《5》
قروب روايات العنود Beba Pinkعلى الفيسبوك
رجعت اسراء للحوش متضايقه من تصرف عزو و في نفس الوقت فرحانه بالفلوس اللي حصلتهم من خدمتها ..
اول ماخشت القت بوها مقعمز في الصاله و يدخن و حاط رجل على رجل ..
اسراء : السلام عليكم ..
نزلت راسها و كانت تبي تخش بسرعه للدار قبل ما بوها يدور سبله باش يضربها .. بس صوته العالي خلاها توقف و هي جامده و الدم يابس في عروقها .. و يدها ضاغطه على جيب سروالها اللي فيه الفلوس ..
ناجي بصوت عالي : خيرك متأخره .. وين كنتي .. ومع منو ؟
اسراء الصوت غاب عنها من الخوف ..السانها انربط و قعدت فاتحه فمها وتهز في راسها يمين و يسار .. تبي تتكلم تبي تنفي اتهاماته الظالمه ليها .. تبي تقوله انه هدا وقت مرواحتها .. بس الخوف قطع عنها الصوت و قعدت تهز في راسها و بسس ..
قرب منها بسرعه و نزل فيها ضرب و هي زي عادتها مستسلمه و تبكي بسكوت .. و يدها مزال على جيبها .. مش مهم عندها تنضرب المهم فلوسها اللي فرحانه بيهم ما ياخدهمش ..
مره يضربها على وجهها و مره على بطنها و مره يخبط راسها بالقوه .. هاجر لما عرفاته يضرب فيها طلعت تجري .. كان قلبها دم على بوها بعداللي صار معاها .. لما شافها مندفعه ليه .. شدها من شعرها و ضربهم هما الزوز.. و لما ركز في يد اسراء كيف ضاغطه على جيهة وحده .. حول يدها و قعد يفتش في جيوبها .. اسراء خافت حتى انها تبعده ..قعدت تبكي و بس عرفت انه فلوسها ضاعو و انه بياخدهم منها ..
ناجي اول ماشاف الفلوس طلق اسراء و هاجر و قعد يشوف فيهم ..
ناجي : من وين هما ؟؟ .. من وين تكلمي .. يأجرو فيك ولا .. تكلمي .. في الكليه ولا ؟.. من اليوم تنسي حاجه اسماها كليه يا ****..
اسراء من الخوف و من كلامه القاسي داخت .. بينما هاجر وقفت قدامه و تجرأت انها تتكلم ..
هاجر : اسراء ماهي بنت شوارع عشان تدير هكي .. اسراء كانت تشتغل مندوبه و تحصل في فلوس تاخد بيهم الحاجات اللي حرمتنا منهم بقفاصتك ..
ناجي حط الفلوس في جيبه و قال : تردي عليا يا بنت ال**** .. يا حقيره ..
شدها و ضربها ضرب اقوى من اللي قبله و هاجر بين يده زي القماشه .. ضربها لين طاحت .. و لما حس روحه تعب لوحها و طلع من الحوش فرحان بالفلوس اللي حصلهم من غير ما تنهزله شعره على بناته ..
هاجر قعدت تزحف على ركبها و هي تبكي و تتوجع لين وصلت لاختها ..
هاجر بصوت مبحوح : اسرااء .. اسراء نوضي ..
قعدت تفيق فيها دقايق لين ناضت .. انتبهت هاجر لاسراء القتها باله روحها .. و لما عرفت اسراء قعدت تبكي ..
هاجر حضنت اختها : عادي .. عادي ماتخافي .. توا يموت ونفتكو منه .. ماتخافي كله بناخدوه منه قدام ربي ..
اسراء قعدت تبكي من غير ماترد .. زي عادتها لما تفقد الكلام بعد كل مابوها يضربها 💔
...................................
سيف مقعمز في الاستراحه و كل شوي تخطر عليه هاجر .. لحظات و خش عليه عبدو معصب ..
عبدو : شنو هدا اللي درته يا سيف ..
سيف ببرود : شنو ..
عبدو : من امتى احنى انخربو على بعضنا .. انت تعرف نادر قداش ليه يلخبط في هاجر .. و وقت وصللها خربت كل شي ..
سيف : قلتله اني البنت هادي فوتها .. البنت بوها واعر لو حس بحاجه يقتلها ..
عبدو قعمز ع الكرسي و لوح باكو الدخان : مابيحس بشي ..
سيف : كيف وهوا يبي يستفرد بيها .. غدوه بعد ما يلعب عليها و بيلوحها شنو بيصير فيها البنت .. حتقعد من واحد لواحد و بعدها ابدو قولو خيرهم بنات البلاد قعدو خفاف و قعدنا زي الاجانب .. ماهو من تصرفاتكم ..
عبدو : هي اللي عطت مجال تتحمل مايجيها ..
سيف : ماكانتش هكي .. هوا اللي استغل ظروفها و قعد يتقرب منها ..
عبدو : اوووه بدينا في الدسكه المخبشه متع نمي ..
