#يوميات_مرتي_البايرة
#الحلقة ( 8 ) و #الأخيرة
عنوان الحلقة :- جانا بيبي ....
.
.
في يوم كنت قاعد نشتغل في المكتب .....
جاني اتصال من سناء ....
أنا :- ايوااا
سناء :- اهلين يا سامي ... اسمع لازم تجي للحوش ضروري !!
أنا :- شن فييه يا سناء .... أنا قاعد نشتغل ومشنوق من رقبتي !!
سناء :- في موضوع ضروري لازم نقولك عليه
أنا :- احكي ... حتى ع الهـــاتف يا سناء
سناء :- لا ما يجيش لازم تجي للحوش .... ضرووووري يا سناء
أنا :- اففففففف منك يا سناء .... تو نشوف .... صكري توا بس
.
.
زعمه شن تبي سناء ....
.
عند سناء في الحوش
########
كنت فرحانه بكل ... ومش مصدقة ... عشان هكي اتصلت بسامي عشان يجي أول ما عرفت بالخبر !!
كنت نبيه يعرف أول واحد .... بأنه ح يقعد بابا وأنا ح نقعد ماما !! وأخييييرا بعد قريب سنتين من الانتظار !!
نبي نشوف شن ردة فعله كيف بتكون ... أكيد ح يفرح !!
.
.
بعد حوالي ساعة ...
سامي روح للحوش
وقعد يدور علي سناء ....
سامي :- سناء .... سناء ....
أنا :- تعال أنا هنا في الدار قاعدة ....
.
.
سامي وقف في باب الدار وقعد متكي عليه .....
سامي :- احم
أنا ابتسمت ....
سامي :- بالله خيرك ؟؟ خليتيني نروح من العمل وأنا خايف أنه صارتلك حاجة
قاعده نبتسم .....
سامي :- سناء شن فيه ؟؟ ابتسامتك هادي أني مش متريحلها
.
نضت من مكاني طلعت كوتي صغير وعطيته لسامي ....
سامي وهو يفتح في الكوتي :- هادا شني ؟؟ انشالله غير مش غالطة في عيد ميلادي مره ..................... تانيه
وقعد يشبح فيا :- هادا شني يا سناء ؟؟
أنا :- هههههههه أنت شن تشبح فيه
..... كنت حاطه في الكوتي ... كندره متاع بيبي صغير ....
سامي :- قصدك حقه ؟؟ سناء انتي حامل ؟؟
أنا :- ايييه .... درت تحليل حمل منزلي وطلعت النتيجة موجبة ... بس لازم نمشو نديرو تحليل في المستشفى عشان نتاكدوا ميه في الميه سامي :- أنا مش مصدق أني ح نصير أب !! .... هيا البسي خلي نمشو للمستشفى توا !! أنا مش قادر نصبر ...
أانا :- ههههههههه باهي
.
.
والبست عبايتي ومشينا للمستشفى
درت التحليل وقعدنا نستنوا علي أعصابنا في النتيـــجة
بعد نص ساعة ....
النتيجة طلعت .....
وخشينا للدكتورة عشان تشوف النتايج ...
خذت الورقة وقعدت تقرا فيها ...
سامي :- هااا يا دكتورة طمنينا ؟؟
الدكتورة :- مبروك يا سناء انتي حامل في الشهر الثاني
قعدنا انا وسامي نشبحوا في بعضنا وفرحانين ....
و سامي وجهه قعد أحمر من كثرة الضحك والفرح
والدكتورة :- تعالي خلي نشوفوا وضع الجنين
ومشيت رقدت ع السرير و حطتلي جاهز الإيكو
سامي كان مركز في شاشة الكمبيوتر أكثر حتى من الدكتورة
بعد شويه قعدنا نسمعوا في صوت النبض متاع البيبي
أني الحق معاش قدرت نمسك دموعي و تأثرت هلبا .. قعدت نبكي !!
سامي حتى هو عيونه تعبو دموع ..... دموع الفرح !!
سامي :- باهي يا دكتورة البيبي ولد ولا بنت !!
الدكتورة :- حاليا مش واضح كويس ..... تعالو الأسبوع الجاي باش نقوللكم !!
سامي :- تمام .... سناء هيا نوضي ... خلي نمشوا للحوش !!
أنا :- تمام ....
.
.
وسامي فرحااان بككل والأرض مش واسعاته ....
فتح باب الحوش
سامي :- بشويه عليك .... امشي بالشويه
أنا :- ما تخافش مش ح تصير حاجة للبيبي !!
سامي :- خلي نمشو نخبرو أمي !!
.
و خش سامي وانا وراه ....
سامي :- سلام عليكم يا حاجه
عمتي :- وعليكم السلام ....
سامي خشي يا سناء ... قعمزي لكن بشويه عليك ....
