#يوميات_مرتي_البايرة
الحلقة ( 7 ) و #قبل_الأخيرة
عنوان الحلقة : نبي نشتغل ...
#ملاحظة حلقة اليوم مافيهاش كوميدي بس . الموضوع مهم ولفت انتباهي وقلت لازم نتكلم عليه !!
في حلقة اليوم سناء .... هي اللي بتتكلم ...
#####
عاد أنتم تعودتوا عليا في الروايه أني بايره وهبله ونحط في سامي في مواقف بايخة ....
بس أنا لما ندير الحاجة وتصير فالطه بعدها .... أكيد مش بقصدي ...
و حاولت بكل جهدي أني نتغير و نحسن من وضعي .... لأن سامي بجد تعب معاي
لكن في الفترة هادي الأمن مستتب والله يثبت علينا العقل والدين هههههههههه....
أصلا سامي .... باله واسع وما ياخذش في الموضوع من زاويه ضيقه
كان هادا لولا هكي أنا راه من زماااااان في حوش أهلي ... ربي يخليه ويحفظه ليا حبيبي !!
.
.
مر علي العرس متاعنا أكثر من سنه وأنا قعدت مكسده في الحوش بروحي ...
سامي كل يوم يطلع من الصبح ومايرجع إلا الظهر تعبان
يادوب يخش يتغدى ويرقد بعدها ....
وفي العشية ينوض يطلع يقعد مع أصحابه في الشارع ...
وفي الليل يخش يتعشى ونهدرزوا شويه وبعدها يرقد ...
وهكذا كل يوم علي نفس الروتين .......
و أنا قعدت نقلق من قعدت الحوش ....
فقررت أني ندور علي عمل ونشتغل
أنا خريجة مختبرات ..... متخرجة من سنتين ...
بس لما اتزوجت قلت خلي انأجل فكرة الشغل شويه .....
لعند ما يستقر زواجنا .......
.
قلت خلي نخبر سامي بالقرار اللي اتخذته
.
.
في الليل كنا قاعدين في دار النوم ....
ونتفرجوا علي برنامج في التلفزيون .....
وكل مره نشبح في سامي .... نبي نقوله بس نتردد ...
.
.
سامي :- خيرك من امبدري تشبحي فيا ؟؟
أنا :- لالا شي ... شن يعني ممنوع نشبح لراجلي ؟؟
سامي :- تفرجي تفرجي ع البرنامج ..... وخليني نتفرج !!
.
.
قوليله ..... هيا قوليله .... لالا خليها بكره .... باهي وعلاش مش توا .... انتي علاش خايفة ؟؟ قوليله توا
.
.
كانت الأفكار هادي كلها في راسي ..... بس قررت أني نقوله في الآخير
أنا :- سامي حبيبي ؟؟
سامي :- هاااااا؟؟
أنا :- نبي نقولك علي حاجة !!
سامي :- قووووولي !!
أنا :- بس أوعدني أنك تسمعني للآخر !!
سامي :- بالله احكي .... ما تقعديش اتلفي وادوري !!
أنا :- يا سامي أني والله قلقت من قعدت الحوش ونفس الروتين .... نبي نشتغل أقل حاجة نغير جوي شويه !!
سامي :- هههههههه هههههههههههه ههههههههههه
.
.
كان يضحك من وسط خاطره .....
كان هازي علي كلامي !!
أنا :-- شن يضحك فيك .... شن قلت أنا ؟؟
سامي :- نوضي طفي الضي ..... وارقدي .... قالك تبي تشتغل هههههه
.
.
وجعني سامي كيف قعد يتسهوك عليا .....
زعلت منه الحق ....
نضت طفيت الضي ورقدت .........
.
.
تاني يوم في الصبح نضت وتيت الفطور و نوضت سامي
لبس دبشه وجي قعمز عشان يفطر .....
بس انا قاعدة واخذة علي خاطري منه .... ع اللقطة اللي دارها امبارح ...
سامي :- كولي ..... خيرك ؟؟
انا :- لا مانبيش ....
سامي :- باهي خيرك تكشخي .... ولاويه بوزك من ع الصبح ؟؟
أنا :- لا ما فيه شي !!
سامي :- قصدك زعلانه علي الكلام اللي قلتيه ليا امبارح ؟؟
أنا :- ايه زعلانه .... انا نتكلم معاك جديات وانت تضحك وتقوللي طفي الضي وارقدي ؟؟
سامي :- شن بنديرلك لأن كلامك ضحكني
أنا :- شن فيه ما يضحك كلامي ؟؟
سامي :- سناء ماتنفخيش راسي من ع الصبح ..... فكرة الشغل هادي حوليها من راسك !!
