مبرر الخيانة

بدايه

#مبرر_الخيانة "مبررات "
الحلقه :الاولى
بقلم :فاطمه سالم الورفلي
.......................
..........
أصناف الناس أربعة :
غبيّ متذاكي .....وغبيّ ....وذكيّ ...و ذكيّ متغابي👌
يُهزم كلهم ....بـ إستثناء الأخير وهو ح يكون بطلنا وبطلتنا في بيتين يفرق بينهما شارعين ...🍃بقلمي فاطمه سالم الورفلي......
.........
اني :وليدي برا قول لي بابا مايه الخط جت قوله كان بيولع البومبه خير ما يشري بوطي

مقداد يلعب بالمكعبات:حاضر ماما

اني :تي نوض هيا

مقداد :اففف ماماا خليني نلعب

اني :اقعد اقعد ما منك فايده

......
نضت ومشيت لداري لقيته راقد...

اني :عاشور تي نوض كان بتولع البومبه

عاشور بصوت ناعس:به باه

وناض لبس فالينته وطلع من الدار لحقته....فتحت باب الحوش وجيت بنطلع الخيط لقيت فوز ماشيه بي طلبيه لي عيت الفرجاني ورايحه منسرفه ورقيقه ومصهده من الشمس لين خلاص...

اني بشهقه:عاشور تعال شوف فوز يناري عليها وخلاص

عاشور حك عيونه وبرفعه حاجب قال :اممم ربي يفرج عليها هي كم عمرها؟

اني بلعت ريقي ونطلع في الخيط :بقولي اصغر مني... هاك خود الخيط ركبه دوته واجده مفروض درتله سبينيه

عاشور خدي الخيط وقعد يركب فيه وركبه وجاني...

عاشور : جمعيه قتلك متخرجه فوز هي؟

اني نفسفس:لا ياودي ما كملتش قرايتها

عاشور :امممم

اني :مسكينه قزونه وقاعده تعاني في امها وحتى خوت ما عندهاش

عاشور :اياااه به خيرك قطعتيها !

اني:اي والله صح مقصره معاها مفروض نمشيلها الحق ديما تجيني مش مبطله

عاشور :ماتجيش يا جمعيه ره هي جارتنا من زمان واقارب لازم تواصليها لان نلقو فيها احني

اني :هممم باهي مالا اسمع هي ادير في طلبيه حار وحلو مسكينيه برا اشريلها بمبله غاز وشكاره دقيقه وسبيزه زيت ومكيرينيه ورزيزه توا ونمشولها ونهدرزو عليها شن رايك

عاشور خدي المفتاح من على الطاوله وناض :به مالا هاني ماشي

اني :خلاص عدي هي ما بين ما درت حويجة كيكه ولا حاجه ناكلوها مع القهوه

عاشور :باهي مالا هاني ماشي لي محل الفرجاني يبيع بالجملة

اني :به مربوحه في امان الله

........
وطلع عاشور واني نضت للكوجينه... طلعت الدقيق وزيت وسكر وحليب ودحي و بيكن بودر... وقعدت ناخد ونحط وعجنت العجينه... وحطيتها في الطاجين....خش عليا مقداد...