نـوفيـلا: حاره ضرغام "مكتمله"

الفصل الثاني

عاد سليم الي المنزل وملامحه يتضح عليها الغضب والضيق الشديد ، فهاجر تلك تكاد أن تُصيبه بالجنون ، اوقات يشعر بحبها الشديد له واوقات آخري يشعر بإنها لا تكِن له ذره واحده من الحب ، دلف الي غرفته بعدما القي السلام علي عائلته وجلس علي الفراش بضيق قائلاً بإرهاق

- وبعدهالك يا هاجر...؟!

دقائق واستمع الي صوت زوجه عمه وخالته زينب تنادي علي والدته قائلا

- يالا يا صفاء خلينا نلحق نخلص اللي ورانا

بالخارج قالت صفاء بهدوء : جايه اهو يا زوزو كده كده السجاد تحت من امبارح ننزل ننقعه بالمسحوق الاول ونطلع نطبخ وبعدين ننزل تاني

اومأت زينب بهدوء وجلست علي الاريكه فـ راضي وفتحي هبطوا الي الاسفل ليزورون أحد أقاربهم ، خرج سليم من غرفته وكل ذره من جسده تأمل أن يلمحها رغم غضبه الشديد منها كيف أن تخرج وتذهب دون إخباره..؟! لكنه تجاهلها نهائيا حتي لا يصب جام غضبه عليها ووقتها من الممكن ان تخشي منه او تكرهه وهذا لا يريده إطلاقاً ، تنهد بتعب وجلس علي الاريكه بجانب خالته التي قالت

- سليم يا حبيبي مالك شكلك تعبان

إبتسم بإرهاق وهو يود أن يبلغها بإن إبنتها سبب شقائه وتعبه دائما ولكنه قال بهدوء

- لسه منمتش يا زوزو

ربتت علي كتفه وقالت بحب

- ادخل ارتاح يا حبيبي شويه كدا كدا احنا نزلبن وهناخد رقيه الرغايه معانا عشان متعملكش صداع

ابتسم واومأ ايجاباً بينما قامت هي بعدما نادت عليها صفاء ليهبطوا الي الشقه السفليه

لمح سليم يوسف يدلف الي غرفته بشرود وملامحه يتضح عليها القلق ، اتجه نحو غرفه أخيه الصغيره وقال بقلق

- مالك يا يوسف..؟!

نظر اليه يوسف وقال بقلق شديد

- النتيجه احتمال كبير تظهر النهارده

زفر سليم الهواء من صدره بقوه واتجه اليه وضربه علي رأسه قائلا

-يا شيخ خضتني

نظر اليه يوسف قائلا بقلق شديد

- عاوز اجيب مجموع يدخلني كليه محترمه يا سليم انا تعبت وربنا شاهد

جلس سليم علي حافه مكتب أخيه ونظر اليه وإبتسم قائلا بضحكه صغيره

- كليه محترمه..؟! هي في كليه محترمه وكليه قليله الادب...؟!
بص يا يوسف مفيش حاجه اسمها كليه محترمه او كليه قمه زي ما بيقولوا ، المهم انت هتبقي في الكليه إيه..؟! يا تري هتبقي في القمه ولا في القاع..؟! الانسان هو اللي في ايده يكون في القمه او العكس ، انت عملت اللي عليك وربك شاهد واحنا عارفين ، تحديد مصيرك دا يا يوسف في ايد اللي خلقك هو هيحطك في المكان اللي شايفه المناسب ليك ، المكان اللي هتبقي فيه القمه فـ المجموع اللي هتجيبه سواء مجموع عالي او مجموع قليل فـ دا ملوش علاقه ان الكليه اللي هتدخلها محترمه لان كل الكليات محترمه وكل الكليات بتخرج دفعه تشتغل في مكان معين يعني عاوز تفهمني ان الدكتور والمهندس محترم وخريج المعهد مش محترم