انشغلت جوري بجاسر و اول مرة قلبها يدق و اول مرة حد يتجاهلها ويتجاهل جمالها وميبصش عليها ، وكانت بتسأل نفسها هل هو مغرور ولا علشان انسان متدين و بيصلي وعارف ربنا ؟!
مرت الايام وجوري مش قادرة تنسى جاسر وبقت تحب تشوفه على طول،وتخترع اي حاجة علشان تكلمه وتشوفه. وابتدت تحس بالفرق بينه وبين قاسم الراجل العجوز وال افكاره بعيدة عن افكارها المتحررة والشقية
وفي يوم تعمدت تروح مكتبه بذريعة تشوف اخبار الشغل ايه ودخلت جوري فجأة، شافت جاسر بيهزر وبيضحك مع زميلته ، جوري شافت كدة والدم جري في عروقها وحست بغيرة رهيبة اول مرة تحس بيها !
جوري تبص ليهم بغيظ : لو سمحتوا دة مكان شغل مش كافية للعشاق احترموا المكان.
تسكت الموظفة وتحط رأسها بالارض ، لكن جاسر مقدرش يسكت بص ليها بقوة : حضرتك مفيش داعي للكلام دة احنا مش قاعدين قعدة مخلة او قاعدة غلط ودي زميلتي و اختي مش اكتر !!
جوري تلوي شفتها بعلامات استنكار وتكذيب: زميلتك ...... لا واضح جداً ، هنا مكان للشغل بس مفهوم ؟ وتاخد بعضها وتروح على مكتبها وتقعد تفنخ وتفش ، والنار هتاكلها ،ازاي جاسر يهزر ويضحك مع واحدة وعندها هى كلامه وافعاله كلها رسميات دة كمان بيتجاهلها،وهي قاعدة بتفكر خبط باب المكتب ودخل جاسر
جاسر بضيق : لو سمحتى اتفضلي امضي على الورقة دي .
تاخد جوري منه الورقة بعنف وتبص فيها تلاقي ورقة استقالة من الشركة تتفاجئ جوري بطلب الاستقالة وتبص ليه وهى مش مصدقة : ايه دة يا بشمهندس ؟!
جاسر : دى استقالتي اسف مش هقدر اكمل هنا بعد الاهانة ال وجهتيها ليا دي.
جوري بعصبية وحدة : انت واخد مقلب في نفسك كدة ليه، انت شخص عادي جدا ،مش مميز يعني وحلو ، دة انت كمان اقل من العادي ،في ايه ؟! فاكرني هتحايل عليك علشان تشتغل ؟!
جاسر يبص ليها بصة استحقار من فوق لتحت ويقول ليها : شكراً على ذوقك . وياخد بعضه ويخرج من مكتبها ، جوري تمسك علبه على مكتبها و ترميها على الباب وراه .
تدخل بسرعة السكرتيرة على الصوت : اية دة يا فندم حصل ايه ؟!
جوري بعصبية شديدة وقهر : انتي مالك اتفضلي على مكتبك.
تقعد جوري على المكتب وتحط رأسها بين ايديها وتحس جسمها نار مشتعلة. وتسأل نفسها ايه الانسان دة دة غبي اوي وغرور اوي معرفش على ايه ، انا غلطانة اني اديته حجم اكبر من حجمه ، انا بكرهه..... بكرهه.
و تسكت شوية بعدها تقول : لا انا ......انا انا بحبه ....ايوة بحبه و عنيها تدمع و تبكي انا بعشقه فعلاً ، انا ايه ال عملته دة انا غبية اوي.
انا مقدرش ادخل الشركة من غير ما اشوفه .انا لازم ارجعه الشركة تاني مهما حصل. تقول للسكرتيرة : هاتي ملف مهندس جاسر بسرعة.
تفتح الملف وتعرف عنوانه ورقم تلفونه . ولسه هتتصل بيه يدخل قاسم يبوسها في رأسها ويقول : ايه يا حببتي اتغديتي ؟
جوري بزعل : مليش نفس .
قاسم : ليه كدة حصل ايه ؟
جوري بعصبية : محصلش حاجة بقولك مليش نفس عادي يعني اوف.
قاسم يستغرب من عصبيتها ورد فعلها دة : اطيب اهدي مالك عصبية كدة ليه .
تمسك جورها راسها وتنفخ : انا اسفة انا فعلاً عصبية معرفش ليه.
قاسم: طيب خلصتي الاوراق بتاعت المشروع الجديد؟
جوري: لا لسة ممكن بكرة؟
قاسم : لا مش هينفع علشان يدوب امضي عليهم النهاردة قبل ما نسافر بكرة شرم علشان المؤتمر .
جوري تفتكر السفر والمؤتمر دة : اه نسيته فعلاً بس انا مش هسافر معاك.
قاسم مستغرب عدم موافقتها على السفر : غريبة دا انتي كنتي متحمسة اوي للسفر وكل شوية بتاكدي عليا علشان نرجع ذكرياتنا هناك.