عمتي قعدت تشبح فينا وهي مستغربة من كلام سامي !!
عمتي :- وين كنتو أماله .... شكلكم كنتوا طالعين !!
سامي :- كنا في المستشفى !!
عمتي :- خيركم لاباس انشالله ؟؟
سامي :- ح تقعدي حنينه قريب .... سناء حامل
وقعد يضحك .....
وقعدت عمتي تزغرط وضمتني ....
" مبروووك" يا بنتي ... الحمدلله اللي عشت وشفت هادي اللحظة !!
الحمدلله و آخيرا "مسعود" يبي يجي !!
أنا استغربت :- من مسعود يا عمتي ؟؟
عمتي :- الولد اللي بيجي بنسموه مسعود
أنا :- لالالالالا ... أنا نبي نسميه صدام
سامي :- لالا ... مافيش خير من اسم المرحوم بوي .... عبدالمالك
.
.
وقعدنا نتنقاشو ....... كل واحد يبي يسمي الاسم اللي يبيه
أنا :- على فكره الدكتورة مازال ما قالت البيبي بنت ولا ولد .... مرات تطلع بنت
عمتي :- لالا احني نبوه ولد ... ما تقعديش تجيبيلنا في البنات ..... اااايواااه
( بدينا في الجو متاع العزايز)
أنا :- اللي يجي من ربي كويس ويا محلاه ...
عمتي :- سامي انت شن تبي ولد ولا بنت ؟؟
سامي :- والله الحق اللي يجي من ربي كويس ... بس أنا خاطري في بنت !!
عمتي :- هيييييي بدل ما تقول ... تبي ولد يحمل اسمك ... تقول تبي بنت؟؟
ضايقتني الحق !!
أنا :- اهو هديل بنت وقاعدة تخدم فيك ليل و نهار !! خيرهم البنات ؟؟
سامي :- باهي ... سناء تعالي نركبوا فوق عشان ترتاحي شويه ....
عمتي :- ما تخافش ما يصيرلها شي !! ... اهو خيرنا احني زمان نشتغلو و نضموا وبصحتنا ويجي العيل ما فيه شي ... بنات آخر زمن !!
أنا :- سامي تعال ساعدنيباش انوض .... هههههههه درت الحركة هادي بلعاني عشان نغيضها ....
.
.
المهم ركبنا أنا وسامي فوق ...
وهو طول الطريق ....
"ردي بالك .... أمشي بشويه وووووو.....
أنا :- والله يا سامي أنا كويسه !! ما فيا شي !!
سامي :- تو معقوله أنتي مش حاسه بدوخه ولا حاجة ؟؟
أنا :- لالا ... مش حاسه بشي ....
سامي :- غريبة أنا نعرف النسوان يتعبوا .... في أول شهور من الحمل !!
أنا :- ايييه بس مش كلهم ....
سامي :- باهي سونه تبي حاجة ... ولا خاطرك في حاجة ؟؟ قولي ما تتحشميش
أنا :- يا وخيتي سلمه ... توا لا ... بس أكيد بعدييين وتي روحك هههههههه
.
.
بعد أسبوع .....
مشينا للدكتورة وخبرتنا أن البيبي ولد
سامي :- الحمدلله على كل حال ..... أمتى يجي عبدالمالك بس !! نحس فروحي مش قادر نستنى !!!
أنا :- قصدك صدااام !!
سامي :- لا عبدالمالك ....
أنا :- ولدي و بنسميه كيف مانبي !!
سامي :- شن ولدك بروحك هو !! حتى أنا ولدي راه !!
أنا :- بس أنا اللي حامل بيه ... وأنا اللي تعبانه ... أنت مش حاس بشي !! أقل حاجة خليني نسميه !!
سامي :- بس المره الجايه لو جت بنت أنا بنسميها ....
أنا :- ههههههههه من هنا لوقتها ساهل ....
.
.
#########
و مرت الأيام والشهور ....
وسناء كل يوم تتوحم علي حاجة وخاطرها في حاجة
ومسكين سامي عشان أول مولود فرحان بككل والحاجة اللي تبيها يجيبها ليها
.
.
في يوم كانت الساعة 12 في الليل ... كانوا راقدين
سناء :- سامييييي ..... سااميييييييييي
سامي :- نععععععم ؟؟
سناء :- نبي رمان !!
سامي :- هاااااه ؟؟ توا في هـــالليل ؟؟ ... خليها بكره الصبح وأنا نجيبلك !!
سناء :- لا أنا خاطري فيه توا .... كان ما جبتها ليا مرات تطلع وحمه في راس البيبي ولا عينه
سامي نط من مكانه :- وحمه ؟؟ لالا فكينا ما نبوهاش الوحمه .... بس يا سناء توا الوقت صيف و أنا من وين بنلقى رمان ؟؟
سناء :- ......................
