المتاهة | The Maze

المنظمة - The Organisation

زي ما إنت شايف، الظروف متسمحش إني أحكيلك اللي حصل بشكل واضح، ليه متسمحش؟
ببساطة عشان أنا رايح لحبل المشنقة دلوقتي..
مساء الخير، أنا ثائر..
وزي ما كل شخص ليه نصيب من إسمه، فأنا كنت بشارك في حركات المقاومة ضد استعمار المنظمة.. وبرغم تعذيبي بكل الوسائل من أول التكسير الأيوني لحد التعذيب الأبيض.. بس معترفتش بمكان مقرات المقاومة فبيهددوني بالإعدام..
مش فاهم أنا بقول إيه؟ خليني أحكيلك من الأول..
-----
إحنا دلوقتي في 2065، بعد ما الحرب العالمية التالتة قامت في 2025 وانتهت في خلال أربع أيام بعد تدمير أغلب المناطق الصالحة للحياة وموت 95% من البشر.. بمعدل 11.4 مليار إنسان وبقاء 600 مليون إنسان بس..
انتهى مفهوم الدولة، وبدأ السكان الباقيين صراع المحافظة على حياتهم من المخلفات والإشعاع النووي.. وفضلوا عايشين في الملاجئ الآمنة لحد ما واحد من العلماء القليلين اللي عاشوا إخترع فيلتر يقدر يصفي أي مادة بيتحط فيها من الإشعاع النووي.. وقدرنا نخرج تاني للأرض ونشوف السما بعينينا بعد ما كنا بنشوفها من ورا شاشات..
بدأت الحياة تاني بس بشكل جديد، بتطور أعلى مما ممكن تتخيل فالتكنولوجيا.. ومصادر الطاقة بقت شغل الإنسان، كل ما بتشتغل وتبذل مجهود أكبر كل ما بتتولد طاقة تساعد على بقاء العالم..
ومبقاش فيه حاجة إسمها حدود و دول.. العالم كله بقى كيان واحد، بيحكمه المنظمة..
-----
المنظمة بدأت بفكرة صغيرة.. هي إن لازم البشر يحافظوا على نفسهم من البقاء، ولازم يلغوا الصراعات اللي بينهم وده مش هيحصل غير لما نتوحد كلنا تحت إدارة واحدة.. مين بيحكمها؟ مين شغال فيها؟ منعرفش.. بس كل اللي نعرفه إن لما واحد نعرفه يختفي، يبقى اختاروه يبقى منهم..
الدنيا كانت تمام لحد ما بدأت المنظمة تتجسس على الأفراد، أيوة بكل بساطة وسهولة.. وكانت الحجة بتاعتهم هو إن ده لمصلحتهم وعشان يكتشفوا المشاكل قبل ما تحصل ويقدروا يمنعوها..
وبدأت شعارات تظهر زي مع المنظمة إنت في أمان، المنظمة بترعاك وبتحميك.. شعارات هدفها إن الشعب ميشكش في اللي بيعملوه..
بعدها بدأنا نلاحظ الإختفاء القسري.. بدأ بشخص واحد وافتكرنا إنه راح يشتغل معاهم، إلا إنه مع زيادة الأعداد بدأنا نشك..
لحد ما رجعلنا واحد من اللي اختفوا، ودي كانت أول مرة تحصل..
عرفنا إنه مكانش بيشتغل معاهم، وإنه كان محبوس في مكان ميعرفش مكانه وبيتجرب عليه أشنع التجارب النفسية..
حكالنا عن إزاي حطوه في أوضة كل حاجة فيها لونها أبيض لدرجة إن الأكل كان رز أبيض وبس لحد ما كان هيتجنن.. حكالنا عن إزاي شغلوا أغنية هادية وفضلوا يكرروها لمدة 5 أيام متواصلين مع إجباره إنه يفضل صاحي.. أساليب تعذيب محدش يقدر يستحملها..
-----
بدون تفاصيل كتير، بدأت حركة المقاومة.. وعشان نهرب من مراقبة المنظمة لينا بدأنا نرجع نستخدم الكتابة الورقية بعد ما كانت انقرضت.. الناس كانت معارضة ليسنا وكانوا شايفين إن المنظمة على حق، الناس عقولها إتغسلت بس إحنا مش هنكست وهنخليهم يفوقوا لمدى دكتاتورية المنظمة..
وفي آخر مظاهرة لينا إتقبض عليا، وإتعذبت، ودلوقتي أنا بكتب آخر كام كلمة في الكراسة اللي الحراس ميعرفوش عنها حاجة..
أتمني إن اللي يلاقي الكراسة دي يكمل اللي بدأناه وميسكتش أبدًا عن الظلم..
---
برافو يا ثائر، حقيقي برافو..
دي كانت كلمة رئيس المنظمة ليا، كنت مبسوط بكلامه بعد ما عرضت عليه الكراسة.. وقالي إنهم هيلاقوا طريقة يسربوا بيها الكراسة من غير ما حد يعرف..
الحقيقة يا صديقي ياللي بتقرأ إن مفيش مقاومة، المنظمة اخترعت فكرة المقاومة عشان تحفظ توازن البشر وتخليهم مقتنعين إنهم لازم يكملوا شغل.. وإنه لو حد فكر ينضم للمقاومة فهو في الحقيقة بيدخل في الخدعة بشكل تدريجي، وبيتوهم إنه بيناضل للحرية وهو بيدعم المنظمة من غير ما ياخد باله..
الكراسة خدعة من بقية خدع المنظمة عشان تكمل بنفوذها وقوتها..
أنا فخور بنفسي.
#The_Organisation