قصيدة ( انت وحدك )
للشهيد الشاعر : #صفاء_السراي
.
من آخر القصائد الي كتبها صفاء وللأسف ما متوفرة بصوته فقط كتابة..
كلماتها :
( انت وحدك
كلشي بالدنيا يگلك انت وحدك
حتى خطواتك تگلك انت وحدك
حتى لونك
الساعة البأيدك
نعاسك
فزة گليبك يگلك انت وحدك
يا غربتك
يصرخ الحايط بوجهك
يا ضياعك
تلمض عيونك بوجهك
ينقفل شباجك وتعتگ حروفك
تسحب البردة نفسها ، وكل ظلام الغرفة يتبدة بديك
تصير احلامك ضواك
تذبل اصابيعك بديك وما تنوشك
عينك العشگت الوادم ما بجتلك
روحك النذرت ضواها الهوى الوادم ما بجتلك
انت نفسك ما بجيت
ومن صارت عيونك ما تشبهك
عفت وجهك بالمراية ومشيت
يا غربتك ، يا ضياعك
يلبيك من كل حزن بالناس شامة
من كل فرح بالناس لمضة
يلبيك
يالـ مملي ضياع
ياهو يندل شضاياك ويلمك ؟
ياهو منهم كاتب اسمك ع المخدة
وجاس روحك ؟
اصفر لوحدك حزين
ذابل ، تلملم بقاياك من الوجوه
من العيون
ومن المصاطب
تلمك وترجع لوحدك حزين
مثل الگلوب البالمحطة ، تنطفي ووحدك حزين
مثل جلمة بكاغد اصفر ، خافت ووحدك حزين
مثل گلبك
ذابل
ووحدك
حزين )
.
#ابن_ثنوة_مايموت
#كلنا_صفاء_السراي
