Isang Taong Pag-ibig

PANIMULANG TULA

Tumugtog ang musika

habang magkalapit ang ating mga mukha

nagkatitigan, nangungusap ang mga mata.

Ating isinarado,

hindi ang ating mga puso.

Sa halip ay ang ating mga tainga,

pinigilang manggulo

ang ingay ng mundo

habang nakatayo

sa saradong kwarto ng ating damdamin

na hapong-hapo

Dama ko ang pwersa sa ating paligid,

pwersang maaring tumangay

sa atin sa kalangitan, na

siyang maaaring

magpagaan ng

 ating mga pinapasan.

Ngunit hindi, hindi ako

nagpadala o nagpatangay.

Pinili kong manatili

sa iyong tabi.

Dahil sa bawat segundong kasama ka,

kaharap, hawak ang iyong kamay,

nasisilayan ang iyong anino't pagkatao,

para bang binigyan ako

ng isang milyong minuto

na mamalagi sa paraiso.

Tila ba isang dilaw na gumamela

ang iyong mukha sa ganda

namukadkad, kumikislap,

animo'y isang alitaptap

na lumilipad habang kumukutitap,

naghahatid ng isang tuldok na liwanag

sa kadiliman

na sinakop ng kalungkutan.

Pinikit natin ang ating mga mata.

Kasama kitang humakbang,

unti-unting ibinuka ang pakpak,

dinama ang hangin,

dinama ang pag-angat,

palipad patungo sa ating kalayaan

na madama ang kasiyahan

na ipinagkait ng ating mga karanasan.