جبتلكم روايه جديده بس المره هادي كوميدي ورومانسية ..... مافيهاش نكد ههههههه
ح تكون كل يوم بموضوع مختلف وا نشالله تعجبكم ....
#يوميات_مرتي_البايرة
الحلقة (1)
المقدمة ......
أنا اسمي سامي عمري 35 سنة مهندس ونشتغل في شركة والحمدلله .... من فترة قريبة اتجوزت سناء اللي هي حبيبتي ومرتي وكل شي .... وطبعا أنا بوي متوفي من زمان الله يرحمه وعندي أختي أصغر مني اسمها هديل عايشة مع أمي الله يحفظهم ويطول في عمرهم هما الزوز ....... وأنا سناء عايشين في شقه فوق حوش العيله ... و في هــــــالرواية كل مره بنحكيلكم ع المواقف اللي تصير معانا ....
عنوان الحلقة ( مازلت عروسة)
روحت من العمل مع الساعة 2:20
خشيت الشقة ... التفتت يمين ويسار ..... الشقة قاعدة مظلمة
كنت جايب معاي حاجات حطيتهم في المطبخ
والمطبخ كان مقلوب وحالته حاله ......
مشيت لدار النوم والهانم في سااااااااابع نومه
أنا :- سنااااء ...... سناااااااااااء نوضي الدنيا قايله وانتي مزال راقده
سناء :- حبيبي خليني نبي نرقد مزال بدري
أنا :- بدري ؟؟ قولي والله ؟؟
مشيت شور الروشن وفتحت الستارة وطفيت المكيف ( الوقت كان صيف)
أنا :- هيا نوضي اغسلي وجهك و صلي ......
سناء : نضت قبل شوية صليت ورقدت !!
أنا :- نعم؟؟؟!! نضتي ورقدتي ؟؟ باهي خيرك ما ضميتي الحوش .... رايح تقول صايرة فيه اشتبكات
سناء :- تو انضمه أنا مازالت عروسه ع الضم والشقا !!
أنا :- ومن قاللك العروس ما تضمش وما تطيبش ؟؟ وبعدين لينا 3 شهور متجوزين ..... خلاص عاد مش معقولة كل يوم ننزلو نتغدو عند أمي ....... ولا نجيبو جاهز من برا
سناء :- اففففففففففف باهي خلاص توا انوض ......
أنا :- هههههههههه هاتي بوسه ......
سناء :- انلااااااا ......... وخشت تجري للحمام
أنا قعدت نبتسم و بدلت حوايجي وصليت الظهر وقعمزت في الصالون
بعد شوية جت سناء قعمزت جنبي ......
أنا قعدت نشبح فيها ....
سناء :- خيرك تشبح فيا هكي
أنا :- نوضي ضمي الحوش يا مرا..... مش معقوله هكي حايس ....
سناء :- باهي خيرك تعيط أنت ..... وبعدين علاش مستعجل أنت
أنا :- تحكي جديات أنتي ؟ ....... انا مش مستعجل ..... بس عارفتيني أنا اكثر حاجة ندقق عليها النظام والنظافة ....
سناء :- يا وخيتي سلمه راجلي اللي يحب النظام 😍😍
وقعدت تقرص فيا من خدودي ........
أنا :- لاااااااااا ما تغيريش الموضوع ..... باهي نقولك توا انا انوض انضم معاك بس الله يربحك طيبيلنا الغدي ..... نبي نذوق تطييبك لعند توا ما ضقته ....
سناء قعدت تحرك في صوابعها علي كتفي وقالت بصوت ناعم :- امممممممم وباهي شن تبي انطيبلك ؟؟
أنا :- اللي يخطر علي بالك ....... أصلا أي حاجة من يديك حلوة ....
.
.
سناء :- باهي ...
و ناضت للمطبخ وكنت عابي عليها ادير غدا مسقم زي الناس ...... وفرحان أنها أول مره بتطيبلي وقعدت في المطبخ أكثر من ساعة
و انا في الوقت هذا ... قعدت نضم في اللي قدرت عليه من الصالة والدار وفتحت الرواشن باش الحوش يتهوى .....
وجيت قعمزت ع طاولة الأكل
قعدت نادي علي سناء ....
جت تجري من المطبخ ....
وقعدت نشبح فيها من فوق للوطا ( كان دبشها ملبز تقول طالعة من عركة في المطبخ)
أنا :- خيره حالتك موليه هكي ؟؟؟!!😒😒
سناء :- خيرني ؟؟!!
أنا :- لا شي ..... امتى بتحطي الغدي .... راااه جعااان وتعبان نبي نرقد
سناء :- هيا دقيقتين ويكون واتي ......
.
.
بعد شوية جت سناء وحطت قدامي صونية ......
قعدت نشبح في الصونية مستغرب ......😲😲
أنا :- هذا شني ؟؟
سناء :- دحية ههههههههه
أنا :- كيف يعني دحيه ؟؟؟ ليا قريب ساعتين نستنى وفي الخير تطلع دحيه .....😡😡😡😡
سناء :- المهم حاجة تتاكل يا بيبي ..... ما خاطريش ندير شي أنا
لنقني فصلت عليها .........
أنا :- والله ما تتحشمي ..... ما سدش جاي تعبان من العمل لا ضامه حوش لا مطيبه غدي وفي النهايه تخليني نستنى ساعتين وتطلع في النهايه دحيه !! اماله علاش متجوز أني ؟؟
سناء :- ........................
نضت خذيت الصونيه وحطيتها في سطل الكناسه (حشاكم)
وخذيت دخاني ومفاتحي وطلعت ........
وخليت سناء تبكي ......
.
.
نزلت لوطا قبل بنخش عند أمي ...... بعدين غيرت رايي قلت أكيده مقيله عاد الناس الكبار وقت القايله عندهم مقدس
.
تعوذت من الشيطان ومشيت لمطعم كان قريب من الحوش
نزلت وخذيت طلبية ليا ولسناء .....
و وروحت للحوش ......
خشيت للحوش القيته مضموم ونضيف يبرق من النظافة هههههه وصنه البخور واصلة لأول الشارع
المهم ابتسمت ........
وخشيت حطيت الحاجات ع الطاولة ........
خشيت لسناء في الدار ... لقيتها زي الملاك راقدة
قعمزت بجنبها وقعدت نشبح فيها كيف حلوه وهي راقده
حطيت يدي علي خدها ... بس هي حست عليا وناضت .......
بس لما شافتني .... لوت بوزها وانقلبت ع الجهة التانية .....
أنا :- سونه حبيبي ..... نوضي جبت الغدا من برا
سناء :- لا مانبيش .....
أنا :- غير نوضي ..... عارفك زعلتي من كلامي مبدري بس أنا آسف
سناء :...................
أنا :- و راس سونه نوضي ..... كان ما تبيش تاكلي حتى انا مش واكل
سناء شبحت فيا :- لا أنت من الصبح ما كليتش حاجة .... نوض كول
أنا :- ما نيش نايض لعند ما تنوضي أنتي ......
ناضت من السري بدون ما تكلمني وخشت للحمام غسلت وجهها وطلعت
.
.
و احنا مقعمزين ع صفرة الغدي
أنا :- عطيك الصحة علي ضم الحوش
سناء :- سلمك .....
أنا :- هكي تو تمام ...... شوفي قداش حلو الحوش لما يبقى نضيف .......
سناء :- أنا آسفة ..... معاش نعاودها ....
أنا :- لالا عادي سونتي سوء تفاهم وانحل
سناء : معليش انا اصلا مازالت عروسه وما تعودت ع النظام الجديد ...
يتبع ..............
