuchum lelinsum tudah Lyn gaga mih ati jara laban Richard ka mai iya jadi melaki bini.

"Nama ulah nuan endu ta lelinsum kediri, tabin nuan pia?? ".

Ku indai Lyn nyapa ari belakang. Lyn laban enda ngadang indai iya ba belakang iya, baru ka nguing tudah nyau tekenyit mih iya nyentuk ke ai ke ka di irup iya nyau imbur iya ngagai indai iya. Nya mih indai iya nyau manjung .

"Mandi dik antu..!! ".

Pia ko Lyn latah lalu ngimbur ai nya ngagai indai iya.

"Apuuuu.. Belacan anak tu. Iya kini ke ngimbur aku enggau ai nya..".

Pia ku indai iya. Nama dih nyau basah baju indai iya laban Lyn. Apai Lyn enggau Richard ti ba bilik besai ninga seduai mindai capuh ba dapur pan angkat ngesah seduai iya.

"Iya nama ulah seduai manak??".

Tanya apai Lyn ngagai seduai iya.

"Ehh, anak nuan nya mih wai. Aku berandau enggau iya angkat iya ta nguing lalu ngimbur aku.  Amat belacan ku aku..".

Ku indai Lyn mucau.

"Minta ampun indai, enda sengaja ka ngimbur nuan. Indai enda bebah datai ari belakang dini aku enda tekenyit..".

Saut Lyn ga nyau rerising tudah gamal iya.

"Nya mih wat, Lyn tu latah amat. Nya ukai salah Lyn. Indai iya baka ke enda nemu anak iya latah ga.. ".

Ku apai Lyn. Indai Lyn enda memunyi lalu tama kebilik nukar baju. Richard semina tuchum merening Lyn. Lyn merening iya ga lelesay tudah gamal iya. Berasai laban. Kini ga tunga indai nyau ngasuh aku latah. Kasih indai. Pia ku ati Lyn.

#####

Ngalih ari sida pan udah tembu ngintu diri. Sida sebuat pan duduk betunga ba bilik besai. Berandau mih sida iya nyentuk ari nyau lemai sambil ke makai utai ti di beli Richard pagi tadi. Nyau malam ari, baru Richard madah diri ka pulai laban pagila nyau kereja ga tudah iya.

"Ayak,ibu.. Mupuk dulu aku. Bulan baru tu ila aku datai baru mai apai enggau indai aku nanya Lyn ke bini..".

Ku Richard madah ngagai apai enggau indai Lyn..

"Au mih wat. Jimat ke bejalai nengah jalai wat nibuh laju mai entuka nya. Belubah aja amat mih datai ba rumah..".

Indai Lyn ga nguji ngingat ke Richard. Richard pan mupuk ninggal ke tengah laman sida Lyn .

BETAMPUNG.