لآخر العمر 4G

لآخر العمر حلقة 14

#لآخر_العمر 4G حلقة 14

غزل طقت عالباب طق طق طق🚪🚪🚪 / السلام عليكم 😅
كان عاطي بضهره يتفرج على الروشن فجأة تلفتلها
غزل/ 😳
فجأف طلع عامل ( سطا )من جنب المكتب بكل قوته شاد حديدات متع دوائر كهربائية خبط غزل على راسها من غير قصد ف اغمى عليها 😔💔
______________________________________

🏵💎 روايــــات دمــــعتــي تـــــروي مــــــأســـاتــي 💎🏵

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

ريماس عالموبايل📞📲/ بالله عليك ميرال قنعاها تكلمني ،، خلاص معش نقدر أكتر من هكي😭 لاها اسبوعين معش جت للجامعة ونتصل باها ونبعت ف مسجات متردش💔 جيت لحوشهم مبتش تنزلّلي شن بندير 😔💔
ميرال/ حاضر تو نكلمها بإذن الله ، ،، أصلا بنمشيلها العشية أني بروحي معش كلمتني منطوية ع روحها فترة اهياااا😔
ريماس/ غر قوليلها تجي للجامعة تشوف قرايتها..
ميرال/ اوك.... وسكرو🚫
____________________________________
غزل راقدة ع الأريكة / اه يا راسي💢 وين أني 💔😔
السكرتيرة/ نوضي مس غزل انتي ف الشركة توا ..
غزل/ نحس ف راسي يوجع اااه 💔
السكرتيرة/ الو سيد... اي اييي فاقت .. اوك ☺
طلعت السكرتيرة وقعدت غزل ممدودة عالأريكة ،، كانت قونتها مقيومة شوي ولابسة خلخال ذهبي وكندرتها الكعب 👠
غزل/ للدرجة هادي بديت نتخيل فيه ❤ ياربييييه
طق طق طق 🚪🚪🚪
غزل تغمّض ف عيونها من الوجع ومش منتبهة لين حست بلمسة يديه ع مكان الضربة
فتحت عيونها عليه ❤ ونزلت دمعتها
محمد/ خيرك تبكي☺
غزل وعلامة الدهشة ف عيونها❤
محمد/ شن حالك توا أحسن 😉 خوفتيني عليك
غزل/ أكيد أني نحلم
محمد وهوا يضحك ومتحشم/ تبيني انوضك من حلمك ولا نخليك تكمليه ..😉
فاقت غزل ع روحها 《فنفسها حي بديت نخرط 》😨
غزل بتخلي روحها ثقيلة 😂/ شن ادير اهني 😑 حتى هنايا لاحقني 😒
محمد/ انتي اللي جايتيني ، اني نخدم اهني 😁
غزل/ من اللي ضربني.. حي وجهي 😱 تره جيبلي مرايا 😢😢 ان شاء الله مقعدتليش أمارة 😭
وكيف بتنوض جتها دوخة ملقتش روحها الا بين ايديه ❤
محمد ينادي ع سكرتيرة/ ناديلي ع الطبيبة الميدانية للشركة
قعمزها ع الأريكة وجي قعمز بحداها.. قعدو يديها يرعشو ..
محمد/ خيرك 😨 شن تحسي ..؟
غزل/ نحس ف روحي سقعانة 😭وراسي يوجع فيا هلبااااااا
محمد / تره شوفيلي
غزل قامت عيونها عليه ،، لا أني منحلمش ياربيييييه❤❤
محمد عيونه يلمعو كان ف نظراته هلبااااا كلام وهلبااااا غموض .كانو دقات قلبه ينسمعو لآخر الشركة ..بلع ريقه من دهشته،، وغزل منسجمة معاه وجسمها يرعش.. قرب منها وقعد يتلمس ف جبينها يشوف ف حرارتها أما غزل غمضت عيونها استسلمت بكل سهولة ،، محمد ساكت يشبحلها وخلاص ❤ لين حست ب حاجة على كتافها فتحت عيونها لقاته يلبسلها ف معطفه ❤
