دخلت و عيوني لونها أحمر .. ما ادري عصبية لو قهر ..؟
شفتها واگفة .. اي واگفة و الدشداشة قصيرة و الشعر مفتوح و صاير على ظهرها كله .. اوف منچ يبت عمي ..اني درت عيوني و دخلت بوجهي على الاستقبال ، لگيت ابوي و امي و مرت عمي .. يلي ابوي تزوجها بعد وفاة عمي الله يرحمه ، حتى يسترها و يبقي ابناء عمي يمنا و ما يصيرون يم الغريب .
سيف : السلام عليكم .
الكل : و عليكم السلام ..
ابو سيف : تفضل وليدي اگعد ارتاح ، چنك ما نايم البارحة .گعدت على التخم و شعلت جگارة .. هو اني حياتي گضيتها كلها احرگ بالجگاير و ما ملحگ ، كل شي يحرگ دمي .. كل شي يوجع .
ام مرام : ها يمة شو اشوفك مغثوث..؟
اني ضحكت بس ضحكة مال ضوجة ، سحبت نفس من الجگارة انوب باوعتلهم شلون گاعدين و الهدوء بكل مكان منتظرين اجاوب .
سيف : اي يمة مغثوث .... و ما نايم البارحة ، چان انذار و لعبانة نفسي ..
ام سيف : يا يمة سودة علية .. دوگف لعد شوف شلون راح يجيك الچاي المعدل الي يعدل الراس !اني ابتسمت .. سبحان الله ، ادري الشرايج و مرات الحمى يصير مذابح ، بس الحمد لله امي و مرت عمي وحدة تحب الثانية حيل و ما يتفرقن ابد .
باوعت لأبوي و چان صافن و تايه ، حسيته مهموم بس ما يگدر يحچي .. ابوي من نوع الي ينغث و ينترس هموم و ما يحچي لأحد .ام مرام : ولچ مرومة يمة !!
لا.. لا بربكم .. تريدون تطيبون راسي بوجع راس ثاني ..؟
مرام : ها ماما !؟ ..
اجت تركض .. كفخني عطرها و ما حسيت بروحي گبل انداريت عليها ، مخليه على راسها حجاب بس ذابته ذب لأن اني محذرها ما تبقى هيچ لا گدامي و لا گدام اخويه الصغير حسين .
شنو الطول .. شنو العطر .. شنو العيون .. اخ يا بت عمي !ام سيف : يمة حبيبتي سوي چاي لسيف راسه مأذيه !
مرام : اي مو تتدلل العسل مال البيت ..ادنت يمي و اشرت لأمي و مرت عمي .
مرام : من هاي العين ! .. لعين سيف !!
دخلت اصبعها بعيني و ضحكت و شردت .
سيف : لا يا بت..!
الكل : ولك سيف!!!
سيف : استغفر الله ربي ... شوكت اخلص منچ و من هالتصرفات!اووفف يا زعطوطة گلبي .. عمرها 17 و عقلها خمس سنين ، شگد اسوي نفسي ما طايقها و احاول اقنع روحي .. بس ما اگدر ..
اعشگها اني يا بشر!!~❤
..
سيف : نقيب ، عمره 30 سنة .. يحب بت عمه و يموت بيها ، ذيب و ما يخاف أحد و اذا شاف الشي صح يسوي غصب على الكل و دائما قراراته بمكانها ، عيونه سود و شعره اسود ، طويل و چتافه عريض ، على ضخامه و صوته خشن بي كل صفات الرجولة .
مرام : طالبة خامس اعدادي ، عمرها 17 سنة .. تصرفاتها طفولية و وكحة أم لسان ، تحب واحد جيرانهم ... او نگدر نگول معجبة بيه كأي مراهقة بمثل هيچ عمر ، حبابة و فطيرة و كل شي بگلبها على طرف لسانها ، طولها متوسط لا گصيرة و لا طويلة ، شعرها طويل لنهاية ظهرها و بني على اشگر مثل امها ، و عيونها عسلي ، بيها صفات الانوثة بس كبريائها فوگ الكل !!
ابو سيف : متقاعد ، عمره 52 سنة .. رجال يخاف الله و دوم يخاف على عائلته ، تزوج مرت اخوه حتى يحافظ على ابناء اخوه الله يرحمه ، يحب زوجته حيل و يعاملها ملكة ، عيون سود و شعره اسود و طويل .
ام سيف : ربة بيت ، عمرها 49 سنة .. مرة حبابة و ثگيلة و تحب العدله ، تحب مرت حماها و تحسها اختها على الرغم من انو تزوجت رجلها ، تخاف على مرام و حسبة بتها لأن ما عدها بنات ، عيونها بني و شعرها اسود .
ام مرام : معلمة ، عمرها 40 سنة .. انسانة مثقفة و واعية و تحب عائلتها حيل و تحترم مرت حماها (ام سيف) و حتى سيف و اخوانه مثل ابنائها ، ناس على مال الله و يحبون بعض ما عدهم شي ، عيونها عسلي و شعرها بني و مرام تشبهها .
حسين : اخو سيف .. مدرس لغة انجليزية ، عمره 26 سنة ... فقير و ثگيل و على نيته حيل مو مثل سيف ، يعتبر مرام اخته الصغيرة و دوم يطلعها و يشتريلها و مدللها ، مع انو سيف ما يقبل و دوم يتعارك وياه بس ينقهر عليها لأن ما تطلع بس من البيت للمدرسة ، يحب سمر حيل .
سمر : اخت مرام .. كلية صيدلة ، عمرها 20 سنة .. واعية حيل اكثر من عمرها و ما ترضى على العوجه ، تحب حسين بس محد يدري بس مرام ، دائما تحاول تتقرب منه بس هو ما منتبه و حيل مطفي و عباله تعتبره مثل أخوها و بس ، عيونها عسلي و شعرها اسود طويل لركبتها .
علي : اخو مرام الصغير .. طالب ثالث متوسط ، عمره 15 سنة .. شاطر حيل و رجال على الرغم من انو هو صغير ، يحب عمه و ابناء عمه حيل و يحترمهم ، يحب سمر اكثر من مرام و دوم يتعارك وياها و يرجع عمه يحاسبه ، يحسها مو اخته .. ما يطيقها و دوم مشاكل .
سامر : جيرانهم .. كلية تقنيات حاسوب ، عمه 21 سنة .. يحب مرام و دائما يحاول يتقربلها .. و حتى مرة دز امه تتقدم الها بس سيف سوى مشكلة على اساس هي صغيرة و بعدها تدرس ، عيونه زرگ و شعره اسود ، طويل و شوي ضخامه .
أنت تقرأ
عشگ الذيب (👑باللهجة العراقية👑)
Romanceشنو ممكن يصير لو صار الرجال ذيب...؟ مزيج من الرجولة و الهيبة و الشراسة مختلطة .. زين ..... شنو ممكن يصير لو اختلطت الأنوثة بالكبرياء...؟ هنا راح يصير الجبروت تحت دقة خلخالها .. اجيتكم بقصة جديدة باللهجة الملكية العراقية 👑 و ان شاء الله تنال اعجابكم...