صحيت ماسة من النوم في أوضتها الفقيرة اللي مفيهاش غير سرير صغير ودولاب وترابيزة مذاكرة وقت أذان الفجر بالظبط
اتوضت وصلت الفرض والسنة ونورت اللمضة الصفرة السهراية اللي في الأباجورة عندها وقعدت تقرا قرآن لطلوع الشمس عشان تكتبلها حجة وعمرة
في نفس الوقت كان هلال نايم في سابع نومة في أوضته الضخمة اللي مليانة عفش كتير لونه بني ودهبي ومنقوش عليه تماثيل ملايكة وتابلوهات أجنبية
وسريره واااسع جدا عنده 4 عمدان خشب طويلة حواليها ستارة أو ناموسية كدا ومخداته ريش نعام ومتغطي بمفرش حرير وكان نايم على بطنه نومة الشيطان وحاضن المخدة
بعد ما ماسة خلصت قراية فضلت تدعي لنفسها ان ربنا ينجحها ويوفقها ويبعتلها الزوج الصالح اللي يصونها.. يا رب أنا ماليش غيرك يا الله ♥️ وفقني ونجحني واحفظني من كل شر وسوء أنا ووالدي وارزقني الزوج الصالح المصلح اللي يعيني على طاعتك وياخد بإيدي للجنة
وبعدين طلعت من الأوضة على المطبخ الصغير في شقتهم اللي فوق السطوح ووقفت تحضر الفطار لباباها لما يصحى من النوم عشان يفطر قبل ما ينزل
في الوقت دا كان المنبه في أوضة هلال بيرن على 6 ونص بالظبط قام بسرعة طفاه وبعدين وقف عمل رياضة ولعب ضغط وسويدي ودخل يستحمى وخرج لابس بدلة شيك جدا وغالية جدا لونها أسود كالعادة وبببيون فيه فص ألماظ
وقف قدام المراية يسرح شعره الحرييييير ويظبط شكله فراح تليفونه رن
كانت ماسة بقا خلصت الفطار اللي هو فول وجبنة قريش وخيار وعيش بلدي فطلعته على الطبلية اللي بتفطر عليها هي وباباها وبعدين خبطت على باب أوضة باباها عشان تصحيه.. اصحى يا والدي علشان الفطار
بابا قال من جوه.. ادخلي يا ماسة
دخلت عليه لقيته بيقوم من الأرض وبيطبق سجادة الصلاة فقربت منه عشان يطبطب عليها ويبوس راسها ويمسح على شعرها الدهبي الطوييييل ويقوللها.. صباح الخير يا بنتي
صباح الفل يا والدي.. يللا يا حبيبي عشان الفطار هيبرد
يللا يا بنتي
فخدها باباها وطلعوا بره عشان يفطروا
رد هلال على التليفون.. ألو أيوه يا عمر.. صباح النور أنا كويس.. خير بتتكلم بدري كدا ليه؟.. بتقول ايه؟.. ازاي دا حصل؟.. طيب طيب انا لما أجي هتشوف انا هعمل ايه
وقفل السكة في وشه وأخد موبايله ومفاتيحه وعلبة سجايره وخرج من الأوضة وهو متعصب جدا جدا
مشي في الطرقة الطويلة اللي مليانة لوح جميلة وسجاجيد حرير بسرعة وبعدين راح نازل جري على السلم الرخام الكبير اللي سوره حديد في إزاز زي كوبري تحيا مصر فلقى في وشه مامته وأخته داخلين أوضة السفرة
ماسة بقا كانت خلصت فطار جري عشان ماينفعش باباها يخلص قبلها طبعا وبعدين قامت تعملله كوباية شاي على ما يخلص أكله
وعلى ما الشاي يغلي دخلت توضب شنطتها وهدومها عشان تنزل الجامعة ولما خلصت كان باباها كمان خلص ودخل يلبس عشان شغله فصبت الشاي وخبطت ودخلتهوله الأوضة.. اتفضل يا والدي
تسلم ايدك يا ست البنات هتروحي فين النهاردة؟
هروح الجامعة أحضر 7 محاضرات وبعدين هخلص وأطلع على مدام ذكية عشان أخلص شغل هناك و ليا عندها أجرة متأخرة
انا نسيت أقولكوا ان ماسة بتشتغل خياطة بعد الضهر عشان تطلع مصاريفها عند واحدة مفترية اسمها مدام ذكية
يا بنتي انا مش قولتلك مليون مرة بلاش شغل الخياطة دا؟ اقعدي في البيت معززة مكرمة وانا متكفل بكل مصاريفك
يا والدي بعد اذنك انا عايزة أعتمد على نفسي يعني مش مسألة مصاريف ثم شغلي مع مدام ذكية شغل محترم جدا ومفيهوش اختلاط مع رجال ابدا
خلاص يابنتي ما دام دا اللي يريحك أعملي اللي انتي عايزاه
هلال يا حبيبي صباح الخير
