رواية " أسيرة عشقه " بقلم الكاتبه يارا زين

اعتذار

السلام عليكم ، ازيكم عاملين ايه ؛ يارب تكونوا بألف خير ..

كل سنه وانتوا طيبين وعيدكم مبارك يارب ، وان شاء الله ينعاد عليكم بالصحه والسلامه والسعاده انتوا وكل حبايبكم ..

حابه اعتذرلكم علي تأخيري في نزول الفصول الفتره اللي فاتت عارفه اني غبت كتير بس ده لظروف قهريه خارجه عن ارادتي ..

محدش يعلم انا مريت بايه الفتره اللي فاتت من تعبي النفسي وحالات الوفاه اللي حصلت لناس قرايبي وناس قريبه مني جدا وكمان والدي كان تعبان جدا وفالمستشفي وعمل عمليه ..

وانا كنت مضغوطه جدا حقيقي يعني لو كنت بنام ساعتين فاليوم فده يبقي حلو جدا وكانت بتوصل اني اطبق باليومين والتلاته من غير اكل ونوم والله العظيم لحد ماتعبت جامد ووقعت من طولي ووالله ومكنتش بقدر حتي اقف علي رجلي ..

انا دايما لما بكون فرحانه بكتب وبحب افرحكم ولما بكون تعبانه او زعلانه او مخنوقه بتجه للكتابه برضو لانها بتريحني وبخرج من حالتي وبكتب اللي حساه بس حقيقي المره دي كانت غير كل مره وكان التعب اقوي مني والوجع اصعب والخنقه اكبر بجد ..

ان حد هو روحك ونصك التاني وتوأمك كده يغيب عنك ومتبقاش عارف عنه حاجه ولا قادر توصله ولا تسمع صوته ولا تطمن عليه لشهور ده يحسسك بالعجز والموت بالبطئ ..

لما تخسر حد غالي عليك ولما تشوف حد روحك فيه تعبان اوي قدامك ومش قادر تساعده ولا عارف تعمله حاجه ده يحسسك قد ايه انت ضعيف ..

انا مش بكتب ده علشان احملكوا همي ولا حد يشفق عليا ولا اصعب علي حد ولا حتي بكتب ده علي سبيل الفضفضه انا بكتب ولو جزء بسيط من اللي كان فيا ومريت بيه علشان الناس تقدر بس ظروفي وان حقيقي الغيبه الطويله دي غصب عني وعلشان متزعلوش مني لاني مبحبش حد يزعل مني ابدا وانتوا مش اي حد انتوا حبايبي واخواتي واصحابي ..

كل واحد مننا له طاقه وله قوه معينه وقدره تحمل محدده لما بتخلص طاقته دي وقدرته بتضعف وبيستنذف طاقته بيتعب وانا الفتره دي كنت في حاله صعبه جدا ووصلت للمرحله دي بل و اسوأ كمان وكان صبري خلاص نفذ ..

انا حذفت الواتس اب والفيس والماسنجر وعطلت كل برامج النت اللي كان ممكن اي حد يتواصل معايا عن طريقها زي تويتر وانستجرام وتيليجرام وايمو ومكنتش بفتح نت نهائي ودايما موبايلي كان وضع طيران او مقفول ..

مش قادره اشوف حد مش قادره اتكلم مع حد مش قادره ارد علي حد دخلت في مرحله تعب نفسي قلبت باكتئاب شديد انا مكنتش بقدر اتحرك ولو قفت ومشيت خطوه بقع والله حتي والدتي كانت بتجيبلي الاكل هي واخويا ويقعدوا جنبي يأكلوني بالعافيه كده علشان اعرف اخد أدويتي ..

كنت دايما يا اما ساكته خالص مش بتكلم ولا برد علي حد يا اما دموعي نازله كده ..

من التفكير والضغط وتعب الاعصاب اللي كنت فيه مكنتش حقيقي فايقه لاي حاجه ، انا مش من عوايدي اني مردش علي حد ابدا يعني عمري ما اعمل كده ..

