أمــــيــــر فــــي عــــصــــرنا🤴🗿|🇲🇦

🤴🏽الأمير المتحجر و النصف مشعوذة🤴🏽|5

🌞فالغد ليه🌞
داز النهار بحال لبارح بين هاجر و بيجاد واحد متيدوي مع لاخور..نفس الشيء فالخدمة حتى سالاوها و رجعو ل الدار...
هاجر مشات للكوزينة بدات تتصوب فالغدا و بيجاد جلس فالصالون تيتفرج..صوبات هاجر مقيلة ديال الكفتة و البيض مع خبز ديال الحانوت و حطاتهوم فوق الطبلة مع كيسان ديال الما..قطعات الخبز و حطاتو قدام بيجاد و بدات تاكل زعمة واخا مخاصمين ولكن منبقاوش بالجوع🤣🤣..ناض حتى غسل يديه و جلس تياكل و واحد معفر على لاخور حتى كملو و جمعات هاجر الطبلة..هزات تيليفونها و السوارت و خرجات تدق على ياقوت...
سمعات ياقوت الدقان و مشات حلات لقاتها صاحبتها دخلاتها و جلسو فصالونها الصغير...
ياقوت:واش باقي مخاصمين نتي وياه؟؟
هاجر ربعات يديها:و شنو؟؟
ياقوت:راه هادي ماشي حالة حمدي الله مفرشخكش اصاحبتي
هاجر:تيبان ليا ماشي من النوع لي تيضرب العيالات
ياقوت:بيني و بينك حتى هاداك لي متيضربش العيالات غيفوت فيك شي دقة وا كنتو مشاادين بحالا تتحابووو
هاجر:واصافي ا ياقوت حتى نتي المهم جيت عندك بغيتك تسلفيني شي كسوة زوينة حيت حاتم عرضني لواحد الحفل غنائي فواحد الفندق و نتي عارفاني معنديش بحال هاد الحوايج دهاد المناسبات
ياقوت:وايليييييي و ماقلتييي ليا والووو حتال دابااا؟؟؟
هاجر:و علاه خليتيني؟؟و نتي سايرة غير مالكوم مخاصمين مالكوم هكا
ياقوت ناضت:اجي اجي للماريو عندي فيه شي كسيوات جابتهوم ليا بنت خالتي لي فالطاليان باقي تيشعلو
هاجر:وريني اختي
دخلو لبيت ياقوت و حلات هاد الأخيرة الماريو ديالها كان منظم و ريحة عطر انثوي تتعطعط من الحوايج عضات هاجر فصبعها حاسة بشوية د تأنيب الضمير من جيهة الماريو ديالها لي مكورة فيه الحوايج من عام الفيل...
ياقوت جبدات وحدة فالخضر:اش بان ليك فهادي
هاجر:ويلي مشعشعععة اصاحبتي
ياقوت جبدات وحدة خرى:اممم و هادي؟؟
هاجر:لا لا داك ستايل متيعجبنيش و اصلا مغيجيش معايا
ياقوت جبدات وحدة فالكوير:و هادي؟؟
هاجر:اممم اري كاع نجرب
مداتها ليها ياقوت و جرباتها تماك قدامها...
ياقوت:جاتك واعرة غير هو خصك متلبسيش معاها كولون
هاجر:زعمة بلا والو؟
ياقوت:وايييه غتجي مطرطقة
هاجر:تتبان بحال شي مونطو
ياقوت:واراه ستااايل هاداااك
هاجر:بصراحة زوينة و عجباتني
ياقوت جبدات واحد الطالون فالبيج:هدا غيجي معاها
هاجر:ياختي تطهلاي فيا فبحال هادشي
ياقوت:ايوا نتي لي تتخسري فلوسك فالماكلة و الضوران انا ياختي تنخسرهوم فهادشي
هاجر:ولاهيلا صافي غنديهوم هوما
ياقوت:هههه ناري اصگعة فرحت ليك
هاجر:ا تي بغيت غير نزها قال حفل غنائي قلت عالله يكون فيه لي يزهينا
ياقوت:اه عندك الحق
هاجر:يالاه نخليك غنمشي ندير شي تمارين عندي مصدعيني فراسي و نوجد لهادشي
ياقوت:واخاا بسلامة
خرجات هاجر من عندها و رجعات لدارها...
🗿🤴أمـــــيــــر فــــي عــــصـــرنا🤴🗿
للكاتبة✒️: Victoria kaelin
💜📖الجزء 32💜📖
وصلات العشية و لقات هاجر مسالية تمارينها اما بيجاد حل الشرجم تيتمنضر فالناس لي غاديين جايين...
