ابنة للأيجار

الجزء الخامس

بعد ما رجع هاني من شغله وعرف ان هناء سابت البيت ومشيت ،وقعد يشتم عليها ويقول انها مقطوعة ملهاش حد وهترجع زي الكلبة تاني،  وبكاء نورهان و جوري،في نفس اللحظة رن موبايل هاني  كانت اخته .
هاني : ايوة يا سارة..... عاملة ايه ؟
سارة : الحمد الله ...... انت عانل ايه يا حبيبي والبنات عاملين ايه؟
هاني جوزك عامل ايه و رودي و محمد  اخبارهم ايه ؟
سارة : الحمد الله رودي كويسة ومحمد كويس. وقاسم بيسلم عليك. بس ايه ال حصل بينك وبين هناء هي عندي هنا. وبتقول كلام مش مصدقة نفسي وانا بسمعه؟!
هاني بعصبية : هي غارت عندك تعمل ايه ؟ ما تروح في اي مصيبة  بعيد عننا ،دي ولية فقرية  تموت في الفقر .
سارة ترد بحِدة : هاني لو سمحت دي اختي الكبيرة وهى مش وش فقر بس كل حاجة بالاصول مش زي ما انت بتعمل مع بنتك كدة
هاني: اصلك انتي عايشة مرتاحة يا ستي متجوزة واحد غني اوي بيربي عيالك بعد موت جوزك  وعايشة في فيلا كبيرة طول بعرض وشركات وعقارات . طبعا مش  هتحسي بينا  ،سبينا في حالنا يا ست سارة وخليكي في النعيم دة .
سارة : وانت مش فقير يا هاني بية انت ربنا ساترك  إحمد ربنا بقا ، وجوازي دة نصيب وجوزي اتجوزني علشان يربي عيالي الايتام .
وبعدين لو سمحت وهات البنات وتعالى نتكلم .
هاني : لا مش فاضي ومش جاي وهى لو عاوزة ترجع،  ترجع لوحدها  انا مش هجيبها.
سارة تحس بتأزم الموقف وعناد هاني تقوله : طيب خد قاسم عاوز يكلمك.
قاسم : ايه يا هاني  عامل ايه ؟  ممكن تيجي بكرة انا عازمك انت والبنات على الغدا. ومتكسفنيش بقا  هستناك ماشي .
هاني ميقدرش يكسف قاسم ويوافق على العزومة.
هاني  يبص لجوري : عمتك عايشة في العز ومستكترة. علينا  ال بنعمله ، دة مفيش مرة قالت خد يا اخويا مبلغ كدة اعملك مشروع او غير عربيتك ، ايه الناس دي محدش بيحب الخير لينا مش عارف ليه ،وانا والله لولا. قاسم بيه ما كنت رحت عندها. بس بصراحة الراجل مش بيتاخر عليا في  حاجة .
جوري : على فكرة انكل قاسم اتجوز عمتو علشان بيحبها مش علشان يصرف على رودي ومحمد  انا متاكدة من كدة.
بس يا بابا علشان خاطري صالح ماما بقا .هاني يبص لنورهان ودموعها. ويسكت .
تاني يوم يخلص شغل ويروح البيت ياخد جوري ونورهان. ويروح على الفيلا بتاعت اخته .
تفتح الباب سارة. وترحب بيهم جداً وبسرعة تجري نورهان  على مامتها وتحضنها وتقول ارجعي معايا يا ماما علشان خاطري بقا.
تحضنها  امها اوي. وتحضن جوري ويقعد هاني هو وسارة اخته لوحدهم  تحاول سارة في القعدة تصلح بين هاني و هناء  و تغير من فكر اخوها دة.
وتطلب من هاني انه يسيب جوري تقعد عندها كام يوم .
طبعا يرفض هاني يسيب جوري دى الفرخة ال بتبيض ليه دهب ، وكدة هيبعدها عن خالد  ودي مشكلة اكبر .
وبعد جدال ونقاش كبير وافق انه يصالح هناء و يرجعها  لكن ميسبش جوري ابداً.
سارة كانت عارفة مفتاح اخوها علشان كدة سكتت لحد ما يرجع قاسم من الشغل .
