မောင့်ကြင်ယာတော်/ေမာင့္ၾကင္ယာေတာ္(Completed)

၃၄

Unicode

ဖယောင်းတိုင်မီးလေးတွေ ထွန်းညှိထားတဲ့အခန်းတစ်ခုအတွင်းသို့ ဝတ်ရုံပါးလေးတစ်ခုကိုဝတ်ဆင်ထားသောမိန်းမငယ်လေးဟာ ဝင်ရောက်လို့လာသည်။ဝတ်ရုံကပါးလွှာလွန်းတာကြောင့် သူမရဲ့ဆွဲဆောင်မှုပြင်းလွန်းတဲ့အတွင်းသားအမို့အမောက်တွေကို မြင်တွေ့နေရသည်။သူမကတော့သေဆုံးသွားတဲ့ရန်ဘုရင်ရဲ့အချစ်ဆုံး မိဖုရားပင်ဖြစ်သည်။

သူမကအခန်းတစ်ခုလုံးကို ဝေ့ဝဲကြည့်လိုက်သည်။သူမရဲ့အကြည့်‌တွေကအခန်းထဲကကုတင်ထက်မှာလှဲလျောင်းနေတဲ့ လူငယ်တစ်ဦးထံသို့ရောက်ရှိသွားသည်။ထိုလူငယ်ဟာ မျက်နှာတစ်ဝက်ကိုဖုံးထားတဲ့မျက်နှာဖုံးတစ်ခုကိုဝတ်ဆင်လို့ထားပြီး ကုတင်ထက်တွင်သူ့ရဲ့သွေးကြောအဖြိုင်းဖြိုင်းထနေတဲ့ လက်ဖြင့်‌ခေါင်းကိုထောက်ထားကာ ငြိမ်သက်စွာလှဲလျောင်းနေသည်။

လျော့တိလျော့ရဲဝတ်ဆင်ထားတဲ့ ဝတ်ရုံကြောင့်ထိုလူငယ်ရဲ့ နဂါးပုံတက်တူးဝင့်ကြွားစွာရှိနေတဲ့တောင့်တင်းနေတဲ့ရင်ဘတ်ကို မြင်တွေ့နေရသည်။မျက်နှာကိုဖုံးကွယ်ထားပေမယ့်လည်းထိုလူငယ်က ချောမောခန့်ညားမယ့်လူငယ်ဆိုတာတစ်ချက်ကြည့်ရုံနှင့်သိနိုင်သည်။ထိုလူငယ်ရဲ့ခန့်ညားမှုကိုမြင်တွေ့လိုက်ရတဲ့ ရန်ဘုရင်ရဲ့မိဖုရားဟာရှက်သွေးဖြာသွားရသည်။

ဒီလိုချောမောခန့်ညားတဲ့လူမျိုးဆိုတာ သူမလိုလှပတဲ့လူနဲ့သာလိုက်ဖက်တာ။ပြီးတော့ဒီလိုတောင့်တင်းခိုင်မာတဲ့လူငယ်က ရန်ဘုရင်ထက်စာရင်အိပ်ယာထဲမှာဆိုအကောင်းမွန်ဆုံးစွမ်းဆောင်နိုင်မယ်ဆိုတာသူမသေချာသိသည်။သူမဆုံးဖြတ်လိုက်သည်။ဒီလူကိုသူမအပိုင်ဖြစ်အောင်လုပ်ရမည်။ထိုလူ့ကိုစတွေ့တည်းကသူမရဲ့အကြည့်တွေကိုထိုလူ့ဆီကမခွာနိုင်ခဲ့ပေ။ဘေးနားမှာရန်ဘုရင်ရှိနေလို့သာသူမဘာမှမတတ်နိုင်ခဲ့တာ။အခုတော့ရန်ဘုရင်ဆိုတဲ့အဘိုးကြီးလည်းသေပြီ‌ဆိုတော့ သူမစိုးရိမ်နေစရာမလိုတော့ပေ။

သူမထိုလူကိုစိုက်ကြည့်နေတုန်းမှာပဲ ထိုလူရဲ့ရွှေဝါရောင်မျက်လုံးတွေက ပွင့်လာသည်။ထိုလူရဲ့စူးရဲတဲ့မျက်ဝန်းတွေနဲ့သူမအကြည့်ချင်းဆုံမိချိန်မှာတော့ သူမမျက်နှာလေးရှက်သွေးဖြာမှုကြောင့်နီရဲသွားရသည်။ထိုလူ့ရဲ့နှုတ်ခမ်းဖျားတွေကသူမကိုမြင်ချိန်မှာတော့ ပြုံးယောင်သန်းသွားတာကြောင့်သူမရဲ့ကိုယ့်ကိုကိုယ်အပေါ် ယုံကြည်မှုတွေမြင့်တက်လာသည်။သူမရဲ့အလှကိုဘယ်ယောက်ျားကမှ မငြင်းဆန်နိုင်ပါဘူး။ထိုလူငယ်ရဲ့အပြုံးတွေကအေးစက်နေတယ်ဆိုတာကိုတော့သူမသတိမထားမိခဲ့။သူမခန္ဓာကိုယ်ကို ညွှတ်ကိုင်းကာထိုလူငယ်ကိုနှုတ်ဆက်လိုက်သည်။