#اتعبني برودك
#للكاتبه ام النون
#البارت السادس
مؤيد : الله لا يحرمني منج حياتي
نورهان : ولا منك قلبي... ظلينه للصبح نتراسل ونسولف ونحجي وكلام يجيبنه وكلام يودينه جنت طايره من الفرح والدنيا ما سايعتني من السعادة ف نمنه ب ٥ الصبح حضنت المخدة مالتي وتخايلتها هو نمت مرتاحة حيل وكعدت متأخره وراح عليه الدوام ف جنت النهار كوله صافنة وافكر بي واذكر كول كلمه حلوه كاله الي وكمت اتخيل اشياء حلوة نسويها سوه جان خيالي واسع حيل وجنت منتظره يدزلي مسج على نار اووف بعد ما اتحمل خلي ادز اني
نورهان : هلوو شلونك حبي.. كعدت متأخره ومارحت للكلية وانته؟
ظليت منتظرته اهواي وما رد انوب ظل بالي يمة ف كلت يمكن نايم عفته وخابرت البنات وأخذت المحاضرات منهن كمت حضرت ملابسي البسهم للدوام ونمت على الموبايل وكل شوية افز اشوف دازلي شي بس ما دز المهم صار الصبح بدلت وجان التعب والسهر مبين على عيوني طلعت للخط ف اجتني رسل
رسل : صباح الخير حياتي شلونج
نورهان : بخير الحمد الله وانتي
رسل : تمام.. شبيهن عيونج منفوخات وتعبانات
نورهان : شحجيلج البارحة الليل بس اتفزز ماكدرت انام
رسل : ليش شصاير
نورهان : ظليت احجيلها كولشي يصير ويانه اني ومؤيد بتفصيل وجان يوم يهتم بيه وعشره لا يوم يقربني ويوم يبعدني لو مرات يشوفني وكأنما ولا يعرفني جان كلش بخيل بمشاعره من عرف بيه شكد احبه ومتعلقه بي هملت صديقاتي علياء وجلنار برغم شكد جانوا يكولولي جذاب وميحبج عوفيه بس مجنت اسمع الهم من كد ما احبه ما اكدر اتقبل فكرة اعوفه جنت اهواي اعاتبه عن سبب بروده وياي واهماله وجان الرد لا اني هذا طبعي ويقشمرني بكلمتين وارجع اصدك بي واحبه واتعلق بي ف كمت احجي لرسل كولشي وهيه ما جنت تكولي لتعوفيه بالعكس جان تشجعني ف كمت اثق احجيلها لان احسها تفهمني هملت دراستي وكمت ما ادخل محاضرات ومرات اظل بغرفتي منعزلة وابجي وما اريد اشوف احد حتى اهلي ما اكعد وياهم صرت حيل حزينة ومكتأبة ما اعرف شنو اسوي حتى أرضيه او يبطل هل طبع واحتاريت بين يحبني وميحبني وما جنت اكدر اجرء اعوفه لان ما اكدر بدونه احبه برغم سلبياته جنت ناسية ماكلت لرسل اختبرتي مؤيد لو لا راحت من بالي خلي اخابرها واشوف
نورهان : دكيت عليها وره شوية جاوبت
رسل : هلو قلبي شلونج
نورهان : بخير الحمد الله وانتي
رسل : على الله.. عاش من سمع صوتج ليش مدا اداومين
نورهان : انتي اعرف بالحال ميحتاج اكولج شكد مؤيد بارد ومهمل ومتعبني
رسل : هاا همه كولهم هيج
نورهان : اكولج شصار على سالفة تختبرين مؤيد شو مارجعتيلي خبر
رسل : هاا نسيت ما ادري.. راسلته طلع ابو بنات عوفيه خلي يولي
نورهان : لا الله عليج صدوك انطاج مجال
رسل : اي والله شبيج عوفيه خلي يولي ولا يستاهلج اني لو منج اعوفه واذا تريدين ادزلج سكرين للمحادثة
نورهان : ميحتاج حبيبتي اني اثق بيج قابل شنو مصلحتج تجذبين عليه اني أعلمه جان محروك دمي حيل ومتت قهر وجان مبين من بحت صوتي
رسل : اي حياتي اني اصلا اريدلج الخير (دعوفي الي والله الا اخليه يحبني والا اكرهج بي)
رسل : واذا تريدين تتأكدين من كلامي اليوم راح يراسلج ويكولج راح اعوفج وهسه اشوفين واني اصلا رزلته وغسلته غسل خلي يولي هذا ( الا اشوفج نجوم الظهر)
نورهان : لا لا ما اصدك معقولة ليش يعوفني اني شسويتله بشنو اذيته وجرحته فوك مادست على كرامتي وأخلاقي ورحت صارحته واتحملت اهماله وبروده هيج يسوي ويطلع ابو بنات ويجذب عليه الله لا يوفقه كمت ابجي واختنكت واترخصت منها وسديت الخط جنت امشي وره كلامها مثل العمية ابد ما شككت بيها ف ظليت النهار كوله الوب منتظره يجي وأريد اشوف كلامها صح لو لا كول شوية فاتحه الموبايل وسادته روحي محتركة جانت ليش مؤيد هيج اسوي بيه ليش اني شسويت بشنو اذيتك حتى هيج تأذيني ظليت ابجي واملخ بنفسي ما مصدكه بعد هل حب الي حبيته اله هيج يسوي بيه معقوله واحد يأذي شخص يحبه وشاريه ويعتبره اعز من روحه ما احجيلكم الشعور الي حسيت بي شعور ندم على قهر وحسيت حتى سعادتي راحت وفعلا اجه وراسلني بليل
مؤيد : هلو نورهان اني قررت قرار واتمنى ما تسئليني ليش وتحترمين قراري
نورهان : جنت مثل الي البالعة الموس لا كدرت احجي ولا اكدر اسكت ف جنت هادئه حيل ومنتظره شيكول برغم قلبي جان حاس انو يريد يعوفني
مؤيد : ابد ما حبيتها ولا دخلت قلبي بس ما جانت عندي تجارب سابقة وجنت اشوف أصدقائي يصادقون بنات بالكلية ويطلعون وياهن ويضحكون عليهن ويعوفوهن ف جانت نورهان بالنسبه اليه فرصه ذهبيه اجتني على طبق جاهز ومن دون تعب ف حبيت اكضي وقت وياها واعوفها لان جانت مثل الورق المكشوف ما انطتني مجال اكتشفها ف جنت بارد وياها ولا اهتم الها اعوفه وارجع الها بمزاجي بس هيه جانت حيل ساذجه وغبيه وبسرعه تتقشمر وتصدك بيه برغم ما جنت واعدها بشي وبارد وهاملها ومستحيل احب او ازوج وحده صارحتني مثل ما صارحتني راح تصارح غيري ف ما أمن بيها بالمستقبل ف كلت اعوفها وادور على صيده غيرها اكضي وقت وياها واتونس وهم اعوفها