.
.
رفع سامي الهاتف وشاف الساعة ...
سامي :- سناء الساعة 12 وربع ... أكيد المحلات كلها مصكره ....
سناء :- بس أنا جي على بالي هكي !!
سامي ناض من السرير :- اففففففففففففف ....
.
.
ولبس دبشه وطلع في هذاكه الليل
وقعد يدور من محل لمحل ....
يـــ إما يكون مصكر أو أن الرمان مافيش
في الأخير بككل خش سوق ...
سامي :- ما دام مافيش رمان طبيعي .... خلي ناخذلها المعلب وخلاص في النهاية رمان زي بعضه ...
.
وخذي حكه الرمان من السوق ومعاها باكو عصير الرمان وطلع ....
وهو مروح في الطريق كانت في بوابه ....
وللأسف البوابة هذي وهميه ....
وكانوا يأشرو علي سامي أنه يوقف ...
سامي وقف ونزل الروشن متاع السيارة ....
سامي :- سلام عليكم
الشاب :- وعليكم السلام .... باسمك السيارة خوي ؟؟
سامي :- اييه باسمي ....
الشاب :- باهي ترا اعطينا الأوراق ....
سامي التفت فتح الدرج متاع السيارة بيطلع الأوراق ...
والتفت ع الشاب !! و كان ساحب عليه السلاح
الشاب :- انزل من السيارة !!
سامي :- وعلاش ننزل ... السيارة سيارتي !!
الشاب قعد يعيط بصوت عالي :- انزل كان تبي تعيش
التفت سامي علي يمينه ويساره كانو فيه زوز ملتمين مسلحين حتى هما ....
و اتذكر ولده وسناء وأمه و أخته ....
فقرر أنه ينزل من السيارة ....
نزل من السيارة والملثمين ركبوا للسيارة ....
ولوحو الأوراق اللي كانوا فيها ...
والكيس اللي فيه الحاجات اللي خذاهم سامي لسناء
وخذوا السيارة ومشو .....
أما سامي فكانت طايرتله بكككككل سيارته فكوها منه قدام عيونه
وماقدرش يدير حتى حاجة !!
.
.
قعد يلم في الأوراق وخذ الكيس ومشي للحوش
أصلا هو كان قريب من الحوش ...
وصل للحوش وفتح باب الحوش
كانت سناء مقعمزة في الصالون
أول ما سامي فتح الباب ....
ناضت سناء تجري وضماته.....
سناء :- سامي أنت كويس ؟؟
تو شبحت في التلفزيون أنه مدايرين بوابات وهميه ... قريب من شارعنا ؟؟
سامي :- اييه صح
سناء :- انت كويس .... وجهك رايح أصفر خيرك ؟؟
سامي :- السيارة فكوها مني ....
سناء :- هييييييييييييي
وقعدت تبكي .....
سناء :- كله مني أنا ....... آسفة والله آسفة ....
سامي :- خذت سوي وسوك ... معاش تبكي ...
سناء :- كان ممكن أن تصيرلك حاجة بسببي أنا ....
سامي :- أني كويس .... خلاص معاش تبكي .... شوفي جبتلك الرمان
سناء :- حسبي الله ونعم الوكيل فيهم أولاد الحرام ....
سامي :- خلاص أنتي توا معاش تفكري في شي ... كولي الرمان بس هههههه
سناء :- يا بارد ..... واخذين منك السيارة وقاعد تضحك ؟؟
سامي :- باهي شن بندير .... الله غالب .... لينا الله !!
.
.
بعد أيام كانت سناء في الشهر التاسع و مازال علي موعدها 10 أيام
و سامي كان في العمل ....
سناء قعدت سمينه بكككل والحركه متاعها قعدت ثقيله ....
المهم هي حست أن بطنها توجع فيها .... وفي شي غلط ...
سناء :- اااااااااااااي .........ااااااااااااي ... يا ربي هذا شنو الدكتورة قتلي الموعد بعد 10 أيام ....
خذت الهاتف واتصلت بسامي .....
سامي كان في المكتب وكانوا مقعمزين بجنبه ناس ....
رنالهاتف متاعه ....
سامي :- ألووووو
سناء :- اااااااااااااااااااااي .... سامي تعال بسرعة ... شكلني نبي نجيب توا
سناء كان صوتها عالي ... وينسمع من الهاتف ..
التفت سامي ع الناس اللي كانوا بجنبه لقاهم مركزين معاه هههههههههه
ناض من جنبهم .... وطلع برا ....
سامي :- ألووووو سناء ؟؟
سناء :- ساااااااااااااااامي ..... ااااااااااااي .... تعال بسرعة .......... وصكرت الخط ....
.
سامي معاش عرف شن يدير ...
