حكايتي مع الفيس

#حكايتي_مع_الفيس /3

#حكايتي_مع_الفيس
...
الجزء الثالث /3
.. 

وره الأسبوع ماتحملت ضعفت والشيطان تغلب عليه الظاهر سحر العلاقه هذي أقوى من كلشي فتحت الحضر وحجيت وياه
دزلي صوره يبجي وعيونه حمر متندم وظل يحلف أنو مو قصده وإني حساسه زياده وفهمته غلط وهوه يحبني ويموت بدوني وكلام هواي گاله ساحر ومنمق سمعني كلام عشق وغرام بحيث أني متحملت أظل زعلانه عليه لأن جنت كلش مشتاقتله وشفت نفسي تعذبت بفراگة
گدر بطريقه لعوبه ومخادعه يرجع يخدعني
ورجعت علاقتنه مثل قبل بس أني ماخذه حذر منه وبگلبي نغزه فد شي مثل الحدس يأكدلي أنو يتلاعب بيه وانو أكو شي راح يصير
حاول بأي طريقه يخليني أثق بي وأنسى اللي صار ووعدني بس يبنون بيتهم يجيب أمه ويجي
وهالشي عيشني من جديد بأوهام وأحلام وخيال
رجعلي صفحه الفيس بوك مالتي گلي حتى أثبتلج أنو إني أثق بيج وما أتدخل بعد بخصوصياتج وأني هم بالمقابل لازم أخفف الضغط عنه لأن ضروفه صعبه
إني شسويت غيرت الرمز السري للحساب والصوره والأسم مستعار كله ما اكدر أخلي معلومات صحيحه
ومشت الايام بيننا وعلاقتنا طبيعيه
بقيت محتفظه بالصفحة الثانيه كأحتياط أراقب منها وماگتله بيها مايعرف وهو هم ماسألني
تفاجأت أكو طلبات مراسلة تجيني ولد إسمه محمد دازلي رسايل إني مجرد ما دخلت على صفحته الشخصية شفت الأصدقاء عبوسي واحد منهم أخذت سكرين للصفحة ورحت بسرعه لعبوسي كتله تعال منو هذا ؟؟
قره الرساله ومارد
وره شوي گلي عندي شغل من أكمل أرد عليج
حسيت أكو شي وشي كلش جبير
الله يعلم شيخطط وشنو بباله
بقيت أعصاب وعلى نار
وره ساعات رد يتمضحك ويتشاقه وردت أختبرج وهذا صديقي الولد أعرفه ومدري أييش
بشرفك عبوسي شنو تختبرني؟؟
أي شبيج حسونتي حبيبتي 
أنتي أم بيتي وأم جهالي ومرتي
أنتي زوجتي وعرضي مو طوطور كدامج شايفتني گواد
شتحجي أنته !! كلشي مجاي أفهم منك شنو هالولد دازه اليه يريد يتواصل وياي على الخاص ويسولف شنو لهالدرجة رخيصه عندك !!!
لا حبيبتي شبيج مو دا گولج أختبرج أشوفج تنعجبين بصديقي بس هو أحلى مني تره ويدلل البنات وإحنا بيناتنه دائماً هيج نسوي عادي يعني من نصاحب بنيه نختبرها شبيج يامرتي
تره عرضي أنتي
صدوگ جذيب أنته عبوسي شنو أحلى مني شنو يدلل البنات شهالحجي؟؟
وظل يقنع بيه بداخلي مصدومه ومستغربه بس تظاهرت وياه على طبيعتي
معقوله هيج عايشين ذوله ببغداد عدهم عاديه الشغله؟؟
شهالعالم هاي؟؟
غريب والله مدري أني وگعت بواحد شيطان
مرت أيام طلبات تجيني أكثر من طلب أحذف ومرات أنطي بلوك ومرات أروح أسأله يعصب ويهنبل ويظل يكفر
يگلي أبتليت دزيتلج صاحبي يختبرج مرة گمتي تشكين بيه كلما يجيج طلب شوفي أنتي ويامن تحجين وين تفرفرين بالگروبات المختلطة ويزحفولج وكل مرة يطلعني أني الغلطانه
وأضطر أعتذر منه وأهديّ لأن كلش عصبي هوه ويتنرفز بسرعه
وره أيام اشو أرقام أشكال تجيني
إتصالات مرات مارد ومرات أكول يمكن على رسلهم صدفة معقوله عبوسي أنطاهم رقمي !!