أنا :- عطيني سبب واحد يخليك ترفض فكرة أني نشتغل ....
سامي :- هكي أنا ما نبيكش تشتغلي !! ....... أنا مش مقصر معاك في شي والحاجة اللي تبيها توصلك لعندك !! مرتبي الحمدلله يكفي ويوفي ....
أنا :- أنت مش فاهمني ... انا مليت من قعدت الحوش أنت مش حاس بيا !!
سامي :- شني انتي أول وحده ولا آخر وحده قاعدة في الحوش ..... سناء بطلي دلع زايد !!
أنا :- بسسسسسس !
قطع عليا كلامي .....
وقعد يعيط بصوت عالي .....
""سناااااااااء قتلك مافيش شغل يعني مافيش شغل !!!!!
.
وخذي مفاتيحه واللابتوب متاعه وطلع وصكر الباب "طااااااااااااااااف"
أنا :- هكي !! ماااشي يا سامي .....
نبي نعرف علاش مصكر دماغه هكي ..... المشكله حتى النقاش ما يبيني نتناقش معاه في الموضوع هذا !!
.
قررت حتى الغدي ما نطيباش وحتى في حوايج تبي الغسل في الغسالة ... فتتهم ...
ضميت الحوش بس .... قلت مرات يجي حد .....
وقعدت مقعمزة ..... ونفكر وأنا طايرتلي !!
.
.
قلت لازم نكلم حد ويدخل عشان سامي يقتنع !!
امممممم بس زعمه من؟؟
أمي ؟؟؟ لالا أكيد بتزيد اتطين الحكايه !!
خلاص خلي نكلم عمتي .... أصلا سامي يحبها وااااجد وما يردلهاش طلب ....
.
.
نزلت لوطا مع الساعة 11:30 ....
وخشيت عليها القيتها كيف نايضة وتفطر
هديل شكلها ماشية للجامعة و موتيه الفطور لأمها .....
أنا :- صباح الخير يا عمتي !!
عمتي :- صباح النور يا بنيتي ... خشي تفضلي
أنا :- دام فضلك ....... وقعمزت جنبها ...
شن حالك يا عمتي اليوم ؟؟
عمتي :- والله ركابي يوجعو فيا لكن الحمدلله على كل حال .....
.
انا :- لا باس عليك انشالله
عمتي :- تعالي كولي يا بنيتي سايريني !!
أنا :- والله جيعانه حتى الفطور ما فطرت ...
زدت قربت جنب الصفرة ... وقعدت ناكل معاها ...
.
.
عمتي :- خيرك يا سنيوه ؟؟ شكلك مش عاجبني !!
أنا :- متعاركه أنا وسامي ....
عمتي :؟- خيركم بسم الله ؟؟
أنا :- قتله أنا نبي نشتغل وهو ماباش يخليني
عمتي :- وانتي علاش تبي تشتغلي ؟؟ شن تبي في الهم والشقا
أنا :- ملييييييت والله مليت من قعدة الحوش ..... وبعدين أنا واخذه شهادتي عشان نشتغل مش عشان نقعد في الحوش
عمتي :- يا بنيتي والله ماني عارفة شن نقوللك .... لكن سامي في الحاجات هادم طبعه صعب ومستحيل يقتنع ...
أنا :- يعني نقعد في الحوش لا طلعة لا خشه ؟؟
عمتي :- انزلي هدرزي معانا .... ومره مره امشي هدرزي علي جاراتك وأمك وخواتك وخلاص ....
.
.
عرفت أن مافيش فايده من النقاش مع عمتي .....
حتى هي تفكر زي سامي !!
المشكله مافيش حد فاهمني وحاس بيا ....
من الوحده اللي حاسه بيها في الحوش لين قريب نقعد نتكلم مع روحي !!
.
.
قعدت في حوش عمتي لعند الساعة 2:00
وطيبتلها الغدي(مكر في سامي) وضميتلها الحوش
هديل روحت من الجامعه .....
وحتى سامي روح من العمل ... بس شكله ركب للشقه طول
ودور عليا والقاني مش قاعده .... والغدي مافيش والحوايج مش مغسوله
نزل يجري لحوش أمه .....
سامي :- سلام عليكم ....
