مبرر الخيانة

متاهة

#مبرر_الخيانه "مبررات"
الحلقه :التانيه
بقلم :فاطمه سالم الورفلي
......................................
........
عاشور قعمز:حمدالله

فوز :عاشور نبي منك خدمه لو ما فيهاش باس

عاشور :تفضلي وخيتي

فوز :والله عندي طلبيه لكن المنطقه بعيده ...وتبي حد يوصلها واني شوفه عينك اهو ما فيش كيف

حداده :قعمزي واهفتي الراجل عنده ما ساده عنده عويله ... وشاقي بيهم

عاشور انحرج :لا عادي ما فيهاش شي الناس لي بعضها

فوز ابتسمت :بارك الله فيك خلاص مالا غدوا تو ندهم عليك

اني بحسن نيه :خلاص تو يرفعك عاشور بلمره وخلاص

فوز فرحت :صحيتو خلي مالا نوض اني نجيب العصير

اني :تو نوض معاك

.....
نضنا اني وفوز للكوجينه.... وهي وقفت في التركينه... واني قعدت نطلع في العصير تمشي هي تطلع من الكوجينه وقعدت اني نحوس وتحشمت نادي عليها.... قعدت ندور في البشكوط ونواسي... ونسمع فيها تضحك مع عاشور وتهدرز.... ما اهتميتش... مهم واسيت السفره ودرت الشنترو وصبيت العصير في الطواسي... و البشكوط في المترد وطلعت... واول ما طلعت جت عيني على فوز وعاشور محاديين بعضهم ويضحكو... ولما جت عيني في عين فوز استهزبت وبعدت عن عاشور... اضايقت اني وجيت حطيت الصفرة وقعمزت... وعيني شوي شوي تهرب لي جيهة فوز وعاشور مقعمزه وتهدرز معاه تقول راجلها.... شوي جت في ودني كلمه فوز...

فوز :خلاص مالا غدوا تو نتصل بيك بسلامه

عاشور :في امان الله... هي يا جمعيه

اني فنصت عيوني مصدومه كيف يتكلمو بكل صراحه قدامي.... لساني ارتبط معاش قدرت نحكي... قعدن ما غر العيون يشوفن بس .... طلعت اني وعاشور وفوز سقدتنا للباب...ركبنا السياره ومقداد في جرتنا... اول ما ركبت السياره التفتت لي عاشور...

اني :شن هدا!.... شن مهزله هدي تضاحك انت وياها واني كيف البرانيه وكيف تعطيها رقمك هاا!

عاشور :بلا هبال ترا يا مراه عطيتها رقمي...والناس لي بعضها خيرك شن جاك؟

اني :وتتصل بيا اني ولا اني وياك مش نفس الحوش!

عاشور :واااك وااك خلاص عاد اقصري الشر يا مراه شن هدا اللطف

اني :اي اي تضاحك معاها واني تنتور وتكشخ عليا باهي باه 

عاشور بعصبيه:الصبببر
......
ودارها رابعه ومشي بيها خط واحد لين قعد مقداد يعيط....

اني :نقص السرعه نقص رعشت العيل رعشت رعايشك وفركس عيشتك

عاشور فنص فيا وقال :انزليي

اني زفرت وفتحت الباب ونزلت من السياره وصرفقت الباب.... وفتحت باب الحوش خشيت الداخل ....