نوفيلا حظابط سوسو للكاتبة نداء علي كامله

🍂الفصل الثاني🍂

بسم الله الرحمن الرحيم
لا اله الا انت سبحانك اني كنت من الظالمين
الفصل الثاني
#حظابط_سوسو.. نداء علي
🔸🔸🔸🔸🔸🔸🔸🔸

في غرفة العمليات الخاصة معاذ واقف قدام مجموعته بيوزع المهام علي اعضاء الفريق بتاعه
هشام اتكلم وقاله : محتاجين قناص كمان مع ساجدة المرة دي العملية خطيرة ومفيش مجال لأي اخطاء
معاذ : انا فعلا طلبت من سيادة اللوا دعم وهو وعدني انه هيبعتلنا قناص من امهر الظباط في الداخلية
ساجدة : حضرتك انا مش محتاجة حد معايا
معاذ : احنا واثقين فيكي يا ساجدة وفي كفائتك
بس زي ما هشام قال العملية المرة دي مختلفة وحساسة مفيش مجال للتراخي او الاهمال
كل واحد فيكم يلتزم بالتعليمات بالحرف والا هيعرض نفسه والفريق كله للخطر

الاجتماع انتهي والكل خرج بس معاذ طلب من ساجدة انها تنتظر
معاذ : زي ما سمعتيني من شوية العملية خطيرة جدا مفيهاش مجال لاظهار القوة ولا التحدي بينك وبين زمايلك
ساجدة : حاضر يافندم
معاذ : هنشوف يا حضرة الظابط ياريت ثقتي فيكي تكوني ادها ومتسمحيش لحد يستفزك او يضايقك
ساجدة بابتسامة خفيفة : حاضر يافندم بأذن الله مش هخيب ظنك فيا

في بيت الحاج عبدالحق ماسك موبايله وبيسمع لكلام والده وهو ساكت مش قادر يرد ووالده مش مديله فرصه للكلام
صفوان بحزم وقسوة : اسمع ياولدي اني كلامي بجوله مرة واحدة ولو هتعصاني لا انتي ولدي ولا اعرفك
عبدالحق بترجي : يابوي انت كلامك سيف علي رجبتي بس طول بالك الكلام اخد وعطى
صفوان : مبديش ملاوعة وحديت ماسخ عالفاضي جدامك شهرين لو بتك مجلهاش عدلها من النهاردة لنهاية الشهرين دول هتلاجيني فوج راسك اني وولد عمك لجل نتمم جوازه من ساجدة ولو انت ماجدرش تنفذ كلمتك عليها اني هجدر
عبدالحق : يابوي الله يخليك بس هملني يومين بدبر الأحوال واشوف هترسى علي ايه
صفوان : اني خلصت كلامي وهشوف يا ابو البنات عتعصاني ولا هتطلع راجل وليه كلمة علي اهل بيته

في بيت سيف والدته قاعدة تبص للساعه منتظراه يرجع هي عارفة ان النهاردة سنوية حكيم وان سيف بيقضي اليوم مع ابنه وباقي اليوم بيقضيه في المقابر
ابوها رجع من الجامع لقاها قاعدة وسرحانة اتكلم بحنية وقال
السلام عليكم يا أم سيف.. قاعدة كده ليه يابنتي
رقية بحزن : سيف يابابا.. هو فيه غيره اللي تعبني وواجع قلبي
رد عليها سيف اللي دخل وسمعها بتتكلم عنه وقالها بمرح
سلامة قلبك ياقمر ماله بس سيف عمل ايه
رقية بهدوء : هتعمل ايه اكتر من كده.. اللي في سنك اتجوز وخلفوا من سنين وانت مش راضي تريحني انا وجدك قبل ما نموت
سيف بغضب : قلتلك مليون مرة بلاش سيرة الموت
رقية بقوة : ليه خايف علينا اوي لو بتحبنا وتخاف علينا متتعبش قلوبنا وتقلقنا عليك فيها ايه لما تتجوز وربنا يهديك ويبقالك بيت وعيلة واطفال
يملوا علينا البيت.. هيحصل ايه لما تريح قلبي بدل النار اللي جوايا دي يابني
سيف بمهادنة : حاضر ربنا ييسر الحال.. بعد اذنكم انا راجع تعبان وعاوز ارتاح