صباح النور يا ماما عن إذنك انا عندي شغل
طب استنى يا حبيبي شق ريقك الأول
لا معلش مشغول
بصت قمر هانم لبنتها نجمة بحسرة.. يرضيكي كدا يابنتي حال اخوكي؟ دا احنا مش بنشوفه ولا بنقعد معاه غير هي قعدة الفطار دي
ردت نجمة.. معلش يا ماما أكيد وراه حاجة مهمة زي ما بيقول دا هو اللي شايل كل حاجة على كتافه من بعد بابا الله يرحمه
ربنا يهديك يا هلال يا اخويا 😥
ركب هلال عربيته وطلع عم عبده السواق بيه على الشركة وفي الطريق اتصل على مدير مكتبه رأفت واتكلم بعصبية وشخط فيه.. أيوه يا زفت ايه الكلام اللي سمعته دا ازاي المناقصة راحت مننا؟ يعني ايه ماتعرفش؟ حالا تكون في مكتبي ومعاك كل الورق اللازم.. اوصل الاقيك هناك يا اما هخرب بيتك فاهم وللا لأ؟
وبعد ما قفل السكة بصله عم عبده من المرايه.. هدي نفسك يا سعادة البيه الفلوس بتروح وتيجي المهم صحة جنابك
رد قال.. اخرس انت ماتتدخلش في اللي مالكش فيه ماسمعش صوتك تاني النهاردة
بصله عم عبده تاني بحزن ورجع ركز في طريقه
نزلت ماسة من البيت بعد باباها بنص ساعك وهي بتنهج من طول السلم بعد ما لبست عبايتها ونقابها طبعا
طول الطريق لغاية الأتوبيس اللي بتركبه كل الرجالة بتبص عليها عايزة تعرف تقسيمة جسمها من تحت العباية الواسعة واللي يقابلها من وشها يسبل لعينيها الزرقة اللي زي البحر المتكحلة كحل رباني
قالت في سرها وهي بتركب الأتوبيس.. يا رب اكفيني شر شياطين الانس
من حسن حظها لقيت كرسي فاضي جنب واحدة ست قعدت فيه على طول وحمدت ربنا
ولما وصلت عند الجامعة جت تنزل راح الأتوبيس متحرك مرة واحدة وفجأة لقيت نفسها في الشارع في حضن شاب ماتعرفوش 😱
وصل هلال مبنى الشركة الضخم اللي كله مرايات وإزاز ونزل من العربية والنضارة الشمس على وشه والسيجارة في بوقه
كل الشركة وقفت على رجل واحدة طبعا وكله هس هس أول ما دخل مستنيينه يعدي يدخل مكتبه وأول ما دخل لقى مدير مكتبه رأفت واقف مرعوب وليترعش وشكله هيعملها على روحه
راح زعق فيه وقال.. انا عايز افهم ايه اللي حصل بالظبط؟ ماهو يا اما انت حرامي يا اما نايم على ودانك
والله يا هلال بيه انا عمري ما اسرق ولا اعمل حاجة تضر الشركة دا انا قضيت عمري كله هنا
أومال ازاي المعلومات دي اتصربت من تحت ايدك؟ ازاي تخسرني صفقة بالمليارات انا عايز افهم؟
اتخض رأفت من زعيق هلال ووشه عرق خااالص وبعدين قال.. انا ماعرفش والله يا بيه المعلومات ماخرجتش من الكمبيوتر بتاعي أبدا مستحيل حد يدخل عليه غيري لكن أقسم بالله انا عمري ما اعمل كدا
مش انا اللي هعرف اذا كنت عملت كدا ولا لأ البوليس هو اللي هيعرف انا هتصل بالبوليس حالا
استنى يا هلال
بص الشاب لعيون ماسة بصة قليلة الأدب وابتسم ابتسامة شريرة راحت بعدت عنه فجأة وصرخت غصب عنها راح قالها.. بس بس ماتخافيش يا حلوة دا انا انقذتك بدل ما كنتي تحضني الأسفلت حضنتيني انا
مش انتي برضو حلوة ولا عينيكي بس هي اللي حلوة؟
بصتله بصة كلها قرف وراحت سيباه وماشية جري ناحية باب الجامعة وهي بتستغفر ربنا عشان المخلوق دا لمسها ودا كان أول راجل يحضنها في حياتها حتى باباها بطل يحضنها من بعد ما بلغت
بس اتفاجئت انه لسه ماشي وراه وقاطرها راحت مسرعة مشيتها أكتر عشان توصل باب الجامعة ومايعرفش ييجي وراها لقيته حصلها ومشي جنبها وقال.. 123987 دا رقم تليفوني كلميني في أي وقت لو عجبك حضني الحنين وأنا هستنى تليفونك يا حلوة
اتضيرت بصتله بذهول بس اتفاجئت بواحد جه وقف بسرعة بينها وبينه
بس كدا 😃 لو عجبكم البارت الأولاني ادعموني بلايك وكومنت وشير وادعوا اصحابكوا للقصة
