أول ما طلعت من بيتها بعد الخطوبه وتلبيس الدبل رنيت عليها قولتلها هاتي أرقام أقرب الناس ليكي ، كانت مستغربه أني هعمل إيه بأرقام بنات بس عشان بينا "ثقة كبيرة" عطتني سبع أرقام
بنت خالتها ، البيست فريند ، أصحابها المقربين ، خالتها الصغيره ، بابها ومامتها ، أختها الكبيره
بعتلها علي الواتساب قايمه بأقرب الناس ليا ، قالتلي أعمل إيه ، قولتلها هنبني حياه بالأرقام دي ، طلبت منها تتصل علي ارقام الناس اللي بعتهالها وتطلب منهم "نصيحه" لينا نكمل بيها سوا
أقرب ناس لينا ، ناس عارفينا وعاشرونا وشافونا في كل وقت صعب وسهل ، ناس شافت اللي جوانا مش اللي احنا عليه ، ناس هتدينا "الخلاصه" عشان أحافظ عليها وهيا تحافظ عليا
رنيت علي الارقام اللي هيا بعتتهالي وهيا رنت علي الأرقام اللي أنا بعتهالها
عرفت من صحابها إنها "بتحتاج أثبات لكل حاجه حتي حبي ليها هتحتاج دايما إثبات عليه عشان تطمن ، أهم نصيحه أتكلم دايما وماقفلش موضوع هيا لسه ماتراضتش فيه ، أغسل المعلقه بعد ما أقلب بيها حاجه عشان دي أكتر حركه بتعصبها ، نصيحه مامتها ليا إني بالتسايسه هشوف منها أحلي معامله ، أسيبها في الحمام بالتلت ساعات عادي وماقلقش عليها ، أتهاون معاها علي قد ما اقدر ، أستحمل جمله "أنا ماعنديش لبس" اللي هتقولهالي دايما وهيا رايحه اي مشوار ، ماقفش جنبها في المطبخ عشان هاتتهمني في اي خطأ يصدر منها ، أنها مش محتاجه تتحب قد ما محتاجه تطمن"
النصيحه اللي سمعتها من كل اللي كلمتهم وأكدولي عليها إنها بتخاف من إحساس إنها شخص عادي ماحققتش اي حاجه في حياتها ، هاتيجي دايما تسألني أنا عملت إيه في حياتي ، انا وصلت لسن كذا وماحققتش حاجه ، أنا ممكن أشتغل في مجال كذا وانجح ، مش عايزه أحس أني ست بيت وبس ، أجرب المشروع دا ، عايزه اسيب بصمه
اتفقت معاها مانحكيش لبعض النصايح اللي خدناها من الناس المقربه لينا ، يكفي إننا نطبقها عشان نحافظ علي بعض وتكون حياتنا بسيطه وسهله ولينه
حياه قبل ما ندخلها عارفين هنتعامل مع بعض ازاي عشان مانصعبش الأمور علي بعض ، هندور علي راحه بعض ومانعملش غيرها
ماعرفش صحابي قالولها إيه عني ، بس لاحظت إنها مابقتش تقاطعني في نص الكلام زي عادتها ، بتأكد علي الميعاد خمس مرات عشان منساش ، بتديني مناديل قبل ما أخرج من بيتها لإن إيدي بتعرق بسرعه وبنسي أشتري مناديل ، بتتخانق معايا وتردلي الكلمه بكلمه وإحنا بنتخانق عشان مش بحب السكوت "ضحك" حاسس إن حد من صحابي قالها خديه علي قد عقله هو طيب وأهبل ، عشان بقت بتقولي حاضر وتحطني قدام الأمر الواقع بعدها بكام يوم
دي كانت أعظم فكره عملتها في حياتي ، ماجتش في مره وزعلتها الا وانا عارف ازاي هراضيها ، ولا عديت معاها في فتره الا وانا عارف إزاي هنخرج منها ونعديها..مع بعض
🌸🌸🌸🌸