غزل/ ديما حاصل فيا 😁
محمد/ اللي تحصل فيه دبّرله 😂 من أول يوم تدريب وهكي
غزل/ ههههههه
قاطعتهم الدكتورة وجت كشفت ع غزل
،
،
،
محمد/ شنو يا دككتورة وضعها؟
الدكتورة/ بالنسبة للضربة عادي غر جتها قوية و فجأة ف أغمى عليها .. لكن عندها هبوط حاد فالضغط والسكر .. شن ماكلتك فترة اهياااا؟
غزل/ الحق فترة اهيا شهيتي مسدودة..
،،
،،
طق طق طق 🚪🚪🚪 خش محمد وف يده كوبين قهوة وتشوكليت وكريب وافوكادو بالمكسرات..
محمد/ كولي هياااا
غزل وين تلقوها شهيتها انفتحت ههههه😂😂😂
غزل/ تانكس
محمد/ شنو مدايرة ريجيم امالا 😉
غزل/ لالا مسكرين عليا الكوجينة 😒
محمد/ ههههههه ميبوكش تسمني 🤪
غزل تفكرت المواقف الأخيرة وقالت بتنهيدة اااااه 💔
محمد/ شكله شهيتك المسدودة من أمور تانية ..
غزل/ الحمد لله .. نبي نعرف أمتى نبدا نتدرب وشن حندير اهني ..
محمد/ فالشك اليوم انتي حالتك متسمحش وتلزمك راحة..
غزل/ معش عندي وقت مزاللي خمسة ايام.. انتو مدايرلي تلات مرات فالاسبوع ومزاللي هالاسبوعين ونتم تدريب عندكم..
محمد/ مش مشكلة.. هكي ربع ساعة وحيكون فيه اجتماع لو حاسة روحك متقدريش خليك متكية ف مكتبي وفوتيه اجتماع اليوم..
غزل/ لالا .. تمام ☺
،
،
،
جي الإجتماع وحسّت غزل بشعور أحسن وخف علاها الصداع.. كانت تاعبة نفسيا وجسديا لا ترقد لا تاكل من التخميم وحرق الأعصاب 💔
قعمز محمد ع طاولة الإجتماع وهيّا جنبه.. ومعاهم مجموعة من رؤساء اقسام الشركة..
فوزي/ انتي اللي كنتي ف ليبيانا ولاه؟
غزل باندهاش😳 ايه
فوزي/ اني اللي كلمني مفتاح(خال معتز) وقدمتلك وراقيك اهنايا.. ☺
غزل/ تسلم بارك الله فيك..
عصام/ احني مناخدوش ف طلبة من يوم يومنا .. غر ع خاطر السيد فوزي 😒
شبحتله غزل بشبحة من تحت التحت //' موقحك اصلا مش ميتة بش نتدرب عندكم..
غزل معش عرفت لا ترد عليه ولا تتحمل اهانته.. 💔 قعدت تشبح لمحمد وساكتة
فوزي/ طبعا خن نوضحلك طريقة تدريبك.. حتجي تلات مرات فالأسبوع وحتحضري معانا كل اجتماع .. وتشرحيلنا ع العرض المرئي .. ووجه انظاره للمدراء المجتمعين .. من يتطوّع ويخليها تتدرب عنده؟
عصام/ عندي تلاتة سكرتيرات 😒
فوزي'/ حتى ني معنديش مهام بش نكلفك بيها بحكم عندي سكرتارية ومساعد..
غزل/ مش هكي التدريب
عصام/ امالا كيف؟ وضحيلنا 😒
غزل/ المفروض نتدرب ف قسم it اللي فالشركة وع الحواسيب ومنظوماتكم
فوزي/ ممنوع حد غريب يشوف منظوماتنا او يطلع علاها.. هما اصلا ستة ايام ماكش حتستفادي منهم ب شيء 💔
عصام/ ماهو قتلك احني مناخدوش ف طلبة للتدريب لأن سياسة شركتنا هكي 😑 غر أهو انتي جابك الحظ
غزل فخاطرها / اففف وين ما نمشي لازم فيه شكالات مصدية 😤
محمد/ تو تتدرب عندي وتكون مساعدتي اللي معاي واخد اجازة
