《3》
جي الصبح و فاقت اسراء و هاجر .. اسراء بدت تغير في حوايجها عشان تمشي للكليه و هاجر طلعت للمطبخ تدير الفطور لبوها ..
خشت للمطبخ حطت الميه ع النار بس مالقتش سكر .. جتها امها تسال فيها ..
شريفه :مزال مادرتي القهوه ..بسرعه توا يعصب علينا..
هاجر: سكر مافيش ..
شريفه : حي توا يبقلب الدنيا فوق روسنا ..
هاجر: باهي شنو بنديرو ..
قطع صوتهم الواطي .. صوت ناجي العالي ..
ناجي بصوت جهوري مزعج خبط الرخامه بيده : قاعدات تهدرزو هني و اني ميت من جوعي ..
هاجر بصوت مرعوش :قق قهوه تمت يا بوي ..
ناجي بصوت عالي قرب منها و مسكها من راسها من ورا ..
ناجي : كملتيها ياحيوانه .. ليا اسبوع جايب قهوه يا **** وين درتيها .. توا اطلعيها ..
شريفه اول ماشافت الموقف قدامها مشت تجري لدارها و دزت الباب و قعدت تتفرج و هي ترعش .. نفس مواقفها السلبيه السابقه 💔
هاجر قعدت تشبح لامها تستنجد بيها بعيونها بس امها تجاهلتها وسكرت الباب و سكرت ودانها..
ناجي شد راسها و خبطه ع الثلاجه .. هاجر من قوة الضربه طاحت و قعدت بين فاقده الوعي و بين فايقه ..
ناجي واقف عليها و يشبحلها بغل ..
ناجي بصوت واطي: اني عارف مش حترتاحو لين نلحقكم بعمتكم يا كمشة ****..
مشى ناجي و طلع من الحوش .. و خلا هاجر طايحه و الدم يصب من جبهتها ..
اسراء اول ماسمعت صوته اختفى طلعت تجري لاختها تطمن عليها .. كانت تسمع في كل شي بس خافت تطلع و يضربها حتى هي ..
طبست على اختها و هي تبكي ..
اسراء : هاجر .. هاجر ..
هاجر حاطه يدها على راسها و تشبح لاختها ..
اسراء قامت هاجر و حاولت تسندها باش اتدخلها للدار ..
دخلتها و رقدتها ع الفراش .. وجابت قماشه و ميه و قعدت تضفط ع الجرح بيش يوقف نزف .. وهاجر تتوجع ..
هاجر تبكي : نكرهه .. و نكره حتى امي .. تشوف فيا قدامها مابتش حتى تفكني من يده ..
اسراء : تعرفيها امي من يومها تخاف من بوي و ماتقدرش حتى ترفع عينها فيه ..
هاجر : مستحيل تكون امنا .. الام ديما تدافع ع صغارها ولو كلفها حياتها .. بس هادي مش مهتمه بينا ولا همها حتى كان قتلنا ..
اسراء : الله غالب تخاف منه .. اهو النزف وقف .. و الوجع شوي و يمشي ..
هاجر قعمزت و كأنها تذكرت شي ..
اسراء : خيرك؟
هاجر: عمرك سمعتي انه احني عندنا عمه ..
اسراء : لا ماعندناش .. من قاله ليك ..
هاجر: بوي قال اني عارف مش حترتاحو لين نلحقكم بعمتكم ..
اسراء : يلحقنا بيها ؟؟.. كيف ؟ .. بس احني ماعندناش عمه ..بالك من قوة الضربه تهيالك..
هاجر : لالا متاكده سمعته اني ..
اسراء : نمشو نسألو امي؟
هاجر : هيا ..
وقفت هاجر و حاطه يدها على راسها ومعاها اسراء .. و مشو لدار امهم خبطو الباب ..مافتحت ..
اسراء: افتحي يا امي خلاص بوي مشى ..
فتحت شريفه و قعدت تشبح لهاجر بوجع و كأنها تبي تتطمن عليها ..
هاجر: هكي يا امي قدامك يصير كل شي و مابيتي تنجديني منه ..
سكتت شريفه و نزلت راسها ..
اسراء: احني عندنا عمه ؟؟
شريفه شهقت و انصدمت من السؤال ..
هاجر: خيرك ؟؟ .. معناها عندنا عمه ..
شريفه بصوت مرعوش : مانعرفش مافيش مافيش ..
