أمير في عصرنا🤴🗿|🇲🇦

🤴🏽الأمير المتحجر و النصف مشعوذة🤴🏽|4

مشات هاجر حتى بدلات حوايجها و تمات جاية جابت لاكارت ل احمد..طلع بيجاد راسو بانو ليه سيقانها كيفاش عريانين و باينين و اللباس القصير نفس الشيء مع ياقوت لي كانت واقفة فالكونتوار تتبتاسم جيهتو...خنزر فهاجر و تم غادي لعندها شدها من دراعها و زيير عليها:اش هاد اللباس؟؟
هاجر بألم:طلق منيي واش نتا حمق طلق
احمد:اش واقع هنا؟؟؟
هاجر:والو هاهيا لاكارط ديالي
بيجاد طلق منها و مشات عطاتها ليه...
احمد شدها و شاف فبيجاد:اجي تبعني نتا
خنزر فيها تاني و مشا عاطيها بضهرو تابع احمد حتى دخلو فالداخل فواحد البيت صغير..حل احمد واحد الخزانة تما صغيرة و بدا تيجبد منها حوايج الخدمة لي كانو عبارة على سروال كحل ديال الفصالة مع قاميجة بيج ب بابيونة قهوية و طابلية قهوية...
احمد:هادو حوايجك و ابتداءا من اليوم غتبقا تجي ديريكت لهنا و تبدلهوم فيه
بيجاد:فين غنحط ديالي؟
احمد:حطهوم فهاد الخزانة نيت ماكاين لي يقيسهوم
بيجاد هز الطابلية:و هادي كيفاش غندير ليها؟
احمد:تتعقدها من اللور
بيجاد مفهمش مزيان ولكن مابغاش يعييق عليه بالأسئلة يقدر يقشعو ماشي من هاد الزمن...
احمد:نخليك تبدل و فاش تخرج وقف عند الكونتوار
خرج احمد و خلا بيجاد يبدل حوايجو...

فمركز الشرطة و فلبيرو ديال واحد الضابط كانو واقفين شي ناس قدامو..علامات التوتر و الخوف باينة غير من جسدهوم و نضراتهوم ليه هو لي كان جابد ملف عامر بالتقارير بخصوص حادثة اختفاء تمثال الأمير بيجاد الإسلام الفارسي من المتحف حتى تسمع دقان فالباب و تم داخل واحد الشرطي...
الشرطي بلهفة: لقينا مكااان المشتبهة بها لوخرااا
الضابط: و أخيرا فين لقيتوه؟؟
الشرطي:تتقرا فجامعة الفلفلي
الضابط:عطيني الإسم!
الشرطي:هاجر سعدان
الضابط:غتمشي تجيبها دابا دابا نستجوبوها!!
الشرطي:اوكي شاف

نرجعو للمخبزة ليكان فيها سي بيجاد لابس الحوايج و واقف فالكونتوار...
ياقوت تتشوف فيه بإعجاب شحال واتاه الزي الرسمي ديال العمل و هاجر تتمسح فكيسان القهوة مرة عينيها فالكاس مرة فبيجاد خايفة يدير شي موصيبة حتى تم داخل حاتم اول حاجة تيديرها تيقلب بعينيه على هاجر فين كاينة بانت ليه فالكونتوار تتمسح الكيسان و بتاسم فوجهها غادي يجلس فالطبلة كيف موالف..شاف فيه بيجاد مطلع حاجب و شاف فهاجر لي حطات لي فيديها و هزات مذكرتها الصغيرة و مشات لعندو هبط عينيه لسيقانها كيف تيبانو و هي غادة عند راجل معجبوش الحال ابدا اما ياقوت كحزات حداه شوية...
ياقوت: غادي تولف الخدمة معانا خص غير شوية د الصبر ا ااه بعدا مبانتش ليا طابليتك يمكن نسا سي احمد ماعطاهاش ليك؟
بيجاد مامديهاش فهضرتها عينيه غير على دوك الجوج...