فوزي/ تمام هيا عندك.. دربها عالامور المكتبية👌🏻
غزل شبحتله وابتسمت ☺ المهم نصفي مادة التدريب ..
______________________________________
محمود خال بيلسان الواعر وهوا مروح من جهة المحكمة يشوف بيلسان طالعة مروحة منها ويركبه ستين عفريت🤬🤬
قعد يسطرب ويشلّج بالسيارة ويجي يدرس بالقوة لين قريب خبطها ..
بيلسان / من هذا الحقير فرخ لحرام😨🤬 وتتلفت وتلقا خالها نازللها من السيارة ويشدها من يدها يلويهالها ويركبها بالقوة ..
خالها محمود/ تو نوري دينمك يا....🤬 أني تضحكو عليا كمشة نتايات يا بهايم.. قتلك مفيش مشي للمحكمة ولاه 😤 تي لما نقتلك يا كلبة 🤬 بتيجيبيلنا العار عقاب الوقت يجيني واحد يوقف عليا يقوللي بنت اختك تمشي للمحاكم وللمحبسة 🤬😠
بيلسان تبكي وتعيّط 😭
محمود/ تبكي يا امسسخة تبكي .. ويركها كف من الصح الصصصح💔💔
________________________________________
ابتسام ف حوش جدها وعمر والعيلة..
ابتسام/ عمر تعالى نبيك شوي..
عمر/ نعمم
ابتسام/ أني صبرت عليك وهلباااااا😤.. وسيبت خطيبي ف اسبوع عرسنا اني ووياه ع خاطرك .. ونشوف فيك تكلم ف بنات وساكتتلك لأن نعرف تكلم فيهم شهر شهرين تشبّع ف روحك وترجعلي أني🤬😠
عمر/ به مدام عارفة هذا كله شن اللي جابرك تقعدي معاي..😒
ابتسام/ انت تبيني ولا معش تبيني..😠
عمر/ كرهته سؤالك اهوا .😤
ابتسام/ منو هادي اللي كنت تكلم فاها فالشركة.. صاحبتي قتلي علاها😒
عمر/ مدامك مش واثقة فيا بري افهمي كيف ما تحبي
ابتسام تبكي/ عييت من معاملتك ليا خلاص عيييت 😭
عمر/ مداما تصدقي فاللي يجي معش تكلميني ولا تجي ف طريقي ..
عمر كان يبي يتهرب منها ،، صح كان يحبها بس ملقاهاش زي ما متخيل فتاة احلامه وهذا اللي خلاه يجيه البرود من ناحيتها،، بالأخص لما سيباته قبل وانخطبت لغيره وبعتالي رجعتله💔
ابتسام/ بنموت أني خلاص 😭😭
جت اختها/ انتي اللي خليتيه يتمادى عليك تستاهلي..
ابتسام/ أكيد يكلم ف بنت تانية متأكدة .. تغيّر عليا هلبااااا💔😭
______________________________________
محمد/ غزل
غزل/ نعم 😍
محمد/ تعالي عبيلي الجدول هوا اللي ع الكمبيوتر ☺
قربت غزل من مكتبه مشى ناض وخلاها تقعمز قدام الكمبيوتر
غزل/ لالا عادي تو نوقف..
محمد/ لا خليك قعمزي اني تو نوقف نوريك كيف تخدمي عالبرنامج ☺
غزل/ هذا كله بنعبيه أني؟ 😳
محمد/ هذا تدريبك 😉 هيا ابدي ولا متعرفيش😁
غزل وهوا واقف فوق راسها حسّت روحها أول مرة تشوف كمبيوتر قعدت ترعش مع بعضها وكلمة تطلع وكلمة تخش تلكلك ف الكلام ومتلبكة وعبيطة 😂😂 كان منظرها يضحّك من الأخير 😉😂😂
《(تبي تعرف حد يحبك بجديات ،، لو كان يدير ف تصرفات عبيطة وخاش بعضه قدامك ف هوا يحبك 👌🏻❤)》
🏵💎 روايــــات دمــــعتــي تـــــروي مــــــأســـاتــي 💎🏵