أنين العقل

الفصل الأول

نوفيلا "أنين العقل"
بقلم ▪إيمان صلاح▪
🌼الفصل الأول🌼
.
.

تجلس على السرير وحيدة، تئن من الألم، ألم!أيشعر به غيرها؟؟
كلا، فلا يشعر أحد بآلام غيره مهما حدث.
ألم فتاك عزى عليها بشدة، لم يتساهل بتاتًا، يؤلمها منذ زمن، لكن آلامه هذه المرة أصعب مما مضى!
لم تعد تقدر على الصمود أكثر طال بها الكيل.
هتفت صارخة بعنف إلى والدتها لكي تنجيها مما هي فيه.
- يا ماما الحقيني.

سمعت سميرة صياح ابنتها البلهاء، اندفعت خائفة من حدوث مكروه لها، تاركة كل شيء مكانه، حاملة بين يدها ملعقة الطعام الكبيرة بعد خروجها من المطبخ..
- إيه ف إيه، مالك يا رقية.

وضعت رقية كف يديها على وجنتيها حيث موضع آلامها، وما زال الآلم متمكن.
- ضرسي وجعني أوي مش قادرة يا ماما

ضربتها بكف اليد على رقبتها من الخلف كما يطلق عليه (القفى)، هاتفة بتعنيف
- يعني جيباني على ملى وشي، وسايبة الأكل على النار، وف الآخر تقوليلي ضرسك، ما يولع يا بعيدة، روحي صرعتي اللي جابوني.

تركتها بمفردها.. ألمها غير مهم؟؟
انتظرت سماع كلمات حانية تطمئنها، عبارات قليلة تدخل السعادة إلى القلب الصغير الساكن بين الضلوع، تجعله يخفق من فرط السعادة الداخلة إليه، ألا تلقي كلمات سامة، حادة، تترك داخل قلبها أثر يقتلها ببطئ
كَـ سُمِ الأفاعي.
تعفو عنها، بعد إلقائها كلمة طيبة ترضيها، وعلى علم أنها لا تقصد.

- يا ماما هاتي أي مسكن أخده الله يخليكي.

هتفت سميرة بلا مبالاة وهي تقلب الحساء..
- لا مش هديكي أي حاجة من اللي هنا، كفايا خدتي برشام كتير، قولتلك روحي للدكتور إنتي اللي مش موافقة، خلاص اشربي بقى.

اندفعت إلى خارج الغرفة ذاهبة للمطبخ هاتفة بهياط مرتفع.
- قولتلك دكتور لا مش بحب الدكتووووور أي حاجة إلا الدكتور.

هتفت سميرة بهدوء منافي لصراخ رقية، على علم بأن ابنتها تخاف من الطبيب، خوف متواجد بلا سبب.
- خلاص إنتي حرة دي حياتك، وضرسك إنتي مش ضرسي أنا، واللي اعرفه أن وجع السنان مش بيتسكت عليه خالص، ف اعملي اللي إنتي عاوزاه..

حركت رقية قدميها تهز الأرض بهستيرية،  لا تحب الذهاب للأماكن المسمى بالمستشفيات..
- يوووه بقى وأنا اعمل إيه يعني، ويوم لما اضر اروح، اروح لدكتور اسنان مرة واحده؟!

انتهت سميرة من اعداد الطعام، تركته على نار هادئه كي ينضج، اقتربت من رقية هاتفة بهدوء ممزوج بحكمه صحيحة.
- يا بنتي افهمي وجع السنان غير وجع أي حاجة تانية، إنتي بقالك على الحال ده فترة كبيرة، والوجع بيزيد مش بيقل كفايا كده..
الدكتور مش هياكلك يا رقية ده هيكشف عليكي مش أكتر، وإنتي مش حمل وجع أكتر من كده، مش هتفضلي تصوتي كل شوية..
المسكنات مش بقت بتنفع معاكي خلاص، روحي يا بنتي الله يهديكي..