ســـارة فــي بـــلاد العـــجـــائـــب🎡🍭|🇲🇦

🌋أعــــجــــوبــــة البــــركــــانــــي🌋|1

فواحد من الشوارع المغربية كانت خارجة بنت شابة من الخدمة ديالها لابسة ملابس عادية و صاك ديال الكتف..غادة خاشية يديها فجيوبها و الشمس ضاربة فعينيها العسليين مبيينة لونهوم الجميل حتى دخلات مع واحد الدريبة و هو يبان ليها واحد الگاراج تيبيع الأشياء المستعملة أولا لافيراي اولا الجوطية دخلات لعندو بحكم انها معندهاش امكانيات باش تبقا تقدا من الجديد ديما و هنا تتلقا بعد المرات شي هميزات واعرين...لقات لي تيبيع عاد مغدي و تيتفرج فالتلفزة حتى بانت ليه كليانة من كليانو المعروفين...

الرجل:سارة؟ مرحبا دخلات سلعة جديدة غير لبارح

سارة تتقلب بعينيها:كاينين حوايج بلاطاي M؟

الرجل:مقلبتش هانتي غير لبارح جات لكوليا

سارة قربات تتقيص واخا الحاجة معندهاش فيها سوق ولكن فضولها تيخليها تلمس اي حاجة...

سارة هازة واحد التيشورت:عجبني هدا شحال ثمنو؟

الرجل:اودي نخليه ليك غير ب 10دراهم

سارة خرجات فيه عينيها:اوييلي مغايلاياش؟؟شوف التوب ديالو كيف خفيف راه غنلبسو غير فالدار غناخدو غير ب 5دراهم مكاين ما ولكن

الرجل:واخا ا لالة مكاين غير خاطرك

شدات داك التيشورت لاحتو فوق كتفها و مشات تكمل تقلابها لقاتو جاب شي روايح بدات تشم فيهوم غير من راس القرعة شي عجبها شي دوخها و فلخر حطاتهوم كاملين..حتى بانت ليها واحد المراية فوق واحد الطبلة كانت مراية ديال اليد و تصميمها قديييم مشات ليها و هزاتها...

سارة:بشحال هاد المراية؟؟

الرجل شاف فيها و رجع شاف فالتلفزة:اودي غير ديري ليها الثمن لي بغيتي

سارة:اممم تيعجبوني الحويجات القدام بحال هكا غنحطها غير فبيتي اش بان ليك ب ستين ريال؟

الرجل:الله يربح

سارة باقي تتقلب بعينيها مسخاتش من الجوطية:تيبان ليا غنديها غير هي و التيشورت مبانتش ليا شي حاجة خرى

الرجل:حتال الشهر الجاي عاد غتدخل سلعة جديدة

سارة:حتال تما و ربي تما جمعهوم ليا فميكة

مداتهوم ليه دارهوم فميكة جبدات بصطامها حتى خلصاتو و خرجات..بقات غادة حتى دخلات مع درب اخور حتى وقفات قدام واحد الدار كبييرة و عالية..حلات باب الگرياج بالساروت و الباب د الحديد من الداخل و طلعات مع الدروج كانت الدار ديال الكرايين حتى وصلات لطابق الثالث لي فيه دارهوم..حلات الباب و سدات عليها...

كانت الدار خاوية كيف العادة فهاد الوقيتة تتكون مها خدامة التصميم كان جد بسيط جليسة ديال سدادر صغيرة و قبالتها بوطاجي د الكوزينة شاد الحيط كولو و تلاجة..فران الغاز..و تلفزة صغيرة محطوطة فوق فيترينة د الماعن من عهد الاستعمار..حييدات صباطها و لبسات صندلة الميكة و دخلات لبيتها لي كان متكون من كاتري فوقو بونجة بكوفرلي عادي و ماريو د الخشب واحد الباب ديالو مهرس و جوج لخرين خاسرين متيتسدوش حداه طبلة مربعة بالكرسي ديال البلاستيك الابيض فوقها كانت علبة حديدية قديمة كانت فيها شوكولاتة گالاكسي من قبل و دابا ولات علبة المجوهرات و حاجات خرى ممعروفش كاع شنو هي و حداها كان مكدس ماكياج ديال فراشات السوق كانت لبقاتو لوجهها قبل متخرج...
حطات المرايا فوق ديك الطبلة و بدلات حوايجها ب بيجامة ديال الدار باهتة بالتصبين..خرجات حتى طييبات ليها ليها واحد المقلة ديال البيض مع بريريد د اتاي و شعلات التلفزة تتفرج فواحد المسلسل فدوزيم..بقات على تغميسة و رشفة حتى كملات و غسلات الميعنات..دخلات لبيتها و هي تشوف فالمرايا و بحالا شي حاجة تتجذبها ليها قربات منها حتى هزاتها و بدات تقاد خصلات لگصيصة ديالها من انعكاسها فيها حتى بدات تحسس شي حاجة كاينة فضهر المرايا..قلباتها لقات واحد الكتبة صغيرة منقوشة فيها...
سارة باستغراب:شهادشي مكتوب؟؟(تتهجا) بلاد العجائب يا بلاد العجائب انا مالكة المرآة أريد الذهاب...
غير كملات نطق الجملة بدات تتحس بالمرايا بحالا تتڨيبري فيديها تصدمات و هي تهز المرايا فالهوا و خرج منها واحد الضو مشععع و رييح قووية تتجر فجسم ساارة لي ضرباتها بغوتة حتى تمتاصات فداخل المرايا لي بدورها ختافات معاها...