مره جاوبت ولد يلح يلح گلي أني أعرفج وأريدج نسوي علاقة وأداريج
خفت كلش وحضرت الرقم وخفت أسولف لعبوسي
بس من دخلت الرقم بالفيس بوك طلع ولد صورته اسمه جاسم راويته لعبوسي گلي هااا هذا جيراننه منين عرف رقمج !!
سوه نفسه كلشي مايدري وعصب وقتها وگال اليوم أطيح حضه وغابله يومين وأني مثل الثوله لا آخذ ولا أنطي
وراهه رجع ع أساس الولد مخابر صدفه من جهاز عبوسي ومطلع شكو أرقام بنات العنده عمداً ماخذهن
ومتصل عليهن كلهن وإني وياهن وعبوسي متعارك وياه ومسوي هوسه بالشارع مفاككتهم الجوارين وميتحاجون هسه علمودي
أني هم صدگته
كلشي ماحجيت لا خذت ولا أنطيت صرت هبله وعبوسي ضيع الأول والتالي بحياتي دمرها دمار
بس مره دخللي ولد مخلي صورته زعطوط مبين شكله الفينات مواليده
گلي حسناء الحلوه شلونج
أستغربت !!
رديت عليه
إنته منو !! وشلون عرفت أسمي ؟؟
ظل يضحك يدز ملصقات
گلي أني أعرفج ومعجب بيج وأريد نصير أصدقاء عوفي عبوسي خل يولي
أني هنا صدوگ تخبلت أنطيته بلوك ورجعت لعبوسي تعاركت وياه
حلف أديان وأيمة أنو الولد يشتغل وياهم بالمحل وأخذ جهازه بلا مايدري وشاف أسم صفحتي وقره المحادثات بيننا وشاف كلشي حتى صوري
تخبلت أني من گالي هالحجي
لك عبوسي أنته جهازك آيفون بصمه شلون شاف كلشي شلون فتح الجهاز إذا مو أنته فتحته إله؟؟
هاا ليش متصدگين حسناء
وظل يحلف أنو الولد جرة من إيده بالشقه ومالحگ عليه
أني مدري شصار بيه نجنيت
ياربي ليش هيج يصير بيه
عبوسي تره أنته گتلي أني عرضك ومرتك ليش هيج تسوي بيه اكو واحد عاقل هيج يسوي بعرضه
ليش شنو ذنبي أني حبيتك وتعلقت بيك وأمنت ووثقت وسلمتك روحي وشرفي
تالي متالي هيج تسوي بيه !!!
بقينه أيام مختلفين بسبب هالحادثه وقررت أسدها الصفحه نهائياََ
ظل يراسلني من الفايبر مرات من الواتس آب مالي خلگ أرد عليه تعبت نفسيتي من سوالفه
بالأول سالفه البنات اللي يزحفلهن وهسه جماعته وصحبانه اللي يتفاخر كدامهم بيه ويراويهم محادثاته ويدزهم يختبروني ماعرف صدگه من كذبه
بقيت حذره منه تعبت وقل تواصلنه كلش هالفتره
لحد مايوم دزلي رساله گلي أبو يريد يسوي عمليه وراح ينشغل فد كم يوم وطلب مني ماراسله أبد لحد مايكمل لأن ماعنده إنترنت
أني أدري بي كلش زين مايستغني عن النت عنده ع الخط يفعل بس هالمره يمكن صدگته لان تعبت من هالعلاقه َمحتاجه مجال نبتعد عن بعض حتى بالي يرتاح تعبت وأريد أتخذ قرارات جديه بس مجاي أكدر فقدت السيطرة على مشاعري
كأنما فد سحر أسود صابني
تنويم مغناطيسي مسويلي وما أكدر أغير من كلشي
مسيطر عليه تماماً
مرّ أسبوع عبوسي لاحس ولانفس
صفحته كلشي ماناشر جديد
مراسلته أني أكثر من رسالة مافاتح إنترنت
غريب وين راح هذا ؟؟
بس لاصار بي شي
يمه گلبي يوجعني
لو إحتمال أبو مات بالعملية حتى ماسألته شنو من عمليه مسوي ألمن ووين ماسألته بالتفاصيل
أدز رسايل مايرد
إتصل على رقمه مايرد
تذكرت أكو ولد صديقه إسمه فرحان دائما يحجيلي عنه يگلي خوش ولد وضلعي هذا وكاتم أسراري وينشر صورهم سويه بالفيس وين مايروح بالزياره بالكوفي بالزوراء دومهم سوية
