#Ruai_Bujang_Berani_Kempang#
#Ensera_John_Enggau_Anak_Jagu
#Dikarang_Kumang_ Kemayang
#Tajuk_Jerita_Chunding_Enggau_Aki_Selumba#
-Jerita Jenaka-
**Chunding Enggau Aki Selumba**
Tusun ti ke 1
Berasai lelak, pedis isi dibaie gawa besari-sari. Kepuas duduk belelak dia runding Chunding lalu terebai jauh engkilah remang. Teringat ka maya agi besekula kelia. Tuchum kediri iya ingat ke ulah diri agi besekula. Lebuh angin ke ngena lelekai kediri ga iya ketawa. Terebai mih dih tudah Chunding ingat ke utai menya.
🤔🤔🤔🤔🤔🤔🤔🤔
Tingggg....tinggg...!!
Lucing sekula bemunyi nanda ke jam tama kelas udah cukup. Datai maya belajar.Maya nya Chunding nembiak pemeri 6. Umur baru mangai 12 taun.
Enda lama udah nya....
"selamat pagi pengajar...!"bala nembiak agi dedegi nganti pengajar ngasuh duduk.
"Selamat pagi, duduk semua,"saut pengajar.
Bala nembiak lalu sama nuduk kediri ba atas mangku kayu. Pengajar ngerah bala nembiak mansut ke bup bahasa iban. Nyadi kebatang pelajar sida pagi nya, sentang pemeresi gari sekula.
Dia pengajar lalu betanya, "Bala nembiak, enti ulih anang sekali bekena ke gari ke carik ke sekula. Enti nya carik tau di jait. Sapa bagi kitai ditu kala ngena gari carik...?
Bala nembiak bela beperening mua pangan diri. Bisi nya betilik k tubuh diri nangi ke bisi carik tanchut baju.
Chunding ngangkat ke jari lalu nyaut.
"Aku kala meda urang ngena gari carik pengajar...."saut Chunding.
"Au...sapa dih Chunding....?" tanya pengajar.
"Aki aku Selumba pengajar. Rinsang cawat kena iya, lubang wit ayan mih pengajar...."pia ko Chunding nyaut.
Pengajar lalu badu bemunyi agi. Dinga enda lama udah nya tachuh kelas laban bala nembiak ketawa ninga Chunding nyaut munyi nya. Chunding ringat lalu mulai kediri ke rumah enggai nurun ke sekula agi. Malu laban diketawa ka bala nembiak bukai enggau pengajar.
Datai ari siti enda ga Chunding nurun sekula. Iran ati aki iya, meda uchu enggai nurun ke sekula. Dia Selumba lalu betanya ngagai Chunding.
"Apoooo......! Nama majuh nuan enggai nurun sekula encabuh...?"pia ko tanya aki iya Selumba. Teleba ngangau ke Chunding nya encabuh.
Lama Chunding enda bemunyi. Tanya Selumba baru ga udah nya. Enda puas ati.
"Oohh saut aku, ngai iya bakatu. Lapa nuan enggai sekula...?"Selumba majak nuki Chunding.
Begisai begaru pala tudah Chunding. Disaut legi nangi ke dianu, enda di saut danu urang gi ga.
"Ehhh.....kapa aku nya...!! Jaie magang bala sida ba sekula. Udu ketawa ke aku...! Chunding lalu nguing ke belakang melakang ke aki iya.
"Iya lapa urang ketawa ke nuan dih? Nama salah nuan dih encabuh....?"tanya Selumba baru.
"Tegal nuan ke udu ngena cawat carik rinsang lubang wit aaaa....aki nemu nuan! perak Chunding melintu ke mata.
"Nama ga ketegal cawat aku. Ukai cawat aku bisi nganu nuan dih uchu. Ukai nya dipeda urang ke carik. Nyin dalam sarung nangka aku dedin. Nadai urang nemu enti kitai enda madah..."pia ko Selumba.
"Eeihh dih aki, keruan mih nuan nya enda nemu utai. Pengajar ga nanya....sapa kala ngena gari carik...? Nyaut mih aku. Madah ke nuan suah ngena cawat carik rinsang ayan lubang wit....sida lalu ketawa ke aku. Nya aku ringat. Kapa aku sekula agi...."ko Chunding.
"Hahahaahaaha.......!"
"Nadai kedambi nuan madah ke urang cawat aku rinsang dih uchu. Ni enda urang ketawa. Enda urang aku empu ketawa mih. Empai ga aku kala nemu. Tak kengka mih nuan siku dih uchu. Cawat aku ka rinsang nuan ke enggai besekula. Ka nenadai nuan tu uchu....." Selumba majak ketawa pansut ai mata. Betati ke uchu iya enggai besekula ketegal cawat aki iya ke rinsang.
"Au...auuu...ketawa mih nuan aki. Enda ngawa...enda ngawa utang dulu." Dalam ati Chunding ngiga akal. Pedis ati meda aki iya mega ketawa ke iya. Udah manah iya nyaut. Utai ke padah endang amat ketawa ga.
