ركزي معايا لأن حنحكي عن تصرفات و صفات لو لقيتيهن في خطيبك او الشاب لمتعرفه عليه وناوية الزواج منه لمي نفسك وأهربي بسرعة 🏃🏻♀😂
1.لو حاسة انه مش شاريك،وديما يقولك انك سكانة وحساسة بزيادة ،و وقت الخصام يبيعك ولا كأنه يعرفك 💁🏻♀
2.لو مايعرفش يعتذر ويقولك أسف،لأن مافيش انسان مايغلطش بس المشكلة في اللي مايعترفش بغلطه ،واخرى يقلب الموضوع عليك !! والأسف هذا مش معناه انه يعتذر من برا قلبه وبلهجه قاسية ،لازم تكوني حاسة انه بجد نادم ومعش يعاود غلطه 😏
3.لو مايحكيلكش عن نفسه وأهله وعمله ،وماتعرفيش عليه شي !..طبعا في الأول حتكوني مبسوطه عشان الغموض وحركات الأكتشاف وهك،بس انت لازم تفكري كويس هل ممكن تكملي حياتك مع شخص مش عارفة عليه شي 🤔
4.لو تحسي روحك معزولة ،يعني عازلك عن أهلك واقاربك والعالم ،على أساس هو غاير عليك ويموت فيك ويخاف عليك من نسمة الهواء ويبيك له هو بس🤦🏻♀ فالأول رد بالك توافقي عالشي هذا ،ثانيا عمرك ماتصدقي هالتبريرات لأن اللي يدير هك معنداش ثقة بنفسه ولا بيك، ويبي يخليك بروحك عشان تضعفي💔💔.. وتتعلقي بيه هو ويكون سي السيد المنقذ 😒...ثالثا لو درتي هك وضحيتي ع خاطره عمره ما حيحترمك لأن لسيبت ناسها ع شأنه تسيبه عشان حد ثاني !
5.لو مايعرفش لغة النقاش والحوار،وكل مايصير أختلاف على اي موضوع يا يقعد يعلي في صوته ويخبط او يهرب ويسيبك تحكي بروحك ،هذا انسان مش حتعرفي تعيشي معاك وحيقلب حياتك لمسلسل من النكد المتواصل 🤷🏻♀
6.لو ديما محسسك انك درجه ثانية وهو أحسن منك ،أشطر منك ،أجمل منك هذا بكل تأكيد لازم تهربي منه 😂
7. لو مش ثابت على رأي ،وكل مرة بكلمة ومش عارف شن يبي ، هذا عيل مش راجل وانت أكيد تبيش تزوجي عيل 👀
8.لو يخفف في دمه ويضحك على عيوبك ،يضحك عليك وعلى تصرفاتك بطريقة مؤذية ومزعجة وبعدها يجيك وبكل صحة وجه ويقولك "انا نبصر معقولة زعلتي "نننننننن😐
9.لو يحاول يغيرك ويقارن فيك بهذي وهذك ،ويعبرلك ان مش عاجبه بعض الأشياء فيك ولو غيرتيهن حتقعدي تمام في نظره، لالالالالاااااااا!!! ياحبيبتي انت مش ناقصك شي ولو تبي تغيري من نفسك ف حيكون بمزاجك انت وبس، حبي نفسك وخليك غالية وهو مش عاجبه الباب يفوت جمل ،سااااااااهلة😁
واخر نقطة والعاشرة هي لما يطفي لمعتك ويخليك مهمومه وتعبانه ،لأن البنت لي تكون مع الراجل الصح ولمريحها حتكون منورة وتلمع وضحكتها جميلة وعيونها مليانات سعادة 💕
رد بالك تخلي فكرة العنوسة وانك تبي تزوجي تخليك متسرعة وتختاري الرجل الغلط او تسامحي وتتجاهلي النقاط هذينا لأنك خايفة تكوني وحيدة ،رد بالك تضيعي عمرك ع خاطر وهم ،رد بالك !
ودمتن بحب وأمان 💛 مـيـ,ـآر آلـ,ـۅرفـ,ـلـ,ـيـ,ـ ❤
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
