فرصة اخيرة

2

سالم يبرم ومحتار ... مش فاهم كيف هوا هنا ..و شن صار معاه ... يحكي مع روحة ...

اهو شعري مافيش شيب.. وجهي مافيش تجاعيد .. شكلي فالعشرينات ... امي صوتها تحكي جوا مع اختي ... ريحة بخورها وصوت مسجلها ... طاقية بوي معلقة عالمدخل ...
بس شن جاب الساعة  ... الساعة هذي كانت معاي .. بس مش توا كانت معاي بعد سنين ...نحلم ..يمكن نحلم
حط ايده على راسة ... ينزلها يخبط على رجلة ... يفتح الساعة يتأمل فيها ...
في وسط ماهو حايس يخش علية خوه الصغير يجري ...
ناصر : سالم سالم ...
سالم رفع راسة انصدم 😧.. ناصر .. خوه الصغير .. ناصر مات وهو عمرة 18 سنه في حادث  .. بس توا واقف قدامة طفل عمرة 9 سنين ..
سالم قرب من ناصر مش قادر يرمش عيونه ... خوه الصغير اللي شبه مربيه ع ايدة ... عاش سنين وماقدر يتجاوز صدمة موته .. وتوا واقف قدامه ...

قرب سالم من ناصر وضمة
ناصر 😇😲: كنك ياسالم ... هههههه🤭 . تعال باتي يبيك برا تنزل معاه السبيزة من السيارة  ...

سالم :هأحم هيا جاي وراك ... وخبطة ع راسة بالراحة . 
طالع وهو قلبه دف دف دف 💗💗.
بوه برا وهوا ماشي شورا ...
من سنين مش شايفة . . سنين تقاطع فيهن مع اهلة عشان زواجة من ريم ... زواجة منها كان غلطة عمرة .. خسر عائلته واختارها ..
طلع من الباب شاف بوه مطبس على شنطة السيارة ينزل في صندوق زيت .. مشاله يجري خذاه منه ...

وهو مستوه😐... بوه قاله هيا سقد روحك تحرك خشش الصندوق وتعال خوذ باقي الحاجات ...
سالم💗💗💗
لف وخش بسرعة جوا ... مشتاق لامه ... توا رح يشوفها بعد ماقاطعها سنين وسنين كانت شايله منه في قلبها وهو كابر يطلب منها السماح  💔 ....
اول ماوصل في باب الكوجينه شافها من ضهرها  ..
امة: هيا ياسعاد  سقدي بالسلاطة فيسع ...
لفت ل سالم : وعيت انت ... حط من ايدك .. وتعال نزل طاقم التباسي من فوق ..اليوم جايتنا خالتك فكونا مالخيطي ميطي خلو البنات ياخذن راحتهن..

سالم :باهي ... ديريلي قهوة يام خاطري فيها ...
امه 😕:باهي ... كنك حايس ومستوه   تحس في روحك مريض ؟؟ ..
سالم : أأا...هأحم . اه اها والله حاس روحي دايخ شويا ..
لف وطلع مرتبك ومحتار ...
يحكي مع روحة شن اللي صاير معاك ياسالم ..
...

حطو الغدا وتغدو سالم سرحان مش على بعضة قاعد بين هلة .. من سنين مفارقهم ... في منهم اللي مات واللي تقطعت اخبارة واللي شاف حياته ... بس هوا توا بينهم وكأن شيء لم يكن .. امه تفترش فاللحم وتحط قدام راجلها .. اختة تنغز في خوها الصغير ويضحكو بشويش عشان بوهم ماينتبهش .. بوهم ياكل ويحكي مع زوجتة على مشروع يبي يديروه قبل الصيام  ... لمه حلوة دفا كان فاقدة ..
يقول لنفسة كيف انا بعت هذا كله .. كيف خسرته 💔
ربي اكيد عوضني وخلاني نرجع نصلح اخطائي ...
عبا الكاشيك رز وقربه من فمه ... رفع عيونه في امه ... علامات الطيبه على وجهها ..  شوية تجاعيد جنب عيونا وشفايفها تخليك تحس انها مبتسمه .. 
حنيتها على راجلها .
حط الكاشيك في فمه وشاف بوه ...
جت في باله ذكرى ..
بس ذكرى  مستقبليه ماللي عاشة بعد وقت ...
🌟🌟
شاف بوه واقف عليه قدام بابه ...
يقوله ..
الحاج خليفة : تعال معاي يا سالم استسمح من امك والعن الشيطان .. من غير رضاها حياتك مش ح تمشي قدام
سالم : امي يابوي ماتبيش ترضا .. تبيني نسيب بنت الناس بعد عشمتها .. تبيني نطلع عيل مش راجل ..
الحاج خليفة : يعني انت مش شايفها كبيرة جيتي لك، امك من طلعتك مالحوش مريضة .. خوذ بخاطرها .