شافت فالساعة بانت ليها 8 دخلات لدوش حتى دوشات بالخف و خرجات تتوجد فالمايكاب ديالها فبيتها..بقات تقاد فيه على خاطرها نشفات شعرها و دوزات عليه بسشوار بشوية باش ينشف و يتسرح شوية لبسات ملابسها الداخلية و لبسات الكسوة و تحت منها واحد الشورط قدها نيت فالطول لبسات الطالون و جمعات شعرها كودشوفال رضات الگصة على جنب و بدات تشوف فمرايتها بابتسامة هزات عطرها و رشاتو صافي كلشي هو هاداك هزات صاكها و يالاه غتحط فيه تيليفونها و هي تفكر الموصيبة لي عندها فالصالون...
هزات التيلي دغيا و صونات على ياقوت...
ياقوت:الو ياكما خاصاك شي حاجة؟؟
هاجر:لا لا غير هو بغيت..ااه بيجاد غنخليه بوحدو فالدار و غيقنط اش بان ليك تجي لعندو؟؟
ياقوت:وايلي زعمة هانية؟؟
هاجر:ويلي عادي راك صاحبتي دوزي دوزي
ياقوت:واخاا هاني جاية
لاحت هاجر تيليفونها فالصاك و دارت فيه بسطامها شافت فالساعة لقاتها قربات 9 و هي تخرج بخطوات متسارعة..سمع بيجاد تقرقيب طالونها و طلع راسو غير شافها دايزة بديك الكسوة و سيقانها كيف عريانين ناض ليها نوضة وحدة و شدها من دراعها...
بيجاد:فين غادية بهااد اللباااس؟؟؟؟
هاجر تتنتر يديها:بعد منيي اش بغيتييي
بيجاد:تنآمرك تقولي ليااا فين غااادية؟؟
هاجر:خاارجة و ماشغلكش فيااا خليينيي
بيجاد جرها من كتافها لعندو بقوة:مغتخرجيييش بهاد اللبااااس سمعتييي!!!
هاجر عصبها:واش نتا حمق راك غير جالس عندي حتى ترجع لزمنك راك بديتي تدخل فخصوصيااتي لبارح حاتم و دابا لبااسي خليني عليك ا بيجاد و عيواض تقابل فيا شوف شي طريقة ترجع بيها لزمنك!!!!
نترات يديها بقوة و خرجات هابطة مع الدروج...
ياقوت خرجات من دارها مستغربة و مشات بغات تدخل لدار هاجر لقات بيجاد واقف معصب...
ياقوت: ب بيجاد؟
بيجاد دخل جلس و هي دخلات سدات الباب..جلسات فالصالون و هو يطلع فيها راسو باستغراب شتدير هادي هنا و بوحدهوم؟...
ياقوت:ه هاجر قالت ليا نجلس معاك
بيجاد:و علاش ا انسة غتجلسي معايا؟؟
ياقوت:حيت غتقنط هادشي كيف قالت هي
بيجاد:ديري لي عجبك
فنفس الوقت كانت هاجر غادية على رجليها لحدا المخبزة تتقرقب بطالونها بعصبية و حابسة البكية قلبها عامر من البارح اعدى حاجة عندها تحس بالحگرة و خصوصا و هي فهاد المدينة بوحدها هو الستايل ديال حياتو لا علاقة بستايل حياتها و ممنحقوش يتدخل فيه علاش مابغاش يفهم هادشي...بقات غادة حتى بانت ليها طونوبيلة حاتم مبلاصية حدا المخبزة..مشات عندو تتحاول تصطنع الابتسامة اما هي خاطرها قلبو بيجاد...
هاجر:سلاام هاني جيت
حاتم حل الباب و خرج لعندها و نضراتو الإعجابية مختارقينها...
حاتم:جميلة كيف عادتك
هاجر:شكرا موسيو
حاتم:قولي ليا غير حاتم ههه
هاجر:واخا حاتم
حل ليها باب الطونوبيل و ركبات...
ركب حاتم و ديماراو من تما:تنتمنى يعجبك الحفل
هاجر:تيعجبوني الحفلات بزااف
حاتم:حتى انا
هاجر:هه ااه مزيان
بقاو تيدويو مرة مرة و الطونوبيلة غادة حتى وقفها حاتم قدام واحد الفندق فوسط المدينة من شكلو باين غير ديال الطبقات الغنية ماشي دوك الفنادق العادية...