عشگ الذيب (👑باللهجة العراقية👑)

Pt.5

"مالي غير سماع رنة ضحكاتكِ ..
لا تبسمي ثغركِ و تبسطي نظراتكِ ..
و ما لي قلب يحتمل غيرة قاتلة ..
فعيون الجميع تشتهي بسماتكِ ...❤"

مرام :-

مرت الأيام و اني بين امتحانات يومية و بين سالفة العقد و الخطبة .
اخذتني امي و مرت عمي للصالون حفيت و ميشت شعري طلعت كلش حلوة ، ما چنت متوقعة هيچ راح يطلع .
تعذبت ام الصالون بشعري لأن حيل طويل و الميش على طول الخصلة ، و اني هم حيل توجعت .
رجعت للبيت سويت ايدي و رجلي ، سيف چان عنده انذار و باچر يالله يجي ، و احنه عگب باچر خطبتنا .
راح ياخذ اجازة و يگعد بالبيت يومين على مود الخطبة ، اما اني .. باچر راح اروح للمدرسة عبالك لعابة جديدة .
گاعدة على التلفزيون بالاستقبال بعد ما خلصت دراسة و شغل ، طبعا الجهاز ما رجعلي و هالأيام اني و سيف نتجاهل بعض كلش .
من اخر مرة من حصرني جوة الدرج بعد محد حچة ويه الثاني ..
تأفأفت و ذبيت الريموت على صفحة ، كل تفكيري بيه عبالك بس هو همي الوحيد .
گمت من مكاني و توجهت لغرفة امي شوي اگعد اتسامر وياها .
دگيت الباب و دخلت شفتها تقرأ قرآن ، ما حبيت اقاطعها فگعدت يمها اسمعها و هي تقرأ .
اخذت نفس و خليت راسي على چتافها و غمضت عيوني .

ام مرام : الحمد لله .. كبرن بناتي و راح يتزوجن .. و يبقن جوة عيني .

اني ابتسمت و باوعت لوجهها لگيتها تبچي ، حضنتها بسرعة .

مرام : شبيچ ماما حبيبتي ؟؟
ام مرام : ما بيه شي حبيبتي ، بس گلبي يمچ ..
مرام : ماما لا تخافين حبيبتي .. اني بأيد أمينة ، سيف صح عصبي بس عمي ويانه الله يديم ظله علينه .
ام مرام : امين يمة ، شعدنه غير عمچ .. كل هلسنين هو معتني بينا .

هزيت راسي و خليته بحضنها ، ظلت تلعب بشعري و چ من راسي و اني غمضت عيوني .
ما ادري بنفسي و غفيت بحضن امي ...

⭐⭐⭐⭐⭐⭐⭐⭐⭐⭐⭐♣⭐⭐⭐⭐⭐⭐⭐⭐⭐⭐⭐

سيف :-

عدنا انذار و احس روحي طالعة ، و هذا ميثاق الگ**** طلع من السجن لأن ما عليه اي دليل .
باچر لازم انزل للبيت و وراها الخطبة ، كل ما اتذكر هالموضوع كل التعب يروح و احس روحي رجعت صبي .
رحت للمكتب مال العقيد ايهم و دخلت ضربتله تحية انوب گعدت گباله ، شعلت سيجارة و ظلينا نحچي .

ايهم : اي .. بشرني ، شصار ويه بنت عمك ؟!
سيف : عگب باچر الخطبة .
ايهم : الف مبروك و ان شاء الله الولد الصالح ، تستاهل والله .
سيف : تسلم خويه ما تقصر .
ايهم : باچر تنزل للبيت مو ؟!
سيف : اي والله باچر انزل .
ايهم : لا لم اغراضك و انزل اليوم ، اعتبرها هدية خطبتك .
سيف : مشكور والله بس هسه بعدها دنيا الظهر ، خل على الاقل اكمل اليوم .
ايهم : لا روح انزل ما عليك ، نقيب اشرف و نقيب حسين موجودين .