دخلت وشفت صفحته معلق على آخر  منشور ناشره عبوسي دخلت سلمت وره ساعات يلا رد
كتله خويه أني صديقه عبوسي
گلي أي أعرفج
كتله شو عبوسي أختفه خو ماكو شي
ظل بس يضحك
گلي والله فطيره أنتي ليش متدرين وين عبوسي ويدز ملصقات ضحك
گتله لا والله گلي أبويه مريض بالمستشفى ويريد يسوي عمليه
صار عشر أيام ماكو خبر منه ومايرد على رسايلي خاف صاير شي
گلي أختي أني ما أنطي بضلعي هذا سندي وأخوي روحي هو يراسلج ويگلج الصاير أني هسه اوصله كلامج
إني دخت من هيج حجة وياي
أخي تره مفتهمت كلامك
ظل بس يضحك
عفته وصافنه على حضي وقسمتي الوگعتني بعبوسي النذل
بس لا هذا هم يطلع شايف محادثاتنه وصوري من كثر ماوثقت بي كلشي أدزله من صور ومقاطع فيديو على أساس مرته أني وعرضه
وهذا يتمضحك وضلعي وضلعي من عسى أنكسر ضلعك انته وياه إن شاء الله
ثاني يوم الفجر صار مانمت ولاخذت عيني النوم بس أبجي صليت وأندعيت ربي خلصني من هالكابوس اللي مسود أيامي دخيلك آلهي
عبوسي ورطني بعلاقه وياه وجاي أموت جاي أتعذب ماريده بعد
خلصني دخيلك بس أرد أطلع من هالعلاقه بدون فضايح وأخلص منه الخلاص الأبدي
أني مراسلته ع الفايبر قبل كم يوم
اجاني أشعار أشو هذا دزلي ملصق
شفته متصل
راسلته گتله عبوسي شنو السالفه
گلي بعصبيه شكو تراسلين فرحان
ليش شصار غلطت لأن سألت عنك ظل بالي عليك
لايظل بالج ولاتراسلين بعد
ششششنو شتحجي أنته شنو لاتراسلين بعد شكو حبيبي شصاير
حبيبيج هه والله ضحكتيني
دزلي صوره كف أيده لابس حلقه
گلي هذي الصوره تجاوبج على كل أسئلتج ويلا ولي
أني فكيت عيوني ع الأخير وشهگت شهگه الموت وصميت حلگي بيدي خفت يسمعوني أهلي نايمين بس أني كاعده وصنطه بالغرفه خفت يسمعوني
معرفت شرد شگول شحجي
قبل لا أرد عليه أنطاني بلوك
ملخت وجههي ولطمت ومتت قهر وفتحت زيگي للسمه ودعيت عليه من كل گلبي بألم وحسره وقهر
الله لاينطيك العافية عبوسي
وين الوعود الوعدتني والشهور المرت بيننا خذتها من عافيتي أنطيتك روحي وگلبي وحبي وأمنت بيك ووثقت بكلامك
جننه متفقين على زواج بس يخلصون بنيان بيتهم
يابنيان شگد غبيه أني يمكن كله كذب وتمثيل وخداع
ما أگدر اوصف الحال اللي صرت بي وكتها صوره أيده تتراوالي لابس حلقه وخاطب يمه روحي توجعني دخيلك ربي
يعني ماراح وي أبو يسوي عمليه راح خطب غير بنيه
زين منيه وشوكت وشلون ومنين أجت هاي وهو صارله ٨ شهور أكثر وياي أربع وعشرين ساعه من عساهم لاتهنوا ولاتهنه بيها من عساهم بالمرض اللي مايطيب
ظليت بين المحتاره بين المصدومه بين الدايخه شسوي هسه يربي أنطاني بلوك من كل مكان أريد افوخ روحي أريد اطلع البركان اللي بگلبي أشتعل
رجعت لفرحان دزيتله حجي كومه
فوخت گلبي أدري بي راح يوصلله الكلام
النذل
من هذا گلي ضلعي وأخوي وما انطي بي يدري بي غدر بيه وخدعني ومتستر عليه
دعيت عليه وشكلت ذمته وگتله أن شاء الله حوبتي تكسر ضهره ومرته تخونه ويصير عنده بنيه الله يسلط عليها واحد انگس منه يسوي بيها اللي سواه بيه