🗿🤴أمـــــيــــر فــــي عــــصـــرنا🤴🗿
للكاتبة✒️: Victoria kaelin
💜📖الجزء 22💜📖
هاجر:صباح الخير موسيو حاتم
حاتم:صباح الخير مادموزيل هاجر لباس عليك؟
هاجر:لباس حمد الله و نتا؟
حاتم بإعجاب:صباحي ديما تيدوز بيخير غير فاش تنشوف فيه وجهك ديما
هاجر حدرات راسها بحشمة و تتلعب بصباعها بتوتر:ب بصاح
حاتم:اكيد
ياقوت شافت فين تيشوف بيجاد:اه هه هاداك غير سي حاتم كليان معروف هنايا
بيجاد:و شنو طبيعة علاقتو بهاجر؟
ياقوت:ويلي اششمن طبيعة حتى نتا هيهي كليان و صافي
بيجاد شاف فيه بتفحص:نضراتو ماشي عاديين ليها
ياقوت:ه هكااك داير هو المهم عرفتي شنو اجي نوريك حفصة و خدمتك معاها
بيجاد حييد انضارو عليهوم بتخنزيرة و مشا معاها للداخل...
خدات هاجر طلب حاتم و مشات وجداتو ليه و داتو حتى حطاتو ليه و رجعات لبلاصتها فالكونتوار...
فلداخل كانت واقفة حفصة مرأة أربعينية غليضة عاقدة زيف حياتي و محزمة بطابلية و مطلعة كمام بدلة عملها...
حفصة:قهراتني العافية ديال هاد الفران قلت ل سي احمد يبدلو مابغاش
بيجاد تيشوف فالفران تيبان ليه من الحديد عكس الفران الطيني لي كان فزمانو...
بيجاد:غطيبي فيه شي حاجة دابا؟
حفصة:ايه عاد قاديت جوج طاوات د الكومير خصهوم يطيبو و يتحطو سخان للكليان
بيجاد:كومير؟؟
ياقوت:زعمة لباگيت متتعرفوش؟
بيجاد:كنت سمعت بيه من قبل المهم اري نطييبو ليك
حفصة:هاهوما الطاوات هنا
هز بيجاد الطاوات قداش بخفة و حلات ليه ياقوت بيبان الفران غير بواحد العود د الخشب حيت سخون بزاف...
لاح فيه بيجاد الطاوات و سدو غير بيدو ياقوت و حفصة تصدمو حيت الحرارة طالعة و هو سدو غير بيديه؟؟
بيجاد:شحال د الوقت خاصو باش يطيب؟؟
حفصة:مكاملاش نص ساعة فاش نشوفو طاب غنعييط عليك
بيجاد خرج من تما و هي تبان ليه هاجر واقفة و حاتم سالا فطورو جاي يخلصها..خنزر فيه و جا واقف حداها...
هاجر شافت فيه بابتسامة:كنتي فالداخل دويتي مع حفصة؟
بيجاد مخنزر:اه شفت داكشي كيف داير
هاجر:مالك مخنزر هاكا؟ ياك لباس؟
حاتم وقف عليها متجاهل بيجاد:شكرا على القهوة البنينة
حط ليها الفلوس و مشا مخلي بيجاد متبعو بتخنزيرة...
خدات الفلوس و مشات ل لاكيس كيف العادة ديما تيشيط ليها شي مبلغ لراسها..خشاتهوم فجيب طابليتها و بيجاد باقي متبع ليه دوك النضرات الرصاصية من ورا زاج المخبزة حتى غبر من قدامو...
هاجر:اجي نوريك كيفاش تنديرو فهاد اللعيبة لي تيكونو فيها الفلوس هي عبارة على خزينة فهمتيني؟
بيجاد قرب منها:قولي ليا مال داك حاتم ولا منعرف؟؟
هاجر بصدمة:ب باش ك كيفاش عرفتي سميتو؟؟
بيجاد:صاحبتك قالتها ليا!!
