نوفيلا حظابط سوسو للكاتبة نداء علي كامله

🍂الفصل الاول🍂

الفصل الاول
بسم الله الرحمن الرحيم
لا اله الا انت سبحانك اني كنت من الظالمين
🔸🔸🔸🔸🔸🔸🔸🔸
حظابط سوسو.... نداء علي

في بيت ثائر وقمر.. واقفة بتدرب بناتها التؤام علي حركات رياضية والبنات بيقلدوها.. وثائر شايل ابنه الصغير فارس.. وبيضحك علي حركات بناته الطفولية
ثائر : عاش يابطل انت وهو ايه الحلاوة دي
قمر بجدية : بس يا ثائر.. ابعد عنهم خلينا نكمل التدريب
ثائر ادالها الولد الصغير وشال البنات بايديه الاتنين واتكلم بهدوء وهو بيقول : انا كلها ساعتين وماشي عندنا حالة طوارئ في القسم واحتمال اتأخر او ابات.. اقعدي خليني اشبع منكم شوية
قمر بخوف : ايه اشبع منكم دي
ثائر بضحك : مقصدش حاجة والله انا اقصد انكم وحشني ومبلحقش اقعد معاكم.. وبعدين جمدي قلبك شوية.. اومال اخت حضرة الظابط الخطير ساجدة عبدالحق ازاي
قمر بدلال : ومالها ساجدة بقي اه هي مسترجلة شوية بس زي القمر والعرسان بيترموا تحت رجليها
ثائر : دي مفروض تتجوز جون سينا
قمر : ثائر.. هزعل منك متتريقش عليها دي حبيبتي
ثائر : لا والله مش بتريق ساجدة فعلا بنت مجتهدة واثبتت انها احسن من رجالة كتير معانا في الشرطة.. وبعدين مش مفروض كان في عريس جيلها من يومين حصل ايه
قمر : محصلش حاجة رفضت كالعادة وجدي في الصعيد زعل جدا وقلب علينا الدنيا لأن العريس يبقي ابن عم بابا
ثائر : مش فاهم انتوا مستعجلين علي ايه البنت صغيرة لسه ومستقبلها محتاج تركيز
قمر : هي بتقول كده بس بابا كلمة بتوديه وكلمة بتجيبه وخايف من جدي واهلنا في سوهاج.. جدي مش قادر ينسي ان ابويا رفض يتجوز علي ماما علشان يخلف ولد وشايف ان ساجدة حتي لو بقت وزير الداخلية فهي في الأخر بنت..
ثائر : ان شاء الله انا بس اخلص من ضغط الشغل بتاعنا واروح لعمي واكلمه
قمر بسعادة : ياريت والله.. هو بيحبك وهيقتنع بكلامك
ثائر : طيب تعالي بقي اقعدي جنبي شوية
قمر بخجل : حاضر

في بيت صفوان جد ساجدة بسوهاج.. قاعد واولاده واقفين حواليه بيحاولوا يهدوه وهو متعصب جدا وبيتكلم بغضب وبيقول
الله في سماه لو عبدالحج ما استرجل وجوز بته اخر الشهر لا يبجي ولدي ولا اعرفه.. بكفياه عصاني ورفض يتجوز لجل ما يجيب الواد وجالي مجدرش اكسر جلب مرتي.. لكن لما يسيب بته ماشية علي كيفها وترفض تتجوز ابن عمها يبجي خلاص عيارها فلتان ولازم ابوها يأدبها
عرفه ابنه الأصغر : صلي عالنبي يابوى وطول بالك الجواز مش بالغصب
صفوان بغضب : وانا جولت كلمتي اخوك لو معمليش حساب يبجي مليش ولاد ياعرفه
قاسم : كلامك صوح يابوي.. المرة ام مهران بعد ما ساجدة رفضت تتجوزه طايحه في البلد تجول ان ولدها هو اللي رفض بنتنا وانها عفشة ولسانها متبري منيها.. عبدالحج لازمن يوجف لبته ومرته بلاها مرجعة وحديت ماسخ من ميته الحريم عيمشوا كلامهم عالرجالة

وفي بيت بطلتنا
ساجدة واقفه علي السفرة بتفطر بسرعة وهي مستعجلة علشان تلحق تروح شغلها
امها اتكلمت بهدوء وهي بتقول : اقعدي افطري علي مهلك ياقلبي الدنيا مش هتطير
ساجدة : الالتزام بالمواعيد اساس النجاح يا حبوبتي.. ولا عايزاهم يقولوا اصلها بنت ومش اد شغل الشرطة ويعملوني شغلانتهم
الحاج عبد الحق : يلا يابتي اتكلي عالله اهم شئ شغلك ياحضرة الظابط
ساجدة : حبيبي انت ياحاج.. يلا سلامو عليكم يدوب الحق وقتي
طلعت تجري وقبل ما توصل لعربيتها خبطت في سيف اللي لحقها قبل ما تقع وبصلها بغيظ وقالها بكل برود : مش تفتحي ياسوسو.. مفروض ظباط الشرطة لماحين وعندهم سرعة بديهة
ساجدة بغضب : بديهة دي تبقي خالتك
سيف بهدوء : لمي نفسك بدل ما المك
ساجدة وهي بتشد ايدها من ايدها بعنف : اوعي يا بني من طريقي مش ناقصة قرف عالصبح
سيف بصلها بتحدي وهو بيقول : انا عندي مشوار مهم ومستعجل بس خليكي فاكرة اني مبسمحش لحد يطول لسانه عليا.. سلام ياسوسو
ساجدة : ابو شكلك ده انت بااارد
استغفر الله العظيم هتأخر عالشغل بسبب واحد حمار زي ده

ساجدة وصلت قسم الشرطة وفي لحظة كانت ماشية بثبات وثقة والكل بيبصلها باحترام واعجاب.. بتحاول تظهر للكل انها قوية اقوي من رجالة الكتير.. بتهمس لنفسها وبتقول
انتي قوية ياساجدة انتي بنت بس بمية راجل.. امشي وانتي رافعه راسك اوعي تسمحي لحد يقلل من قيمتك او مكانتك

سيف وصل قدام عمارة في مكان هادي نزل من عربيته وطلع سلم العمارة.. وصل عند الدور الثاني ورن الجرس وانتظر دقيقة لحد ما الباب اتفتح
طلعله طفل صغير عمره خمس سنين اول ماشاف سيف اترمي في حضنه بسعادة وهو بيقول
بابا حبيبي.. اتأخرت اوي يابابا
سيف : عيون بابا حقك عليا.. جاهز يابطل
مروان : جاهز.. يلا بينا

انتهي البارت الأول.. توقعاتكم للاحداث 🤔🤔