حكايتي

كسرة قلب 💔

الايام بتعدي والاحوال بتتغير بس انا لسة واقفة مكاني مش قادرة اتحرك بحاول انسى بس مش اي حاجة تنسيني كسرة قلبي ونظرتي قدام نفسي انا مكنتش كدا عمري ما كنت قريبة من ربنا كفاية .. كان ربنا دايما بيندهلي بس انا اللي مبستجبلوش بس اخدت الدرس واتعلمت ان كل حاجة فانية وان كل النعم اللي ربنا عاطيها للإنسان ممكن متبقاش موجودة في لحظة ف بحمد ربنا دايما على كل حاجة سواء حلوة او وحشة سواء فرحتني او كسرت بخاطري اتعلمت اني ممشيش خطوة الا بذكر الله يمكن حصل اللي حصلي من بعدي عنه وفعلا محسيتش بكرمه ولطفه بيا الا لما بعدت عن الشخص دا ولجأت لربنا ... طبعا مش فاهمين حاجة انا هحكيلكوا ...

فلاش باك 

كنت في تانية ثانوي زي اي بنت عادية بتلبس حجاب بس مش كامل كان عبارة عن طرحة وهدوم عادية جدا حتى الطرحة مكنتش مقتنعة بيها كتير  بس لبستها علشان أرضي بابا قولت يمكن شوية بشوية والبس احسن لاني مكنتش مقتنعة بفكرة حجاب مع بنطلون 🤷‍♀️ دا + اني كنت بحط ميكاب وكان ليا اصحاب ولاد وبنات بس للاسف زي ما بيقولولك صحاب السوء .. بس انا كنت فكراهم شبهي وانهم هيبقوا صحابي واخواتي جدا بس طلعوا بيهتموا بالمظاهر بس وكانوا اساسا اغنيا جداا لكن انا كنت متوسطة الحال وانا كنت بحس اني مش زيهم مع ان بابا وماما عمرهم ما خلوني محتاحة لحاحة بس انا كنت حابة ابقا زيهم وللاسف وصلت لمرحلة اني استعر من شغل والدي لانه كان موظف عادي جدا في بنك انما دلوقتي والدي مدير بنك والفرق واضح طبعا  مش دا موضوعنا الموضوع اني اتعرفت على شخص .. الشخص دا كان روحي جدا حبيته اكتر من حياتي وجيت دايما على نفسي عشانه بس للأسف اتضحك عليا زي اي بنت واحد كلمها لفترة وسابها او ب معنى اصح كان بيتسلى

اول مرة كلمني فيها كنت خارجة من الدرس و مروحة لقيته واقفلي قدام بابا الدرس مع العلم هو كان اكبر مني بسنتين جه وقالي : لو سمحتي ممكن اتكلم معاكي في موضوع مهم 

طبعا انا استغربت وبكل تلقائية رديت : هو حضرتك تعرفني !

رد بكل هدوء : الصراحة ايوا اعرفك من فترة ... انا حسن 

رديت : تشرفنا اتفضل حضرتك عاوزني في ايه ؟ 

رد : الصراحة يا ملك انا معجب بيكي جدا  وكنت عاوز ارتبط بيكي .. الصراحة ملقيتش في اخلاقك انتي بنت مؤدبة وطيبة وانا بدور على واحدة من النوع دا عاوز واحدة مكلمتش مخلوق غيري قبل كدا عاوزك ليا انا وبس وطبعا انا هحترم قرارك 

انا ردة فعل طبيعية اني اخجل واتصرف بتوتر مهما كنت انا اول مرة بيتقالي كلام زي دا كلام حركني وكنت زي الهبلة وكان كل ردي عليه وانا اصلا معرفوش : هفكر .... ، الصراحة معرفتش انا جبت الجرئة دي ازاي اني اقف واتكلم معاه اصلا بس كل اللي اعرفه اني كان نفسي اتحب جدا واحس اني زي البنات صحابي المرتبطين وطبعا بعد مرور فترة مش قليلة وافقت وفعلا ارتبطت بيه