القوارير

1

كلمة القوارير من اجمل عبارات الغزل بحق المراءه على لسان اشرف الخلق نبينا محمد ولا يحلى الحديث دون الصلاه عليه اللهم صل على محمد وال محمد
رفقا بالقوارير كانت وصية النبي بالنساء وصفها بالقاروره  وذلك لرقة هذه المخلوقه وللاشاره لجمالها  ولان القاروره اذا كسرت صعب اصلاحها كذلك المراءه
قصه اليوم عن امراءه  عراقيه من الغربه
اسيل عراقيه من الجنوب وصلت على امريكا عمري ١٦ناقص شهرين بعد ان عشت في الصحراء بمخيم رفحاء سنتين مع عائلتي ابوي رجال مزارع البنطرون ملابسه بس بالجيش شهم وشجاع واخواني اثنين احمد وحسين كبار بالعمر متزوجين وعندي اخوات كوثر وسفانه متزوجات وطلعن لكندا مع ازواجهن واطفالهن عندي بعد اخوان واخوات بقوا بالعراق امي مره كبيره من دخلت لامريكا كنت متعجبه من كلشي خاصة  من اشوف الاشجار والخضار والطبيعه الحلوه
كان في استقبالنا رجال عراقي اسمه هشام اصله من بغداد ساعدنا وگف ويه اخواني وعلمنا على شغلات هواي مكنه نعرفها هو جاي قبلنا بسنه بس كانت لغته بسيطه مو قويه. وعنده سياره اخواني كانوا ميعرفون يسووقون وحتى ميندلون اتذكر هذا الموقف بعد يومين من وصولنه لامريكا اندگت الباب الظهر واحمد فتح الباب
احمد اهلا هشام تفضل حياك الله
هشام لا والله مستعجل بس هاي كم بنطرون وقمصان للحجي ميصير يبقى لابس دشداشه ومحبوس بالبيت
احمد. ابوي مايعرف يلبس بنطرون بس بالجيش
هشام  يعتبر نفسه بالجيش لحد ميتعود والحجيه هم تغير العبايه هاي ولايه امريكيه ويخافون من السواد
امي.   انزع العبايه شلون خلوني گاعده بالبيت مااطلع
هشام حجيه امريكا ماكو احد يكعد بالبيت مواعيد ومراجعات اطباء محاضرات توعيه سفرات لازم تلبسين   ملابس مناسبه
طلع من البيت وبدينا نقنع ابوي وامي يغيرون لبسهم ومرت احمد خياطه احمد جابلها مكينه وخيطت لامي صايات وجبب ومشى الحال
هشام كان يوميه باليل يجي عدنا الولايه مابيها غير خمس عراقيين والعرب يبعدون عن مدينتنا ساعتين بالسياره الولايه منسوتا وكان هشام يعاني من الوحده لذلك ماصدگ لگه عائله عراقيه يمه وحتى احنا حسينا بالغربه ناس عراقيين بداية التسعينات كان عددهم قليل واذا تواجدوا يكون بولايات العرب كانت سنه ٩٣
بعد خمس ايام من وصولنا داومت اول يوم بالمدرسه كانت باديه واني سجلوني متاخره ورجعوني سنه داومت بصف التاسع يعني ثالث متوسط كنت اروح للمدرسه مشي اول يوم كنت مثل الكائن الغريب  الكل ينظرلي محجبه وملابسي تختلف الولايه بيها نوع من الالتزام حتى عند الامريكان لان اصلهم ريف وكانوا طيبين بتعاملهم وتعرفت على بنيه اسمها ميري رغم اني مااعرف غير كم كلمه بس سمعت كلمة فريند عرفت صديقه وظلت البنيه تاشر بديها وتحاول تفهمني ومرات افتهم مرات لا وهي مرات تفتهم مرات لا هي اصغر مني بسنه
كنت راجعه من المدرسه هشام كان موجود سلمت عليه سالني
. شلونها المدرسه اسوله
كلشي ماافتهم والكفل زينب  مثل الاطرش بالزفه اعرف بس الجرس من يدگ يعني خلص الدرس
هسه تتعودين وتاخذين اللغه وتنسين العربي
اني انشالله بس انت صارلك سنه وگوه تحجي انگليزي
  اسوله اني مادرست راسا شغل ليل ونهار واهلي بالعراق اوديلهم ويصيحون ماكو
احمد شوف سالفه العراق ماتخلص خلي ميزانيه بينك وبينهم وفكر بحياتك انت تشتغل وباقي حتى اثاث ماعندك وفكر تتزوج
هي وينها البنات الي اتزوجها رحت على مشيگان مرتين گالوا بيها عوائل عراقيه بس محد ينطي عزاب لايعرفون اهله لايعرفون عنه شي اجلت الموضوع
امي يمه يعني الا عراقيه اخذ امريكيه شوفتها تحل من على حبل المشنقه
حجيه انتي ترضين اخذ امريكيه شنو ذني واذا حلوات
اندار عليه
اسوله بعد لاتروحين مشي للمدرسه اني اوديج واجيبج
ماكو داعي المدرسه قريبه
احمد.  تصير عليك زحمه خويه
هشام.  شنو زحمه هو هذا حجي تگوم نطلع نتعلم سياقه حتى تمتحن  ونشوفلك سياره
دخلت للغرفه نسوان اخوتي موجودات
شنو هذا كل شويه اسوله واسوله ميانه زايده
سعاد (زوجة احمد ) هو هذا طبعه الولد من بغداد مو مثلنا نصيحلج ئئسيله وتراهن وياج راح يخطبچ حبيبتي ماتراهن حتى لو يخطب مااقبل اني زغيره والمدرسه حلوه بامريكا اريد اكمل

يتبع....