FLOWER BOY / °Vkook°

🍑ONE🍑

Restaurant pakhat chhungah chuan mipa khat, sam dum hlap, kir lek lek,mitmeng pawl ram mai, khaw vawh deuh vanga muffler sen awrh hnak hi, table pakhat kilin a mah chauhin a lo thu a.

Nghah nei tih hriat takin a phone, dawhkan chunga mi chu a hmet eng leh zauh thin a.

Minutes 15 vel zen zawn a thut hnu chuan mipa khat, sang lam pang, sam buang, smart zeta in thuam hian a rawn zawm ve ta a.

"Hi.. baby.... min lo nghahna a rei tawh em?" tih pah chuan lo kal thar pa chuan amah nghak a lo thu reng tu samah chuan a fawp zauh a. A ep chiahah chuan thut hmun a rem ve ta bawk a.

"Sehun, ka phone call I chhang thei lo a, chuan minutes 15 dawn laiin I tlai bawk a" lungawi zan lo tih hriat zet chuan Taehyung chu a la thu tum bar a.

"Oh baby sorry, I hriat kha, hostel a tangin duh hun hunah ka rawn chhuak thei lo tih chu" tih pah chuan Sehun chuan Taehyung hmai mam tak, tliang han chu a chul sak heuh heuh a.

Ni e, Sehun an a tawngkam thiamna tinreng hmanga thiamthu a sawi zawh chuan, Taehyung thinrimna pawh chu tui angin a lo nem leh ta a. Hlim takin an inkawm dun a, an college chanchin te nen lam chuan.

Ni dang ang lo takin Sehun chu hman tak te hian a hmanhmawh a, la kham lo hle mahse Taehyung chuan Sehun chu a hmanhmawh em a vangin a kal hmasak tir ta nge nge a.

Sehun kal liam hnu pawh chuan a mah chauh chuan a la thu reng a. Coffee sa tha ver vawr chu a in leh hlak thin a.

A rilru chuan hun liam tawh hnu te, tun hun thlengin a ngaihtuah kual neuh neuh a. Umm... Sehun, thla hnih khat liam ta a tanga a mize in thlak nasa lutuk nen lam chuan a ngaihtuah chhuak zel a. Kum thum chhung an in ngaihzawn lai khan eng tik lai pawhin a bula awm chu a thlahlel em em thin a. Hun a vawng dikin a phone call phei chu chhan loh lai a nei lo a tih theih hial ang. Khang hun lai khan a hlim a, midang a awt ngai lo. Tun ah chuan engkim a danglam tawh... Ahh... Sehun tiamin.

🍑🍑🍑🍑🍑🍑🍑🍑🍑🍑🍑🍑🍑🍑🍑

Zanriah ei kham hnu chuan Taehyung chuan mawihnai tak, zan danga a lo tih ziah thin ang chuan a nu leh pa te chu a mangtha a, a room lam pan chuan zawi zetin a chho ta hnu hnu a.

Room a luh chiah chuan khuma a phone, riang taka lo let ngat chuan a mit a la hmasa ber a. La kang vatin number pakhat chu a dial vang vang a, rei poh a ring hma chuan aw puam talh, nalh zet chuan a rawn hallo nghal zat a.

"Eng nge nita babe?" Uang thuang tih hriat zet chuan a rawn tih zawm zat bawk a.

"Choi Soobin, ngawi hmak teh a, ka rilru a hah a nia" tih hluk pahin Taehyung chu a thaw hak a.

"Hawrawp pui te a min koh chu le, Kim Taehyuunnnnnnnnnnnng...... Eng chuan nge I rilru ti hah a?"

"Ahh englo... Vawiin ah Sehun nen kan leng chhuak dun a."

"Chu chu thil mak a nia mi? Weekend a pianga I tih dan a lawm" Soobin chuan ngaihsam zet chuan a rawn ti leh a, eng snacks emaw chu a ei ngei a ni tih finfiah nan a tawng zawng te chuan a ri deuh rap rap a, uncle chips or Lays😁😁.

"Ka sawi dawn chiah a lawm le, lo la ngawi hrih teh" Taehyung chuan dawh theih loh hmel zet chuan a han ti leh hmuk a. Tunah chuan khumah, rem er awr tak chuan a lo thu mu awn deuh duai tawh a. A fapa, Kim Yeontan, chu a mal chungah chuan a bawk ran bawk a, he ui duhawm zet hi chu mi zawng zawngin Taehyunga note an ti reng thin kha a ni a. A ui enkawl tur bik pawh an maid zingah Taehyung chuan a thlang thlap a, a shampoo hman tur thlengin uluk takin a thlansak bawk.... Um... Pa ten, fate an ngaihsak ang chiahin.....