قعدوا اتغدوا  مع بعض.  وقعدت رودي  تحكي هي و جوري. و نورهان  ، رودي كانت في ثانوية عامة واصغر من جوري ب4سنين
وجوري الانتيم بتاعها وكاتم اسرارها .
مر الوقت ورجع قاسم من الشغل ومحمل بالهدايا لرودي ومحمد  وجوري ونورهان .
سلم على الجميع وقعد.
قاسم : اخباركم ايه يا جماعة ، عامل ايه في الشغل  يا هاني ؟
هاني : الحمد الله بخير والله وانت اخبارك ايه وشغلك عامل ايه ؟
قاسم:  والله  تمام الحمد الله بس الشغل مش بيخلص. والواحد تعب بجد مفيش يوم راحة اوووووف .
هاني يبص لجوري ويرجع. يبص لقاسم : الله يعينك ما فلوسك لازم تراعيها . مين هياخد باله من شغلك غيرك يا قاسم بيه .
تحط سارة العشا لقاسم ويطلب منهم ياكلوا معاه لكن يرفضوا. وقولوا احنا سبقناك من بدري.
بعد ما يخلص قاسم الاكل يدخل يغسل ايده.
وتدخل سارة وراه علشان تكلمه على جوري.
سارة : قاسم حبيبي انا عاوزة جوري تقعد معايا شويه يعني شهر كدة او اتنين ممكن ؟
قاسم : وماله يا حببتي  حتى لو تقعد  هنا على طول براحتك  تشرف في اي وقت.
سارة تفرح اوي بكلامه لكن تقول ليه : انا عارفة انك مش هتقول حاجة بس...... عاوزاك تقنع هاني علشان مش موافق على الموضوع ده وانا بصراحة عاوزاها تبعد شوية عن المنطقة عندهم وعن ابوها دة وتركز في جامعتها دي خلاص اخر سنة  وتخلص .
قاسم يبص لسارة ومحتار : طيب افرضي ابوها رفض هعمل ايه هقنعه ازاي بقا؟!
سارة : معلش. حاول معاه وفهمه انك عاوز تدرب جوري على الشغل  في الشركة. لانها هتطلع محاسبة زي ما انت عارف . وقوله هى هتقعد مع رودي في اوضتها يذاكروا مع بعض. ويسلوا بعض ،وتستفيد من الشركة عندك بليز بليييببز ......
قاسم : خلاص.......خلاص  هقوله والله واحاول اقنعه والله يا حببتي .
يخرج قاسم و يقعد معاهم يشرب الشاي .
قاسم يتكلم مع هاني في السياسة والكورة  وبعدين يبص لجوري ويقول : انتي قربت تخلصي  ولا لسه يا جوري ؟
جوري : لسه والله يا عمو اخر سنة السنة دي ادعيلي انجح واجيب تقدير كويس .
قاسم : ان شاء الله هتنجحي وتجيبي تقدير كويس جداً. وشغلك بعد التخرج محجوز معايا في الشركة يا ستي اتفقنا ؟
تفرح اوي جوري :بتتكلم جد يا عمو قاسم ؟!
قاسم : اه طبعا يا حبيبتي بتكلم جد،دا انا عاوزك كمان  تقعدي معانا  هنا كام يوم علشان تتدربي على الشغل  بعد الجامعة اخدك معايا كل يوم وترجعي معايا منها تتعرفي على طبيعة الشغل  وتفهمي الدنيا هناك ماشية ازاي  ،ومنعا تسلي رودي شوية لانها زهقانة لوحدها وتشجعيها على المذاكرة. لان دي ثانوية عامة.
جوري تفرح جداً وتقول : الله ..... موافقة طبعا يا عمو متشكرة اوي .
لكن يبص ليها هاني ويقول : هو ايه ال موافقة !! مش هينفع يا بنتي علشان دراستك والحاجة ال ورانا !!
تفهم جوري قصد ابوها وانه يقصد خالد  وفلوس خالد علشان كدة تقوله : ممكن يا بابا اقولك كلمة جوه الاوضة لو سمحت .
يا ترى هيحصل ايه و ابوها هيوافق ؟!
تابع