كرونيك بعنوان:💞" لحن_الانتقام"💞

بارت2

عند زهرة(جداة نارين):

تحلت عيني مع اذان الفجر...قمت توضيت وصليت...رفعت يدي للسماء ندعي لربي يحميها ويحل البيبان في وجهها.....مفقتش مع دموعي كيفماه هبطو وحدة ورا اختها....لين وليت نشهق بالبكاء...استغفرت مولايا...مسحت دموعي..وقعدت نخزر من الشباك...السماء صافية نسمة الريح خفيفة وقطرات ماء بدات تهبط من عيون السماء ....مخي راح يتحرق من التخمام...زعما شنوا لي خلاها تخرج من الدار...في ليلة ونهار قررت تسكن وحدها...زعما علاه....افكار ياسر تدور في مخي...نارين حفيدتي وعبارة على بنتي نحبها اكثر من اي حاجة في الدنيا...ابتسمت لا اراديا وقت جات صورتها ما بين عينيا...هيا الحاجة الوحيدة لي بقاتلي من المرحوم بوها...عمرها لاشافت نهار حلو في حياتها..صحيح عيشناها اخلى عيشة...عاشت كي الاميرة لي تطلبها تجيها على طبق من ذهب...دللناها برشا...اما ديما تحس انو ناقصتها حاجة...نتذكر وقت كانت 5 سنين...يومتها بكات برشا على فراق والديها...نتذكر وقت حطت راسها في حجري وبقات تسأل فيا....مااما وبابا راح يرجعو موش هكا...قلبي عصر عليا وقت سألتني...محبيتش نكذب عليها ونعيشها في الأوهام....محبيتش نخليها عايشة تحت أمل في صغرها انو راح يجي نهار ويرجعو....حبيت نقوللها الحقيقة...قلتلها انو معادش باه يرجعو...هوما في دار الحق واحنا في دار الباطل....من صغرها واحنا نحاولو باه نعبيو فراغ حنينها لبوها وامها...حاولنا نكونو البديل...حاولنا نسوها في اوجاع الماضي ونعيشوها حياة جديدة....اما الوالدين ميتعوضوش بكنوز الدنيا...الأب هوا سقف الدنيا....تصورو حجم الضياع وقت ترفع راسك و ما تلقى شيئ يحميك...والأم ....ااه من الام....الام هيا الراحة هيا الحنان هيا الهناء هيا الامل  هيا كلشي في هذه الدنيا ووقت ترحل راح تحس حياتك وقفت في هاذيك الدقيقة...اكيد راح يفهمني غير الي عاش اللحظة...صحيح انو رحيلهم مشو بيدينا اما الحنين مؤلم....قلبي يوجعني وقت تقلي تمنيت يكونو حيين...ديما نصبرها ونهديها...أما  جرحها صعيب برشا باه يبرا...لانو جرح القلب معندوش دواء...وهوا اقوى وجع في الدنيا ....ساهلة انك تحط يدك على فمك باه متتكلمش...اما الصعيب هوا انو تحط يدك على قلبك باه متتألمش ...لأنو اصعب شعور انك تمثل دور الراحة وقلبك معبي بالوجع....رميت عيني على الكوافوز شفت تصويرتها...اييه يا دنيا...دركا نارين في طولي...كبرت وزيانت ماشاء الله...اما ملامحها وبرائتها مزالت محفورة على وجهها متغيرتش جملة...صحيح راسها كاسح برشا...اما قلبها طيب وحنين...صحيح انها ما تبينش اما انا نعرف هاد الشيئ كيفماه ما نعرفش وانا هيا لي كبرتها وربيتها....وقت طلبت من جدها انها تخرج تسكن وحدها...حسيت سطل ماء بارد تكب عليا...قوامي بردو...كيفماه راح نقدر نتحمل بعدها وهيا ديما لي مزهيتلي الدار بضحكتها وحنينها معايا....صحيح انو جدها مكبرها على السلاح وقسوحية الراس والقلب ...مي ديما تحن وقلبها يلين معايا وقت تراني مريضة والا تعبانة ديما تكون جبني...خذيت نفس نعبي في رواريا ونمنع في دموعي من انهم ينزلو...قمت...لميت سجادتي....هزيت سبحتي وقعدت نسبح لعل وعسى ننسى هالجوجمة لي تدور في راسي من التخمام...لأنو التفكير الزائد هوا اقوى مرض يدمر الانسان

زهرة براهيمي....مرا في ال60 من عمرها أما زينها تاع طفلة عمرها 20.....عينيها زروقة بحر ورثتهم نارين منها.....شعرها اسود طويل كي الليل وفيه خصلات شيب بيض ديما دايرتلو ضفيرة......زهرة المرأة القوية اللي جبل ما يهزها وهبة الريح ما طيحها....حاملة هموم الدنيا على كتافعا وعمرها لا قالت ااي...ديما تضحك وتتبسم وهذا الكل رغم الكفوف لي مكلتهوملها الدنيا...صحيح مشي ضعيفة اما تبقى بشر ....حاربت الدنيا بكل قوتها وبقات صامدة صحيح طاحت مرات..اما عاودت وقفت على رجليها..وهادي هيا الدنيا يوم لك ويوم عليك وتستمر الأيام...فنحن فقط عابرون..الدنيا ليست لنا

لست ضعيفة يا الله لكني بشر افقد السيطرة احيانا وينقلب حالي تختلط مشاعري ويتعب قلبي اتوه ولا أطيق يومي لست ضعيفة لكن قوتي بك♥