حتي لو في شخص واخده علي خاطري منه ومزعلني عمري ما اشوف رسالته مثلا او اتصاله ومردش ..

مش من عوايدي اني مردش علي حد يعني وفي ناس كتير هنا قالولي انتي مش زي حد قالولي " انتي مش زي غيرك كفايه انك بتردي علينا مش زي الناس التانيه "

كانت بتوصل التعليقات لعدد كبير جدا وادخل ارد علي الكل علي كل تعليق والله بس انا والله والله ماكنت بفتح نت علشان اشوف تعليقاتكم دي وارد علي الناس اللي باعتالي هنا ..

انا حتي كنت بنسي الموبايل انا حطاه فين ممكن اخرج من غيره اجي مش فاكره هو فين مدروش عليه لاني مش فاضيه ولا قادره ولا فيا دماغ له ..

فياريت تقدروا اللي كنت فيه ومحدش يزعل مني ؛ والله انا بحبكم كلكم وبحب افرحكم جدا وان شاء الله الفتره دي متتكررش تاني ومبعدش تاني ..

انا كتير كنت بفكر اعتزل الكتابه كنت باجي افتح الواتباد هنا واحاول اكتب مقدرش واعيط من تعبي واني مش قادره افكر ومش عارفه اجمع احداث اي حاجه ولا في تركيز خالص ومشوشه كده وحاسه اني تايهه ودماغي مش معايا ..

بعتذر بعتذر جدا جدا الي مالا نهايه بجد ..

دعواتكم ليا ربنا ييسر امري ويسهلي كل صعب ويريح قلبي ويهدي بالي ..

انا كنت ناويه انزلكم كذا فصل أول يوم العيد وللأسف حصلت عندي حالة وفاه يوم الوقفه بعد الفطار وانا انبارح تعبت جدا وكنت بموت لدرجه اني كنت بتشاهد خلاص من التعب وكمية والوجع اللي كنت فيها والله العظيم كنت بعيط وبصرخ من الوجع واهلي واخواتي كلهم جنبي ومنمتش من تلت ايام فمقدرتش اني انزل حاجه بجد ..

مع اني لسا تعبانه جدا ومش قادره افتح عيوني والله ولا اكتب ولا مركزه خالص ووالله بكتبلكم الكلام ده وانا نايمه حتبطي مش قادره اقوم اقعد واكتب ، بس فتحت علشان اعتذر منكم لان مش عايزه حد فيكم يزعل مني كلكم اخواتي وبحبكم فالله ..

ادعولي ربنا يشفيني ويخفف عني انا ووالدي ويرد الغايب ويقرب البعيد ويرحم امواتنا جميعاً ..

انا هنزل دلوقت اقتباس هو في ناس منكم قرأته أكيد لاني نزلته قبل كده الفجر وصحيت بعدها بكم ساعه بظبط فيه حاجات فاتحذف بالغلط ومنزلتوش تاني قلت لما احداثه تقرب شويه والاشخاص اللي فيه يظهروا الاول هبقي انزله ..

فانا هنزله دلوقت لانه من فصل قرب ميعاد نزوله وكده وهنزل فصل بالليل ان شاء الله علشان مديكوش ميعاد واخلف فيه انا هحاول اكتب الفصل ولو مقدرش اكمله واخلصه النهارده هنزله بكره ، بس هحاول هحاول انزله بالليل ان شاء الله فربنا يقدرني واقدر اخلصه النهارده ..

متزعلوش مني والله انا كنت ناويه اخلصها قبل رمضان هي اصلا صغيره وقلت هخلصها وانزل واحده جديده فالعيد كنت اعلنت عنها قبل كده بعد " روايه فارس الشمس " وهي مكتمله يعني مكتوبه وكده اقدر انزلها بس قلت هنزلها بعد كده وجت الظروف وكانت اقوي مني فمقدرتش بقي انزل حاجه اعذروني ..

دمتم بخير وسالمين يارب وسعداء 💙 💙