جوري : لا روح انت انا ......احتمال اروح اشوف ماما وبابا واختى وحشوني اوي .
عاوزة اقعد معاهم يومين لحد ما ترجع .
قاسم : براحتك يا قلبي بس انتي مش مريحاني حاسس انك زعلانة من حاجة !!
تسكت جوري ومتردش عليه وتمسك الاوراق بتاعت الشغل تخلصها وبعد كدة بسرعة تمسك شنتطتها ومفاتيح عربيتها وتقول لقاسم: انا رايحة مشوار وبعد كدة هرجع على البيت باي .
وتنزل وهي فى دماغها تصالح جاسر وترجعه الشركة تاني. تمسك فونها وتتصل على جاسر.
جاسر : السلام عليكم.
جوري : وعليكم السلام يا بشمهندس.
جاسر: مين معايا يا فندم؟
جوري : انا جوري اخبارك ايه ؟
يستغرب جاسر على اتصالها : اهلا بحضرتك يا استاذة .
جوري : ميرسي بس انت فين دلوقت ؟
جاسر : انا في البيت.
طيب ممكن تنزل عاوزاك ضروري لو سمحت هستناك بالعربية تحت البيت .
جاسر يستغرب اكتر الجراءة دي وانها تيجي لحد البيت وتنتظره تحت .
بعد ربع ساعة تتصل تاني وتقوله انا تحت البيت انزل. بنزل جاسر ويسلم عليها من بره العربية ويقولها : اهلا بحضرتك، انا اسف مش قادر اقولك اتفضلي اشربي حاجة لاني قاعد لوحدي .
جوري تبص ليه كدة وتفرح انه قاعد لوحده وتقول : وايه المشكلة قاعد لوحدك دة كويس علشان اعرف اكلمك كويس، ولا معندكش شاي ؟! وتنزل جوري من العربية وتطلع على السلم. وجاسر واقف مذهول من فعلها دة والجرأة دي .
يدخل جاسر الاسانسير وتدخل جوري معاه و عنيها الجريئة بتبص في عنيه وطبعا هو مش عاوز يبص ليها وباصص في الارض وبيهرب منها. يدخلوا الشقة وتقعد جوري تبص للشقة وتتفرج عليها وتقول لجاسر ال دخل المطبخ يجيب حاجة تشربها : شقتك جميلة اوي يا بشمهندس .
جاسر من المطبخ : شكراً يا استاذة على ذوقك.
تدخل جوري المطبخ وتقول : انا جاية اعتذر ليك على ال حصل سوري بجد كنت عصبية النهاردة .
جاسر : حصل خير مفيش حاجة حصلت وكفاية ان حضرتك جاية لحد هنا ، دى كبيرة عندي .
جوري : يعني خلاص سماح وهتنزل من بكرة الشغل معايا عوزاك في شغل كتير .
جاسر : لا انا مش هقدر انزل الشغل تاني سوري ، مش معنى اني قلت خلاص و قبلت اعتذارك يبقى انزل الشغل .
جوري بعصبية : نعم بعد كل دة و مش عاوز تنزل الشغل !! لا انت بقى كدة فعلا مغرور اوي وانسان مستفز .
جاسر بحدة: إلزمي حدودك لو سمحتي انا حر.
جوري : لا مش حر.
جاسر : لا حر اعمل ال انا عاوزه حضرتك ماسكة عليا ذلة؟!
جوري : تبص ليه وتتحمق وعنيها تدمع وتنفعل بصرخة : لا مش حر يا غبي لاني بحبك اوي....... يبص ليها جاسر وهو مش مصدق ال بيسمعه.
جوري : ايوة بحبك اوي فوق ما تتخيل وانت مش حاسس بيا. انت اول واحد يذلني كدة واحس اني ضعيفه قدامه.
جاسر يسكت شوية ويسيبها تتكلم وبعدين يبص ليها و يقول : حضرتك ناسية انك ست متجوزة ؟!
جوري تفوق على الصدمة دي، وكانها مكنتش حاسة انها متجوزة : لا مش متجوزة !!
جاسر يبص ليها بتعجب : امال قاسم بيه دة يطلع ايه ؟!
جوري بحزن : قاسم دة غلطة غلطتها او تقدر تقول وسيلة من وسائل الراحة في الحياة ،لكن مش حب مش جواز زي اي اتنين بيحبوا بعض واتجوزوا ، فرق بيني وبينه32 سنة، فرق كبير بينا اوي في الفكر والحياة.
جاسر : بس هو كان اختيارك من الاول ومش ذنبه كل دة، مقدرش اقبل حبك علشانه.
جوري : تمسك في ايده وتتوسل وتقول: مش عاوزة منك حاجة غير تحبني بس مش عاوزة غير قلبك. ولسه بتتكلم لكن حصلت حاجة غريبة !!
يا ترى هيحصل ايه.
تابع
أنت تقرأ
ابنة للأيجار
Lãng mạnفتاة جميلةجدا. ومغرورة بجمالها يحاول والدها استغلال جمال ابنته في ابتزاز الناس
