عزوزتي الحرفه

اكتشاف حقيقه

#عزوزتي_الحرفه
الحلقه :الخامسه
بقلم فاطمه سالم
........
....
نوريه فركت ايديها :ما هناك كان كل خير... يا حنه مرتك هادي سرها بنات ياودي نبي ولد اني... نبيه يظهر ويخش عليا وساندني ويفرحني ويهنيني عليك.. شن رايك ناخد من بنات مبروكه.. راهو عليك زين فيهن نص راسهن عيون... عيونهن كبار وسود وهن بيض تشبح المايه في بلحتها... ها شن قولك يا ولدي

مصباح :اممم يصير خير يصير خير.... خلي نشوفو شهر كان حملت سميره مافيش داعي لزواجه تانيه.... تي اني تزوجت ووحلت تبيني نتزوج مره تانيه يما

نوريه:اني نقيدهن ما عليكش فيهن

مصباح مسح وجهه بيده وتنهد:مش توا مزال بكري على موضوع هدا مزال

.......
سمعت مصباح قال هك وناض... طول خشيت الدار واني فرحااانه... قعدت نفكر وقلت لازم نحمل لازم خير ما يخربولي حوشي ويحرقو قلبي.... تفكرت ان اليانسون ينشط في المبايض... مشيت خشيت الكوجينه بحكم هي في نفس الجناح فا مش ح يشوفوني... طلعت خديت شكاره اليانسون وطلعت البكرج ومليته مايه ....وكمشت بيدي اليانسون كمشه هك كبرها من حراره الروح... وحطيته على النار واني نبرم في الكوجينه.... دوره سمعته فاج قعدت نجري طفيت عليه وخديت مق هك كبره وصبيته كله وشربته كله مره وحده ع رغم كان سخون... وخشيت لداري رقدت واني نخمم ولا قعد في بالي ماكله ونسيت حتى بناتي.... وفاتو الايامات على منـوال هدا...

-لـين في يوم من الايـام كنت نفض في الـدار ونكت فيـها... ومن هنا لهنا لعند جيت بحدا الروشن نلمع في المرش... شـوي نشوف فـي رجعـةه وبنتها سليمةه واقفات بحدا حوشنا استغربتهن... وشوي وجي مصباح... لما جي مصباح... التفتت هك لقيت رجعه وبنتها سليمه يصارعن... وقعدت رجعه ادف في سليمه؟؟؟.. ومشت سليمه وفي ايدها صونيه وماشيه جيهة مصباح؟... شوي لقيتها تدبل في عيوناتها وهو هايم فيها؟... ولعت فيا نار الغيره... طول لبست ملايتي وما نشوف في قدامي شي فتحت الدار على وسعها ونمشي بغل غلي... لين وصلت في باب الحوش لقيت نوريه وحميده.. وقفت شوي بدون صوت

نوريه :هههه يا نوريتي شوفي شوفي كيف صبوحه هايم فيها

حميده :ايي وهي عاجبها الجو ودروحها متحشمه😂😂

نوريه :لواه لواه تقول اول مره يشوف بنت سمحه 😏

حميده :وهو هادا لي صاير 😂

.....
بعد سمعت كلمتين هادو كأن خنجر حطوه في قلبي.... صار مصباح هدا لي يبيه؟... واني طول هلايامات رافعتهم على كفوف الراحه ونسكت ونفوت ... ونقول هي معليشي عزوز... هي معليشي في محل اختي الكبيره... وكلمه معليشي بيها حفرولي حفره خراب حوشي....اني خلاص الحوش هدا ماعاد قاعده فيه ... شوي وخش مصباح شديت ايد بنتي والتانيه نهضتها على كتفي

اني:هي يا ماما هي بنمشو لي اميمه

مصباح مستغرب :جداها في نفس حوش تمشيلها بروحها خيرك؟

اني :.... يتبع
.....
شن تتوقعو ردة فعل مصباح لما بتقوله سميره بتمشي حوش هلها🤔.... وما تخافوش ليوم في حلقه برضو