رجعت وما بتعرف كيف الوقت مشي لانو التفكير ما فارقها وصارت راسا توجعها..اخدت مسكن ووصلت اخيرا للبيت..فتحت الباب ودخلت وشافتا الست سعدية ركضت عليها وصارت تسألها بخوف ولهفة:مالك حبيبتي صار معك شي؟..ليش رجعتي بسرعة؟!
جوري وهي حابسة دموعها قالتلا كل اللي صار...ياروحي انتي خلص ما تزعلي...ما بعرف كيف واسيكي بس حتى لو كان الشي صعب ما لازم تستسلمي....وهلأ طلعي على غرفتك ارتاحي وخلي الخادمة ترجعلك تيابك عالخزانة...
طلعت جوري على غرفتا قالت للخادمة ما تيجي تناديها عالعشا لانو تعبانة وبدها تنام..اخدت جوري شاور ونامت على سريرها وضلت تفكررر لحد ما غفييت ونامت..
تاني يوم الصبح فاقت جوري بكير لانها نامت بدري..بدلت تيابا ونزلت قعدت بالصالون عبال ما تفيق الست سعدية طلبت من الخادمة تعملا فنجان قهوة وبعد شي نص ساعة...
الست سعدية بابتسامة مشرقة:صبااح الخير...شو القمر فايق بدري اليوم
جوري بنفس الابتسامة:صباح النور..اي لاني نمت بدري ما قدرت نام اكتر
الست سعدية:اي وكيفك اليوم؟
جوري:منيحة..كل ما بتذكر مستقبلي بصير اقوى بس كل ما بتذكر اهلي برجع بضعف
الست سعدية:لأ لازم ما تضعفي وان شاء الله بترجعي لاهلك وانتي رافعة راسهم
جوري:ان شاء الله
الست سعدية:وهلأ قومي خلينا نفطر
جوري كانت كل يوم شوقها لاهلها يزيد واصرارها بانو تحقق حلما بيزيد اكتر كانت تدرس وكأنو حياتها متوقفة على كل مادة وكان نفسها تروح باجازات الصيف لعند اهلها وطلبت مرة من امها انو تخبر ابوها بانها بدها تيجي تشوفهم بس كان رد ابوها:تيجي والله لادبحها بايدي هدول
زعلت كتير جوري وقررت تنسى موضوع الروحة لعند اهلها لحد قبل تخرجها بشهر طفح فيها الكيل وقررت انو تروح لعند اهلها مهما كانت العواقب تشوفهم وتطلب السماح من ابوها وتعزمهم على تخرجها