**********************************
Bendar tudah Chunding rerising ketawa ingat ke semua nya. Pengingat agi mit kelia. Tegal cawat aki iya Selumba ke carik enggai besekula agi. Diatu kitai bekelala enggau Chunding.
Chunding anak patu balu. Ditinggal apai enggau indai iya parai dalam penusah perau karam. Pengudah tinggal ke apai indai iya, Chunding diau enggau aki mua ari indai iya ianya Selumba. Chunding lama udah badu sekula pengudah ka malu diketawa ka bala kaban ketegal cawat Selumba ka rinsang.
Nyadi diatu, chukup mih umur alai Chunding ngiga pengawa. Ke belanja seduai meaki pama mih ko anak ati iya. Udah tuai aki iya, enda entu bepengerai agi nupi Chunding. Laban ka nadai pemandai iya ngiga pengawa ke ipak diri mih. Ambis alai endur ngiga pengawa. Kereja kuntrik, betebas ke rumput,nyentuk ka pengawa deriba. Chunding nemu deriba ngembuan lisin. Datai ba supamakit emart Chunding meda bisi pengawa puang. Pengawa nusun barang.
Tama mih Chunding ke dalam supamakit nya. Peda iya siku indu lalu betanya.
"Umang...ka nanya nuan dulu aku. Anang ga mata nuan melut mang, ukai nanya nuan ke bini. Tang ka nanya dini minta kereja ke ditulis urang ba tiang depan dedin....?"pia ko Chunding.
Lelinsum mih tudah indu ke dikangau ke iya Umang nya ninga Chunding ke munyi nya. Cali amai ko ati iya. Sempat ga iya merati ke pendiau Chunding. Gap ga ko ati indu nya bejaku kediri. Tang.......datai ba baruh.
Jeng....jeng...jenggg...!!
Baju gap, tanchut gap, beceremin mata celum baka geruda lambung ko sempama, pisin belah dua sekali datai ba kaki........akaiii ....selipar sepiak celum sepiak burak.
Ketawa lelekai mih indu nya.
"Apuuuu....!! Amat jegit nuan Umang. Aku nanya manah ngasuh nuan ketawa ngemendar nya. Ajih luput nih...! ko Chunding lalu enda sedar ke utai kena kaki diri.
"Pe....pe...peda nuan Jang, kaki nuan"pia ko indu nya ketawa mampul mulut.
Palik Chunding ke baruh.....
"Apuuuuuuuuu....! Ko panjung Chunding dalam ati. Mulut ke enda nyebut laban ke udah malu. Iya pan lalu ngesip.
"Nih.....kasih mih nuan Umang tinggal jaman. Tu mih selipar jaman now munyi ko urang. Jaman taun 2020 tu. Tinggal mih nuan Umang. Sakai udu! pia ko Chunding lalu kekepak mih tudah selipar diayun ke singkang kaki ke bejalai nuju upis endur minta kereja.
Mansang iya ngagai mija siti, nanya indu kerani siku.
"Endu, dini alai minta pengawa puang...?Amai bisi kini..?
"Auu....amat Jang, bisi. Duduk mih nuan dulu. Ditu mih ba aku. Duduk dulu nuan au. Legi aku interview nuan." Indu nya lalu angkat ngasuh Chunding ngisi pom siti.
"Tu pom isi nuan dulu Jang. Sua ngagai aku baru legi enti udah tembu ngisi."ko indu kerani.
Lama Chunding enda nyengkau pom nya. Berunding mih ati iya. Malu dia. Ngesip mih kira ati iya enti indu nya nanya legi.
Meda Chunding jenuh enda ngisi pom dia indu nya nanya baru.
"Lapa nuan Jang...? Isi mih pom nya,"ko indu nya baru.
Chunding lalu nyaut. Enda ibuh ke malu amat mih udah ko pikir iya.
"Endu, kelia aku sekula ketegal aku kelalu pandai. Agi ka aku sekula ditagang pengajar, ketegal karang digaga aku kelalu panjai. Ngetu enda lama aku sekula ketegal aku pandai ngarang. Panjai karang aku enda alah bacha pengajar. Udah nya, diketawa ke bala nembiak bukai ketegal cawat aki aku Selumba ke rinsang. Nya kebuah aku enggai ngisi pom tu endu, nangi ke nuan enda tebacha ka utai tulis aku dia...."ko Chunding ka tetuchum. Dalam ati lelekai ketawa.
Ninga nya, indu kerani nya lalu ketawa enggai bebadu. Bedau nya, bedau nemu kisah selipar Chunding laban bedau malik kaki Chunding. Nama enda kini jaku Chunding enti indu nya ngerara selipar iya ka timpang...? Begulai baru ba tusun ti ka datai. Bulih enda Chunding minta gawa ba supamakit nya kini...?? Ba tusun ke ka datai Chunding bejaku urang putih. Nya baru kitai lelekai.. Chunding nangung bus besai benung makai. Laban ko bus semua urang nangung. Makai tangung. Bahh stay tune au..!!
Di karang : Endu Dara Rembu enggau Dom JJ