كان فرحان بس في نفس الوقت خايف
خش للمكتب قعد يدور ع المفاتيح متاع السيارة ( شري وحده جديده بس صغيرة مش زي الأولى)
وطلع مستعجل للحوش .........
.
.
أما سناء كان في الحوش تتوجع وخلاص ...
يا دوب لحقت تحط حاجات البيبي في الشنطة وحوايجها ....
.
وصل سامي للحوش وركب للدروج يجري ....
ولقي سناء مش قادرة حتى اتصبي
طبها ونزل بيها للسيارة
سناء :- الشنطة يا سامي قعدت فوق !!
سامي زي المهبول :- هااااه؟؟
سناء :- اااااااااااااااااي الشنطة الشنطة !!
سامي :- باهي باهي ....
وركب فوق ... الشنطة الشنطة
وجابها ونزل .....خش لحوش أمه باش تمشي معاهم وطلعوا للمستشفى
.
.
في المستشفى أول ما وصلو
طلعوا الممرضات مع سامي عشان يساعدوها تخش ...
وحطوها على الكرسي المتحرك لأن مش قادرة تصبي ....
وخشت غرفة العمليات ....
.
.
و قعد سامي و أمه يستنوا برا
أم سامي :- هدي روحك يا وليدي ... علاش خايف هكي
سامي :- مانيش عارف بس خايف و متوتر بككل ...
بعد شويه طلعت الممرضة ...
سامي :- هاااه خبرينا شن صار ؟؟
الممرضة :- مرتك قالت تبيك تخش معاها
سامي :- شني ؟؟
الممرضة :- اييه هكي قالت
سامي :- باهي ..... والتفت علي أمه :- خليك هنا يا أمي ...
.
.
في غرفة العمليات
سناء قالبة الدنيا عياط .......
الدكتورة :- خوذي نفس يا سناء .... تنفسي
سناء :- اااااااااااااااي ........
ومسكت سامي من ع رقبته ......
سناء :- أصلااااااااااااا كله منك يا عن شكككككككككلك ااااااااااااي
سامي :- و انا شن دخلني ......
سناء :- اااااااي .... كلله منـــــك
والممرضات والدكتورة قعدوا يضحكوا
وسامي كان خايف بكككل ......
.
.
المهم سناء جابت البيبي
بخير وبسلامة ....
وكان حلو ويهببببل
قعدت تبكي أول ما شافاته ومسكاته ...
.
.
وبعدين طلعوها للغرفة
سامي ... اتصل بـــ أم سناء وخواتها ...
..
خشت عليها عمتها في الغرفة...
وهي تزغرط .....
وجت حتى هديل.......
أم سامي مسكت البيبي وقعدت تغني :- اهو جي مسعود .... اهو جي ... اهو جي
سامي :- عبدالمالك ... قصدك يا أمي
سناء :- قصدكم صداااام ولا ؟؟
.
.
لكن في الآخير سموه صدام في الكتيب زي ما سناء تبي هههههههههه
بس عمتها قعدت تقوله مسعود ....
وسامي علي جوه يقوله صدام ومرات يقوله عبدالمالك .... !!!!
#النــــــــــــــــــــــــــــــــهاااااااية
#العبرة من الروايه :- أنا كانت عندي رسالة و نبي نوصلها أن الزواج مسؤوليه مش بس مكياج ولبس .... مسؤوليه لازم يتحملها الراجل ومرته .... الزوز مع بعض .... وفي نفس الوقت الزواج تفاهم ووسعة بال .... لأن مافيش حاجة تجي بالعياط أو بالعنف و الضرب زي ما بعض "العقليات" ادير ..... وكل شي يجي بالتفاهم ....
في هــــالرواية اللي كانت سناء وسامي هما أبطالها شفنا سناء كيف كانت بايره بككل وكيف سامي وسع باله عليها لعند ما اسقمت وعدلت من روحها .... وشفنا المرات اللي يفصل فيهم سامي علي سناء .... بالذات لما تكون غالطة وفي نفس الوقت تصرفه الحكيم في بعض المواقف زي قصعة الكسكي ههههههههه ....
#الخلاصة أن مش لازم حياة المتزوجين تكون زي حياتهم #بالعكس ممكن تكون أحسن منهم .... و ممكن نمط الحياة هادي في ناس واجده تشوف فيه غير مناسب ليها ... وفي #النهاية أني حاولت نطرح المواضيع اللي تصير في الواقع لأني أنا إنسانة واقعية .... مع شوية كوميدي بالرغم أن في ناس وااجدة شايفة أن الروايه #بايخة وصامطة .... لكن الـــ400 تعليق هدا دليل على أن الرواية ناجحة وتلامس الواقع الليبي .....
Wesal Wesoكانت معاكم الكاتبة /
انتظروني في رواية #خدعت_بوعد_داعش
اللي ح تنزل بعدين في الليل ..
