#قسوه
《6》
سيف : خلينا من بوي توا .. اني جايك في موضوع ..
ناجي : اني .. ان شاء الله خير ..
سيف : اني نبي نطلب ايد بنتك هاجر على سنة الله و رسوله ..
ناجي تفاجأ من طلب سيف .. ماقدرش يستوعب انه واحد زي سيف يطلب يد بنته ..
سيف وقف : طبعا حنخليك تفكر .. و بعد ايام حنرجع ناخد ردك ..
ناجي وقف بسرعه : لالا علاش نفكر .. خود ردي من توا ..
سيف قام حاجبه و ميل راسه ع الجنب لانه كان متوقع رده و متوقع انه يعطيلا الموافقه من دون تفكير .. لانه يعرف بوها قداش يحب الفلوس ..
ناجي فرحان و في عيونة نظرة طمع : اني موافق ..
سيف : على بركة الله .. حنستنى بوي لين يروح من المانيا و نجو نخطبو رسمي ..
ناجي : وعلاش اتراجي بوك تقدر من غدوه تعقد عليها و تعطي مهرها و ترفعها بحوايجها ..
سيف شبحله بنظرة اشمئزاز من طريقة كلامه عن هاجر و كأنها سلعه و ماليهاش وجود او رأي ..
سيف بصوت حاد : لا .. بنديرو عرس و بنفرحو .. هاجر ماهي حاجه زايده بيش ناخدها بالطريقه هادي ..
ناجي : زي ماتبو يا ولدي .. اعتبرها ليك من توا ..
شبحله سيف من فوق للوطه و طلع و هوا قلبه دم على ناجي .. ركب في سيارته و مشى للمدرسه بيراجي هاجر لين تطلع و يخبرها باللي داره ..
درس سيارته و قعمز يفكر : زعما اللي درته هدا صح او غلط .. هدا زواج ياسيف مش لعبه و انت تعرف هاجر كيف كانت مع صاحبك .. اوفففففف ..
تكه راسه ع الكرسي : بس هي مش هكي .. هي بنت كويسه حتى انها ندمت على كل شي .. و بعدين نادر ما قدرش يقربها .. مهما كان يا سيف .. حتقعد تتذكر في ماضيها مع نادر طول عمرك .. مش مهم .. المهم نحميها من نادر و بوها و نكون قد كلمتي .. و بعدين يصير خير.. !!
................................
طلعت اسراء من دارهم على روس اصابعها .. و هي تتلفت و تحاول تفهم علاش بوها كان معصب و يدور في هاجر .. لما مالقت حد في الصاله مشت لدار امها .. القتها مفتوحه و القت امها غامه راسها في المخده و تبكي و ترعش .. اسراء قربت من امها و بصوت واطي قالت ..
اسراء : امي .. خيرك .. و خيرا بوي يدور في هاجر..
شريفه قامت راسها و دموعها في عيونها ..كانت متهستره و ترعش ..
شريفه : شوفته .. شوفته طلع الموس من المطبخ .. بيقتلها .. بيديرلها زي ما دار لي نجاة ..
اسراء شهقت و حطت يدها على فمها : شنو تقولي انتي .. علاش .. و علاش بيقتلها ..و بعدين منو نجاة ..
شريفه بصوت واطي : اسسس ماتقولي اسمها .. اسسس تو يسمعك اسس .. راهو يجي يقتلنا اللي يقتل مره يقتل الف ..
اسراء بصدمه : شنو ؟؟
شريفه : اطلعي .. امشي اقعدي في الدار و ماتطلعيش مهما سمعتي ردي بالك تطلعي ..
اسراء : شنو تقولي انتي .. من جدك .. لو سمعته يضرب في اختي حنطلع و اللي بيا بيها .. يابال مطلع موس طزز خليه يدبحني و يدبحها .. على هالعيشه الحلوه اللي تخليني نبي عمري يطول ..
شريفه : مش حنخليه .. مش حنسكتله هالمره لااا .. بس انتي خليك في الدار و بس .. ماتطلعيش ..