هديل و أنا وعمتي :- و عليكم السلام
سامي :- سناء وين الغدي ؟؟ وخيرك قاعدة هنا ؟؟
أنا :- ...................
سامي بنبرة حمق :- انا نكلم فيك ردي عليا ؟؟
هديل ناضت خشت لدارها .....
عمتي :- وسع بالك يا وليدي .... بشوية عليك
.
.
سامي :- أنا نكلم فيها وما تبيش ترد عليا
عمتي :- سنيوه حكتلي أنتم متعاركين .... خليها تخدم يا سامي
.
سامي قعد يشبح فيا و هو مفنص وقعد يهز في راسه ....
سامي :- قعدتي اتطلعي حتى في أسرارنا يا سناء ؟؟
عمتي :- هي ماحكتش لحد براني .... وبعدين أنا اللي سألتها ...
.
.
سامي صبى ....
سناء الحقيني فوق ..... وطلع وصكر الباب بقوة !!
ههههه يفش في غله في الباب ........
لكن شكلها بتصير عركة سمحه فوق .....
.
.
عمتي :- ارفعيله غدي معاك .....
أنا :- حااااااضر ...
.
ورفعت الصونية وركبت الدروج
وأنا نرعش وخايفه وقلبي يدق بيطلع من مكانه ... لأن سامي شكله فاصل ع الآخــــــــــــــر
خذيت نفس وغمضت عيوني ..
خشيت فتحت باب الشقة ....
حطيت الصونيه ع الطاولة اللي كانت في الصالة ....
وقعدت واقفة في مكاني و ندور بعيوني علي سامي وييين !!
أنا :- وين مشي الراجل هذا ؟؟
.
.
كان مقعمز وراي وأنا خشيت وما شفتاش ...
سامي :- قعمزي !!
أنا نخلعت منه ....
أنا :- هيييييييييي .... خلعتني !!
سامي :- أنا قتلك قعمزي !! "بنبرة حمق"
.
.
أنا :- باهيي ...
سامي عدل التقعميزة متاعه وشبك يديه :- عليش خبرتي أمي ؟؟
أنا :- أنا ما خبرتهاش هي سألتني .....
سامي :- كان قلتيلها متعاركين و خلاص !! علاش تحكي الموضوع بالتفصيل !!
أنا :- هادا اللي صار !!
سامي :- وباهي خيرك مش مدايره غدي !!
أنا :- .........................
سامي :- سناء الشغل لو طرتي ولو نزلتي مش ح تشتغلي !! ....... يعني اللي اديري فيه كله مش ح يفيدك راه !!
أنا :- بس أنا ما طلبتش حاجة مستحيله .... علاش مصكر راسك هكي !!
سامي :- بس عندي أنا مستحيله !!
أنا :- بس أنا مصره علي رايي ونبي نشتغل
سامي :- سناااااااااء ....... عندك حلين يا أنا يا الشغل وما فيش غير هكي !!
أنا :- يعني أنت تبي نختار بينك وبين الشغل ؟؟؟ علاش تحط فيا في موقف صعب زي هكي !!
سامي :- هادا هو !!
.
.
عرفت أن مافيش فايده من النقاش معاه .....
أنا :- يعني تبي تخليني نقعد خدامه في الحوش ؟؟
سامي :- شن اللي تطيب لراجلها وتخدم فيه تقعد خدامه ..... خيرهم أمهاتنا زمان قاعدات في الحوش وما يتكلموش
وعايشين وأمورهم ماشية ....
أنا :- .............
سامي :- والحاجة اللي تنقصك أو تبيها تجيك ... شن تبي تاني ؟؟
أنا :- ......................
سامي :- نوضي سخني الغدي في المايكرويف أكيد برد ..... وبالله معاش نجي نلقاك مش مطيبه غدي !!
.
.
يتبع ..................
طبعا موضوع اليوم موضوع مهم ..... ونشبح فيه يتكرر أكثر من مره ....
أن البنت لما تتزوج يقوللها راجلها مافيش خدمة
أو أنها مسكينه تقعد بخدمتها ويبطلها من شغلها .....
هكي حراااااام و ظلم ......
بس في بعض بنات .....
يكونو متفقين من الأول أنها معاش تشتغل ....
أو أن هي أصلا ما تبيش تشتغل .....
وكــــــل واحد وعقليته وكيف يفكر !!
.
.
تابعو الحلقة الأخيرة من #يوميات_مرتي_البايرة
.
.
وانتظروا روايتي الجديده ......
#خدعت_بوعد_داعش
