#سجين_و_رُوح.
الحلقة العاشرة
//
//
روح >> صقر لو قتلك اتعابي بدال الفلوس تجوزني توافق ؟؟؟؟
انا >> كيف ؟؟؟؟
روح>> كلامي واضح ما نبصرش ؟
انا >> عارفه واضح بس مش مستوعب 😂 لهدرجة جذاب 😂
وكنت نحكي ونحسابها تبصر ... ماكنتش متوقعها تحكي جد .. لعند ما بحتت فيا بجديه و انا كنت مازلت نضحك وقفت ضحك وبحتت فيها
انا >> تحكي من جدك ؟؟؟ زواج اللي هوا عريس وعروس ؟؟؟ مش جواز سفر يعني ؟؟؟؟
رُوح >> بنحكي معاك ماعنديش حل الا هكي
انا >> رُوح شن فيه ؟؟؟ في حد مضايقك حد يهدد فيك ؟
روح>> لالا مافيش شي من هضا بس اسمعني
انا >> اوكي
وحكتله روح علي باتها و علي العريس اللي جايبه لها و علي كل شي صار
روح>> وعشان هكي كنت مرات نجيك مضايقه لما كنت فالحبس .. كنت نفكر فالموضوع هضا طول الوقت ، انا مانبيش شي غير انه نزوجو و بعدها نطلقو وانا نوعدك حا نوصلك ب امل ب ايدي ...
انا >> رُوح ؟؟ ما تعالجيش الغلط بغلط .. لو عليا انا ما عنديش مشكله لا عندي هل يعترضو ولا عندي حد ورايا بس هلك حايوافقو علي متهم ؟؟ علي خريج حبوس ؟؟ خالك اللي حكيتيلي عليه وباتك ؟ كيف فكرتي
رُوح >> صدقني بابا يبيني نزوج وخلاص مش مهم الراجل اهم شي يرضى مراته
انا >> بس ما فيش حد يرضى
رُوح بعصبية >> خلاص انسى الموضوع
انا >> ح نسآلك سؤال واحد .. و لو جاوبتي عليه ح نوافق
رُوح >> شنو ؟؟
انا >> ليش انا ؟؟؟ليش جيتيني انا بذات ؟؟
فيه عرم خيارات ليش ما حكيتي الغسان مثلا ؟؟
رُوح حولت نظاراتها و توترت >> شوف هو معاك الحق تنصدم و تستغرب وانا اسفة عالطريقة اللي حكيت بيها معاك ... بس لما جيت فكرة لقيت اني حنزوج يعني حانعيش مع حد في نفس الحوش تحت سقف واحد ... يعني انسان يشاركني كل تفاصيلي ، صح مش حاتكون المده طويله ممكن ست شهور ممكن سنه ما تعرفش الظروف بس في الفتره هذي بنتريح نبي انسان نعرف نتفاهم معاه حد نقدر ناخذ ونعطي معاه طول الفتره هذي ويفهم طبيعة شغلي والاهم يفهمني .. وانا مالقيتش المواصفات هذينا الا فيك .. حاسه انك انت حاتقدر تفهمني حاتستوعب اللي انا فيه ماعنديش غيرك ولا نعرف غيرك 💔 ولو حاس الموضوع صعب ف انسى اني قتلك
انا كنت نسمع في كلامها وقلبي يدق فوق المعدل الطبيعي شعور غريب>> موافق ، بس فيه حاجه
رُوح بنظرة صدمه من الموافقه >> شنو ؟؟
انا >> وين حا نسكنو ؟؟ انا توا ماعنديش حوش ولا عندي فلوس اساسا و اكيد ماحدش حايوظف عنده حد طالع بكفاله وشغلي مش حانقدر نردله بعد اللي صار ...