🌟🌟🌟

الوقت الحاضر

يرفع عيونه في عيون امه . معش قدر يبلع اللقمة ..
وقف على حيله وقال الحمدلله ..
امه : ماكليت شي .  كنك صبيت ..

سالم :الحمدلله شبعت💔

لف وطلع قدام الباب ..

يشوف فالجيران ..

وايفكر . لو انا توا ما نحلمش .. لازم نصلح كل شي . 
مستحيل نعاود غلطتي ...

سمع هرجة فالشارع رفع عيونه  ..

سيارات عند جيرانهم
جايينهم ضيوف🤔

السيارة مارة عليا
ارجا اليوم شنو
من اللي نازله هذي
😦هذي ريم ...
هذا اول يوم شفتها فيه

توا رح ترفع عيونها فيا

وفعلا ريم رفعت عيونها ...

#ريم
هيا يا ماما جاية وراك ...

لفت وجهها
نغزت اختها
شوفي شوفي اللي قاعد غادي
عليك شخصية ..
ضحكت وصال اختها
وريم قالت : يلا حاجة نمشو بيها وقت هالكم يوم اللي قاعدينهن ..
...

:ررررريمم

😰لفت ريم وخشت دغري .

#سالم : نظرتها هذي اللي شدتني،،، اول مرة بس توا ما اثرتش فيا ..  شنو قالت لأختها .. واضح حكتلها عليا .. عزق حيطة صغيرة كان ماسكها  ووقف ....

خش جوا

سالم :: يمي .. يام

امه :تعال ياسالم ماعندي جهد انصبيلك .

خش وقعد يالاها ..

سامحيني يام
امه🤨:عليش نسامحك ، كنك الستر .. فيش تحس

سالم : مش عارف . نذكر مرة عليت صوتي عليك . سامحيني عليه .

امه : مسامح .. ماهو انا امك تعبت وربيت وكبرت وياما تحملت ..  ومازلت انتحمل عشانكم .. مازلتو تكبرو وتغلطو واتعلمو . والهل يصبرو ..
يا نلقوكم بعدين وتشيلونا وتشيلو همنا .. ولا نحن يقتلنا همكم ..

....

ريم : والله عليك طرف ولد جيرانكم . مادخليش فيك دبري كيف تخليه يشوفني ..

سميرة :هههه تضحكي انتي ياريم . دغري هكي من اول نظرة حطيتيه في راسك .
ريم : انتي عاد عارفتني . مانحط حاجة في راسي الا ونجيبها . وهو خش راسي .. وبعدين هنا سبوعين قاعدينهن تبيني نقعد مكسدة هكي وخلاص .. لازم نمشي وقتي في حاجة فيها فايدة ..
سميرة 😏: عليك هي فايدة والله . توا بكرة ندز على اختة تجي اتعرف وبعدها نمشولهم نحن . وكان طلعت في ايدك  حاجة ديريها .. بس نقولك من توا ،، راهو سالم ولد جيرانه ماعندهش على البنات . طول عمرنا جنب بعضنا عمرة مارفع عينة في بنت .
ريم : 😉رفع عينه فيا انا . هذا اكبر دليل اني لفتت نظرة ..

.
.
.
يتبع ...

الحلقة الجاية
رح ترجع عجلة الزمان ادور ..
اتحط سالم في اوقات كانت فارقة في حياته ...
من علاقته بريم
حادث خوة

عطوني رأيكم .
وصوتو لو عجبتكم