"أنت مش هتخلع الجاكيت وتقولي دفي نفسك بيه"
قالتله الجمله ومدت قدامه وهيا مضايقه ، باين عليه خجول ومابيعرفش يتعامل في المواقف الرومانسيه
جري وراها ووقفها
"أنا أسف ، خدي الجاكيت اهو"
"حصل خير ، أحنا قربنا نوصل"
"كان المفروض تتقلي قبل ما ننزل"
سكت شويه وبعدين قالها بأسف
"حقكك عليا ماتزعليش"
أبتسمتله وشبكت أيدها في ايده وقالها جمله في ودانها فضحكت وضحك هو كمان وبعدين خلع الجاكيت وحطو ع كتافها
موقف جميل عدي عليا وأنا قاعد ع الكورنيش ، طلعت الفون أتصلت عليها من رقم غريب قولتلها "أوعي تتتقلي في يوم واحنا نازلين عشان أدفيكي بالجاكيت بتاعي "
قفلت السكه في وشي وحطتني في ال black list ، دا الرقم الرابع اللي اشتريه بسببها
أنا مش عايزها ترد ، أنا بس عايز أطمن بوجودها وأقولها ع كل الحاجات اللي هعملها وهيا معايا
اشتريت رقم تاني وخليته معايا أحتياطي ، روحت الشغل وإحنا بنشتغل صاحب الشغل جاله أتصال من مراته ومكنش ينفع يرد عشان ورانا شغل
أستأذن مننا وقالنا "كل حاجه تتأجل الا كلامها معايا" ، وخرج رد عليها ورجع تاني وهو مبتسم
رنيت عليها من الرقم الجديد وقولتلها "أوعي في يوم تترددي تتصلي عليا في اي وقت ، هسيب كل حاجه في أيدي وهرد عليكي "
كنت عارف انها هتعملي block ، قفلت الفون وكملت شغل ، كلمه "ألو" اللي بتقولها في أول كل مكالمه بتخليني أفرح يومين ورا بعض
رنيت عليها تاني ملقتش رقمي معموله بلوك وبيرن عادي ، فرحت جدا ، كانت بتفتح عليا اقول الكلمتين اللي هقولهم وتقفل
"من شويه سمعت واحد بيكلم مراته في التليفون فبيقولها لو تعبانه روحي أقعدي عند أهلك يراعوكي ، عارفه أنتي لو تعبتي في يوم هاخد أجازه من الشغل وأقعد جنبك لحد ماتتحسني "
قولت الكلمتين وقفلت السكه وأنا ببتسم
"أنا بقيت بشتري بطاطا من ع الكورنيش ، عارف انك بتحبيها ، لما نتجوز هقف اشتري انا وانتي ، أه صحيح نسيت احكيلك ع موقف حصل معايا انهردا "
سمعتني كالعاده من غير ما ترد ، كنت برتاح بعد كل مكالمه بقول فيها اللي في قلبي
رنيت عليها يوم السبت بالليل ملقتش رد ، رنيت تاني مافيش رد ، قلقت فرنيت كمان مره
"الحمدلله انك فتحتي ، قلقت عليكي ، أنا بحاول أخس الفتره دي ، بصي أنا هبدا أقلل أكل"
بعد يومين رنيت عليها
"أنا يأست ، وجعان اوي "
"أستحمل "
سكت شويه ، مصدوم أنها ردت ، دقات قلبي عملت صدي صوت بس قفلت السكه بعدها ، لقيت رساله اتبعتتلي ع الواتس
مكتوب فيها نظام غذائي كويس أمشي عليه ، وقالتلي كام حاجه من عندها ، اتشجعت جدا وبدأت من جديد
كانت بتبعتلي ع الواتس نفس الجمل كل يوم "كل نص رغيف بس ، ماتتعاش انهردا ، متنساش تشرب مايه كتير"
كنت بشوف الرسايل ومبردش عشان متضايقش ، خسيت ١٥ كيلو في تلت شهور بسببها كنت بستحمل عشان هيا معايا
"أنا واقف في المحل ، أشتري قميص أسود ولا تركوازي"
"أسود"
"أنا قدام محل كشري ، أدخل"
"إرجع"
كانت المكالمه عباره عن رد واحد منها وساعات مكنتش بترد ، حبيتها فوق ماتتخيل أو أي حد يتخيل أنه ممكن يوم بتحب حب مختلف
رنيت عليها يوم الخميس الساعه ٥ وربع بتاريخ ١١/٦
"أقفي في البلكونه عايز أخد رأيك في حاجه "
حطت الطرحه ع شعرها وطلعتلي ، شاورتلها ع نفسي وإني قدرت أخس وبدأت اشيل اوزان أتقل في الجيم
وشاورتلها ع بدلتين ، واحده لونها رصاصي والتانيه أسود
شاورت بصباعها ع الأسود وأبتسمت
بعد ساعه ونص طلعت خبطت ع بابها وأنا لابس البدله السوده ، فتحتلي ضحكت أول ما شوفتها
"حبيت أخد رأي والدك في لون البدله "
"كنت هزعل لو كنت أخدت رأي حد تاني"
قريت الفاتحه وأنا في كل حرف في كل أية بحمد ربنا إنها وافقت
أول خروجه لينا بعد الجواز كانت ع الكورنيش ، وقفت قدامها وقولتلها "هحقق كل حاجه اتمنيتها إنهردا"
مسكت أيدها وشبكتها في أيدي ومشينا ، وقفت عند الراجل بتاع البطاطا وكلنا ، خلعت الجاكيت ولبستهولها ، روحنا كتبنا ع الدبل من جوه أسامينا ، عملت الفون سايلنت وانا معاها
وأخيرآ قعدت بيها ع الكورنيش قدام النيل وجبت دره
"تعرفي ، أنا كنت دايما بقعد هنا وأتخيلك جنبي ، والبحر دا يشهد كام مره بصيت جنبي وأبتسمت علي اني ببتسملك"
🌸🌸🌸💜
