مبرر الخيانة

النهايه

#مبرر_الخيانة "مبررات "
الحلقه :الرابعه والاخيرة
بقلم :فاطمه سالم الورفلي
.................
.......
عند جمعيه :
ني تنهدت وقعدت نحكيلها بتفصيل... من طقطق لسلام عليكم...

زكيه :اسمعيني امالا بالحرف الواحد

اني :حاضر احكي هي

زكيه :يا حنه من لاخير يا جموعه انتي مهمله بنفسك ما تحرجيش مني... ولكن الحق حق انتي مش مهتمه بروحك بكل... بالله معقوله هكي وجهك!... بري يا حنه لمحل في زنقه لي وراي تلقي فيه العطورات والحوايج فيه مش عاديه... واسمعي بنسبه لي راجلك هدا شي يرجعلك لكن كان تبي نصيحتي الحق اطلبي الطلاق منه وعيشي حياتك واخدمي وصيوره يجي نصيبك..

اني دمعت عيني :اني والله نفكر في عويلي نشبح فيه وناغي لقمر

زكيه :عارفه والله عارفه.... لكن اني صبرت عليه راجلي لين فديت... قلت اهو عشان صغيويره اهو معليشي... اهو تو يعقل لكن هو شيي عقله فوق عمود العش... ولا عقب صغيره ولا كبيره ولا والي لا تالي... حشمني مع صاحباتي ومع اقاربي ومع جيراني... ولا شعف ولا اني شعفت... لييييين فاض بيا الحيل ودرت عليه قضيه خلع وحزيت هالروينه... لانه خلاني مهزله يا جمعيه مهززله.....ولا هو مقدرني ولا محترمني ولا مفكر فيا ولا في صغيويرتي شن فيه بعد هكي!! ... وهدا هو مايه وملح وخف

اني تنهدت:باهي ان شاء الله خير

زكيه ترطب في الجو :تو اسمعي يا جموعه سلم وخيتي عدي لي المحل لي قتلك وبضعي منه... وحتى كان ما عندكش قروش قوليله اني من طرف زكيه.... تو يساعدك ماهمكش في شي ديما نتعامل معاه ماه

اني ابتسمت: ان شاء الله به تو نتكى عليه واني مروحه توا.... هي بسلامه يا زكيوه

زكيه :غر كان قعدتي باهي

اني نضت من مكاني :لالا وين هداكا هو... هي بسلامه

زكيه :بسلامه يا جموعه ربي يهدي سركم

اني تنهدت :ان شاء الله يا زكيوه ادعيلي بس

زكيه :وكلي امرك لله بس ولي فيها خير ان شاء الله تتيسر

اني فتحت الباب نلبس في كندرتي:امييين يا زكيوه اميين

زكيه:وكلميني مره مره طمنيني عليك ما تقطعينيش عاد

اني تفكرت حاجه :ان شاء الله حاضر... اييي خطرها ريتي هي عليك نسوة نسيت مره وحده

زكيه :خيرك شن في!

اني :يا حنه جيتك عشان ناخد صخاب بعتتني امي وناخد منك  كافور وزيت حنه والحنه  حتى هي مرات ما تسدناش لي عندنا..

زكيه ضحكت :معليشي معليشي حتى اني نسيت

اني :ما تواخدينيش ندهبت شيرتي سامحيني

زكيه :لالا عادي ما فيها شي... خلي نمشي نجيبلك الحاجات من المخزن ونجي

اني :به هاني نراجي فيك