كل اللي دزهم اليه جيراننه وصحبانه بالشغل كلهم جانوا يعرفون بعلاقتنه ويتسلون والله العالم من نفتح كاميرا أني وياه ياخذ سكرينات ويراويهم ويتفاخر كدامهم العار
ظليت ادگ والطم وأنوح وألوم بروحي كلها مني كله الصوج مني أني
أني اللي كبرّت جلاله وانطيته أكبر من حجمه الحقير النذل
الله ينتقم منه وأدعي عليه ليل نهار لما يبرد گلبي
فرحان گلي يا أختي أنتي هم غلطانه عبوسي ماضربج على أيدج ولا گلج حبي وتعلقي بي
گتله من عسى الله يفضحكم وينتقم منكم كلكم
يا أختي أني شعليه تتدعين عليه
أني مو أختك أفتهمت
أنته هم مثله ويمكن أتعس منه
اللي جنت تعرف بسوالفه وتشجعه وتكسرون بخت بنات الناس
الله يكسر رگابكم وعساهه بعافيتكم
ماقصرت بالدعاوي والسب والشتم عليهم لحد ما ارتاح گلبي وأنطيته بلوك
حسيت براحه شويه من حجيت اللي بگلبي
شهور وأني مخدوعه ومغدوره الله لاينطي العافية لعبوسي
ماعرف شلون مرت الأيام وره هاليوم الليل كله بس أبجي من القهر على شبابي وعافيتي الراحت وحياتي الفاشلة وحظي الطايح
دورت على صفحات ابتزاز إلكتروني أي واحد يگدر يساعدني ينتقم منه
بس ردت واحد يسحله ويجرله أذانه عندي بس رقم موبايله وأعرف عنوان شغله بالشورجه واسم العماره ردت واحد شريف يساعدني وانتقم منه ماحصلت كله ماتخاف الله ودخلت على كم واحد حجيتلهم يكلولي تستاهلين شكو وثقتي بي شلون انتي تنطي هوه واحنا ماتنطينه
من غير الأنذال كم واحد استغلوا الموقف ورادوا مني علاقه عبالهم رخيصه وأدور على واحد يسد مكان النذل عبوسي وأني لسه روحي مشتعله من المقلب اللي كلته منه
تالي إيست وعفت الشغله راح روحه بلا رده راحت روحه لجهنم ان شاء الله
الله ينتقم منه ويمكن آخر مره دعيت الفجر الله ينجيني منه
ربي أستجابلي وخلصني من شره الحقير اللي طلع شهور يتسله بيه
قررت أصير قويه ومتأكده رب العالمين مايعوفه بلا عقاب سلمته بيد الله وحده يگدر ينتقم منه حسبي الله ونعم الوكيل عليه
بعد مرور خمس سنوات على هالحادثه لحد الآن أتذكرها بألم وكسر
وأرجع أدعي عليه وأتمنى من كل گلبي تطلع حوبتي بعافيته
هسه كلش أرتاحيت من حجيت اللي بداخلي مكبوت من سنين من عرفت الكاتبه ملكه تريد تنزل قصص عن علاقات بالفيس بوك راسلتها وحجيت الها كلشي
أعرف اللي تقره قصتي تذب اللوم عليه وتگول تستاهل
اللي صار صار و تعلمت درس من هالتجربه وأريد كل وحده قرت قصتي هذي مع الفيس تحذر وتنتبه وماتثق بأحد
أدري أني غلطت وأني هم مذنبه بس والله العظيم مو بيدي أني جنت غافله والشيطان زيني هذا العمل ماجنت مفكره بالعواقب وصدگته ووثقت بي اللي يحلف هالكثر حلفان شلون واحد مايصدگ بي دخيلك ربي حتى إبليس ماجان هالكثر يحلف يعني تغلب حتى على إبليس اللعين شگد لعين اللي يحلف بالله وبالأيمة كذب وخداع
وأني هم والله أعترف المجتمع مايرحم البنيه المطلقه ويذلها
وجنت محرومه من كلشي إسمه حب ورومانسيه وعشق وتعرضت لهالشي يمكن تجربه تعلمت منها والحمد لله والشكر رب العالمين عوضني برجال يسوه عبوسي وعشيرته وصار عندي أطفال وأن شاء الله حوبتي طلعت بي  والله أنتقم منه شر إنتقام
....
يتبع //