هاجر ممصدقاش لا ميمكنش صاحبتها تغدر بيها و تعاود لواحد الشخص لي قالت ليها انه ولد عمها على امور بحال هكاك عليها اكيد ميمكنش حيت اولا خصوصية و تانيا راه من العائلة و غيجبد ليها المشاكل...
🗿🤴أمـــــيــــر فــــي عــــصـــرنا🤴🗿
للكاتبة✒️: Victoria kaelin
💜📖الجزء 23💜📖
بيجاد:مالك ساكتة و من الفوق متوترة!!
هاجر:مابيني و بينو والو!!
بيجاد:الطريقة باش تيشوف فيك معاجبانيش
هاجر:و صافي تيبقا هدا رأيك الخاص خلينا من هادشي و اجي تعلم للخدمة
ياقوت رجعات لعندهوم:بيجاد تكلم لحفصة بغاتك
بيجاد:واخا
بيجاد مشا و هاجر جرات ياقوت:اجي نتي ياكما قلتي لبيجاد عليا انا و حاتم؟؟
ياقوت:اويلي ا صاحبتي مالي هبيلة شفتو غير كيفاش تيحنزز فيكوم و قلت ليه بلي هداك حاتم كليان معروف عندنا و صافي
هاجر عاد رتاحت:ااه صافي راك عارفة ولد عمي و غيجبد ليا المشاكل الى مشا حتى وصلها للعائلة
ياقوت:ويلي متحتاجيش توصي اصاحبتي
هاجر:صافي واخا
بيجاد رجع لعندهوم هاز الطاوات بعدما حييد الكومير من الفران...
هاجر:اويليي لبس القفازات ديال الفرن ولا غتحرق فيديك
بيجاد:هادشي والو مولف ماكتر
هاجر:ا اااه نسيت كاع هيهي
ياقوت مشات لعندو:صبر نوريك فين تستفو
تحنات حتى حلات الزاج:هنا
هاجر:غير صبر نستفو انا و شوفني كيف تندير
مشات جابت قفازات الفرن من الداخل و رجعات بدات تتستف فالكومير سالات الطاوة الاولى و وقفات...
هاجر:قاد نتا الثانية
بيجاد:راني قلت ليك من قبل متآمريش فيا
هاجر:اف بدينا تاني
حط بيجاد الطاوة الثانية و ستف غير بيدو بحال كيف دارت هاجر نيت...
هاجر:مزيااان صافي تنسدوه هاكا و نخليوهوم تما حتى يجي شي كليان و يطلبهوم تنحلو تاني الزاج و نهزوهوم بهاد الملقط نحطو فهاد الكيس الورقي هنايا و نحطو فبلاستيكة هنايا و صافي تنعطيو الطلبية
بيجاد:صافي فهمت
ياقوت دخلات للداخل و رجعات:هادي الطابلية ديالك نسيتيها يمكن فلبيت
بيجاد شاف فهاجر:ديالاش هاديك؟
هاجر مشات شداتها من عندها: ا ااه شكرا ا ياقوت انا نتكلف بهادشي
ياقوت واقفة باستغراب و هاجر قربات من بيجاد...
هاجر:صبر نقادها ليك
حلات الطابلية و ضوراتها على خصر بيجاد و عقداتها من اللور...
هاجر:صافي هكا
ياقوت مستغربة:واقيلة ماشي بالضرورة تقاديها ليه ولا لا؟
هاجر:ه ااه غير هو حيت عاد جديد و كدا قلت نعلمو كلشي هيهي
بيجاد تيشوف فطابلييتو و تيقيصها بيديه يمكن هاد قطعة الثوب مديورة باش تحافظ على حوايجو...
فجأة تحل باب المخبزة و تمو داخلين جوج رجال لابسين حوايج البوليس..استغربو البنات بجوج اش غيديرو البوليس هنا؟؟؟
الشرطي:شكون فيكوم هاجر سعدان؟؟
هاجر قفزات: انا ا الشاف!!
الشرطي:تفضلي معانا
هاجر:علاش ا الشاف؟؟
الشرطي: نتي مشتبه بيك فقضية سرقة تمثال الأمير بيجاد الإسلام الفارسي....