نوفيلا حظابط سوسو للكاتبة نداء علي كامله

🍂الفصل السادس🍂

بسم الله الرحمن الرحيم
لا اله الا انت سبحانك اني كنت من الظالمين
الفصل السادس
حظابط سوسو.. نداء علي
🔸🔸🔸🔸🔸🔸🔸🔸🔸🔸🔸🔸🔸
في قسم الشرطة جوة الزنزانة مصطفي نايم عالأرض بيبكي وهو حاسس بالخوف من اللي جاي بقاله ٤ ايام محبوس ومفيش حد سأل عنه
مش مصدق انه محبوس في قضية زي دي
بيكلم نفسه بندم وهو بيقول : جدك واعمامك هيعملوا ايه لما يعرفوا يامصطفي.. جميلة اللي كنت هتموت عليها وتتجوزها هتقدر ترفع عينك وتبصلها تاني ولا هي اصلا هترضى تبص في وشك
انتبه علي باب الحجز بيتفتح والعسكري بينده اسمه بقوة وبيقول : مصطفي الرفاعي.. قوم معايا حضرة الظابط عاوزك

ساجدة ماشية وسيف بيحاول يلحقها بس هي غضبها مانعها تسمع فجأة لقته شايلها علي كتفه بخفة وحطها جوة العربيه بالعافية
ساجدة بجنون : نزلني يا سيف وروح فرح اختك احسنلك
سيف بسخرية : ايه هتضربيني
ساجدة : اه هضربك وانت عارف اني اقدر
سيف قرب منها جدا وبصلها بهدوء وقالها : انا أسف.. انا فعلا كنت بهزر قدام اصحابي وبقول نفس الكلام اللي بقوله قدامك.. يعني مكنتش بتريق عليكي ولا حاجة
ساجدة : مش من حقك انت ولا هما تتكلموا عني ولا تتريقوا عليا.. مين سمحلك تخليني ضحكة لاصحابك تتسلوا بيها وتضيعوا وقتكم عليا
انا بكرهك يا سيف فااااهم بكرهك وبحتقرك ومش عاوز اشوف وشك مرة تانية
سيف بحزن : تمام.. انا مش هناقشك لاني فعلا غلطان بس اعتقد اني سيبتك تاخدي حقك ومدخلتش
ساجدة : ولو كنت اتدخلت كنت وقتها هتصرف معاك بالطريقة اللي تناسبك انت والحيوانة اللي ماشي معاها
سيف بقسوة مسك ايدها وهو بيتكلم بتحذير : اول واخر مرة اسمعك تقولي الكلمة دي.. رنا مش واحدة من الشارع علشان امشي معاها.. دي زي اختي نهال بالظبط وملهاش حد غيري.. انا عارف انها زودتها ويمكن هي فاهمة اهتمامي بيها غلط لكني مستحيل اتخلي عنها مهما عملت
ساجدة : ميهمنيش.. اولع انت وهي فااااهم اولعوا كلكم انتوا زبالة تافهين عملت ايه انا ليك ولا ليها علشان تتريقوا عليا ضايقتكم في ايه.. ساجدة مقدرتش تكمل كلام وصوتها اتخنق بدموع صعب انها تظهر لاي حد بس خلاص مقاومتها انتهت وسيف حس بيها وندم انه وصلها للمرحلة دي.. اتحرك بالعربيه بعيد عن الفرح وفضل ساكت لأنه مش لاقي تبرير او كلام يقوله

في القسم ماجد كان قاعد عالكرسي قدام مأمور القسم مستني مصطفي.. ماجد اتكلم بجدية وهو بيقول : انا متشكر لحضرتك جدا وجميلك ده علي راسي
المأمور : القضية كلها اي محامي ممكن يطلعه منها لأن الاجراءات كانت غير قانونية.. وانا شايف ان اللي حصل ده مصلحة وقرصة ودن يمكن يتعدل ويتوب عن السكة البطالة دي

ساجدة جالها اتصال من ماجد مقدرتش ترد اول مرة بس لما اتصل بيها تاني ردت عليه
ماجد : ايه يا ديدا انتي نايمة ولا ايه
ساجدة : ايوة يا ماجد لا مش نايمة بس كنت برة البيت
ماجد : انتي معيطة يا ساجدة؟
ساجدة : لأ طبعا هعيط ليه.. في حاجة ؟
ماجد : مصطفي انتي قولتيلي هتفكري هنتصرف معاه ازاي ومردتيش عليا والمفروض انه يخرج او يتعرض عالنيابة
ساجدة : انا جيالك يا ماجد عاوزة اشوفه وهو في القسم
ماجد : تمام انا منتظرك
سيف : تروحي القسم ازاي باللبس ده
ساجدة : ملكش فيه
سيف : بت انتي مليش فيه ازاي انتي هتستعبطي
ساجدة : نزلني قدام القسم وروح فرح اختك خليك راجل مع اهلك عالأقل
سيف وقف العربية فجأة بس ساجدة كانت متوقعة رد فعله.. بصتله ببرود وقالتله :
اسمع يا سيف بجد انا حاولت اتقبلك او افهم دماغك بس مقدرتش فالافضل ليك وليا ننهي الموضوع ده
سيف : بتحلمي يا حبيبتي انا متعودتش اخسر قدام حد وخصوصا لو الحد ده زيك كده ياسوسو
ساجدة : يعني ايه زيي دي
سيف : يعني ظابط شرطة اد الدنيا والكل بيعملها حساب.. وبالاضافة لكده حلوة وزي القمر وبالنسبة لطولة لسانك فأنا قادر ابطلهالك
ساجدة : بعيد عن شنبك يا بن السباعي