القوارير

6

تطورت علاقه ماري وستيفن والامريكان بعلاقتهم الخطوط الحمراءمعدومه كلمه احبك عدهم مفتاح لكلشي بس اني من حبي لماري حاولت اخليها نقيه بعلاقتها ويه ستيفن
شعندج اليوم فرحانه ماري
الليله اني وستيفني راح نجرب الحب لاول مره
وشكو مستعجله على هيج علاقه بعدج زغيره
زغيره اني انتي تزوجتي عمرج ١٦
اني اتزوجت مكانت علاقه عابره انطيت نفسي بيها شلون تعرفين ستيفن راح يبقى وياج حتى تتصرفين بهالشكل
هذي العلاقات هنا تبدي هالشكل اسيل
ماري اني عاشرتج وعرفتچ گلبج طيب ونقيه جربي تبقين مثل ماانتي لحد الزواج فهمي لستيفن يمكن يفهم
وليش احرم نفسي منه ومنو گال اني راح اتزوج
زين افرضي انتي وستيفن بعد سنه افترقتوا والتقيتي بانسان يحبچ من صدك شراح تقدميله وانتي انطيتي كلشي لستيفن
خربطتي افكاري صعب العلاقه تبقى مثل متكولين اني احب ستيفن
اذا تحبيه خليه يتقدملج وتزوجيه
اسيل شتحجين احنا طلاب اعداديه شنتزوج بعدنا زغار
يعني زغار على علاقه رسميه وكبار على علاقه تسليه ولعب ماري فكري
بقت ماري محافظه على نفسها مده شهرين لكن مكدرت تكمل وتحولت علاقتها مع ستيفن علاقه جسد وكنت اني اول وحده خبرتها واعتذرت ان مگدرت تحتفظ بوعدها الي
صرت بشهر السادس اصعد الدرج لشقتي وبيدي البنات فجاءه اندارت الارض وگعت شافوني الجيران اتصلوا بالاسعاف هناك عرفت ان وضعي الصحي خطر والجنين مسبب تمزق بجدار الرحم والنزيف عندي صعب يسيطرون عليه ولازم يجهضون الطفل كان ولد
هشام وافق على الاجهاض والخوف عليه كان اكثر من خوف امي وابوي لزم ايدي قبل لياخذوني للعمليات
اسيل احلفي متموتين وتعوفيني واحلفي بعد ماتسوين اطفال ابد اسيل احلفي هسه كولي والكفل زينب متموتين
هشام مو وكت حلفان وكلشي بيد الله بس احلفلك ارتاح من الاطفال والشغل بالعطله لاتخاف مااعوفك كافي مسويها مأساه صايرلي امريكي ابن سهام وتبچي هو اجهاض ميخوف ترى خزيتنا واخواني هنا ونسوان اخوتي هسه يكولن ساحرتله
يمعوده اسحريلي اني قابل
متحتاج اسحرلك انت مسحور وخالص
يارب تظلين على طول تضحكين لچ انتي مو بس مرتي انتي الدنيا كلها
لو ادري بهذا الحجي كان تمرضت من زمان
طلعت من العمليه والدكتوره حذرتني من الحمل مره اخرى تغيبت عن الدوام اسبوع وهشام بقى يمي كم يوم وماري وامي ونسوان اخوتي
داومت ورجعت صحتي وتخرجت من الاعداديه وقنعت هشام مااقدم على كليه والتفت لبناتي واله وبنفس الوقت حتى اشتغل واخليه هو يدرس ووعدته من يتخرج اكمل اني كليه تخرج هشام بعد اربع سنين من الجامعه واشتغل باكبر مكتب محاماه بالمدينه اول شي سواه گعدني من الشغل وقدملي على كليه وبديت اداوم واشترينا بيت ملك قريب من بيت اهلي وماري وستيفن تزوجوا وانتقلوا لولايه ثانيه بس بقينا نتواصل ونتشاوف كل متجي لولايه  حسيت هذا وقت مناسب حتى افكر بطفل ورحت للدكتوره حتى اطمئن على صحتي في حالة اسوي طفل وكانت هنا بداية التحول بحياتي الدكتوره من فحصت شكت عندي شي مو صحيح اخذ عينه للزرع وبعد اسبوع اتصلت بيه
اسيل الدكتوره تريدج تسووين موعد وتشوفج باقرب وقت
ليش في شي يخوف
لمن تجين تعرفين ياريت يجي احد من العائله
هشام كان بالعمل بس بالصدفه ماري كانت موجوده عند اهلها اتصلت بيها ورحنا للدكتوره الي گالته
اسيل انتي عندج بدايه لسرطان الرحم والخلايا السرطانيه عندج سريعه الانتشار
شنو دكتوره اكيد انتي غلطانه اني عمري خمسه وعشرين سنه الي بعمري ممتزوجات
اتمنى اكون غلطانه بس اسيل اعرف انتي مصدومه وزوجه شابه وزوجج شاب بس العمليه لازم تصير باقرب وكت وضحي بجزء منج قبل لاينتشر
لا شنو عمليه شنو سرطان عيدي التحاليل دكتوره اني عندي بنات وزوج يحبني مااريد اموت ومااريد اعالج عيدي التحاليل
اعيد التحاليل بس الوقت يضيع
شنو الوقت يضيع ليش شنو راح اموت شكد عندي وقت احجي
باجر لازم تسووين العمليه هسه اكمل اجراءاتج وفحوصات وباجر نستاصل الرحم
انتي مخبله متفتهمين دكتوره فاشله تريدين تسوين عمليه حتى المستشفى ينطوج فلوس
بديت اصيح على الدكتوره وماري تحاول تهديني اتصلت على هشام حتى يجي
وعرف الخبر كانت صدمته اكبر مني والصياح الي صيحه اكثر من الي اني سويته لحد ماانتبه عليه ابچي ومنهاره اخذني من المستشفى وطلعنا بالبيت بقينا حاضنين بعض ونبجي
اسيل سرطان عندج منين يمكن اني السبب اتزوجتج زغيره لو يمكن من الوگفه والشغل بالمطاعم منين اسيل احجي لاتعذبيني
انت لاتعذبني وتحمل نفسك ذنب هذا مرض من الله مو بدينا هشام اني ابجي لان خايفه مو لان محملتك ذنب ومااريد اموت واعوفك
انت وبناتي الي يهمني من هاي الدنيا خايفه هشام
كلمة خايفه رًجعت هشام لوعيه وتماسك وكلي
لاتخافين اسوله اني وياج وباجر ناخذج للمستشفى وتسوين العمليه وينتهي المرض احنا انصدمنه بالبدايه بس ترى احنا بامريكا والعلاج مو جود والابحاث يوميه تتطور لاتخافين وگومي نروح نجيب البنات من المدرسه وكافي تبجين گدامهن
هشام شبيك البنات يجيبهم الباص وبعد وكت على جيتهن
لعد تعالي نگعد

نتفرج تلفزيون اني وياج
گول چا احلى من لعد
چا بعد شتريدين
والله حرامات اني وياك ماتزوجنا من زمان
بنت الاوادم اني اخذتچ عمرج ١٦مصاير بعد من وكت شنو
هم حرامات ١٦ضاعت بدونك
يعني مندمانه على الزواج
والكفل زينب مندمانه
باليل هشام خبر اهلي ونعاد البچي والحزن كانت عيني طول الوقت على هشام صح يبين متماسك بس بداخله انكسار وخوف واضح حتى بخطواته رجعنا للمستشفى ثاني يوم فحوصات وتحاليل ودخلوني عمليات وصيت هشام بنفسه وبناتي

يتبع....