ابنة للأيجار

الجزء التاسع

خرجت جوري من الجامعة بدري وراحت على شركة قاسم بالرغم انها ادت معاد لخالد انه يستناها بره الجامعة علشان هتشتري حاجات ، لكن تجاهلته لاول مرة وراحت الشركة لكن المفاجأة ان قاسم مكنش موجود في الشركة في الوقت دة .
جوري تسأل السكرتيرة ريم : مساء الخير يا ريم عمو قاسم هنا ؟!
ريم: مساء النور انسة جوري نورتي الشركة ،لا والله قاسم بيه في مشوار و لسه مجاش.
جوري : ماشي هدخل استناه جو في المكتب .
وحاولت تفتح الباب .
ريم بسرعة تقوم من على مكتبها وتحاول تمنع جوري : اسفة والله بجد بس قاسم بيه بيقفله ومانع اي حد يدخله وهو مش هنا ؟
جوري تبص ليها من فوق لتحت : هو انا حد !! الكلام دة مش ليا انا ماشي.؟
ريم : دي تعليمات يا انسة وانا مقدرش اخالفها ابدا.
جوري تتغاظ اوي و تبص ليها بغيظ وتاخد بعضها وتخرج من الشركة وهى خارجة تتصل على خالد: ايوة انت فين ؟
خالد: انا قدامي نص ساعة واتحرك على الجامعة انتي فين ؟
جوري : انا خلصت المحاضرة وخارجة من الجامعة اصل تعبانة اوي ، تعالى خدني يلا .
خالد : حاضر اديني ربع ساعة واكون عندك.
تروح جوري على المكان ال كل مرة بتركب منه مع خالد و تنستنى خالد، بعد خمس دقايق يجي خالد تركب معاه وتقوله عاوزة اسحب فلوس من اقرب مكنة Atm هنا تعرف واحدة؟!
خالد يحس انها زعلانه من حاجة يسألها : جوري انتي كويس ! في حاجة زعلتك؟
جوري بعصبية : ليه شايفني بشد في شعري ؟!
خالد: انا اسف مقصدش دة مجرد سؤال بطمن عليكي بس .
جوري تحس انها اتسرعت في رد فعلها تبص ليه وتقول ممكن نقعد في مكان هادي شوية اصل مخنوقة اوي .
خالد ياخدها ويقعد في كافي على الكورنيش ،
جوري: سوري يا بيبي اصل ....اصل.... وتسكت.
خالد: اصل ايه! في ايه يا حببتي اتكلمي؟!
جوري : اصل تيتة تعبانة. و بابا رافض يخلى ماما تصرف عليها الايام الجاية دي خالص . وانا الفلوس ال معايا مش هتتحمل كل مصاريف العلاج وتبكي 😭😭.
خالد يتأثر اوي : هى تيتة ام والدتك يا حرام،طيب متشليش هم حاجة انا هديكي الفلوس ال تحتاجي ليها ، ولا تزعلي نفسك.
جوري بحمقة مصطنعة : لا يا بيبي انت ذنبك ايه !! هو انت كل شوية هتصرف عليا !
خالد بحماس : انا احط فلوسي كلها وما املك
تحت رجليكي بس انتى ترضي عني .
انتى متتصوريش بحبك قد ايه، انتي بقيتي كل حاجة في حياتي . انتي جعلتي لحياتي طعم ، حياتي مكنش ليها طعم مع مراتي ، كنت بشتغل وعايش علشان الاولاد بس، وبحمد ربنا بوجودك بحياتي .
جوري : ميرسي يا بيبي. بس انا حاسة اني باخد حق ولادك. وحاسة بالذنب .
خالد: لا دي فلوسي انا من حقي اتمتع بيها و اولادي عندهم ال يكفيهم وذيادة ،مراتي وارثة من ابوها ملايين ،يعنى مش محتاجة لفلوسي . علشان خاطري متقوليش لا .
جوري تمسح بايدها على خده وتقول بثقة: اوكي ماشي.
خالد: عاوزة كام دلوقت ؟
جوري : محتاجة 10000جنية لان علاجها غالي وانا محتاجة مصاريف يا بيبي.
خالد : اوك يا قلبي واحنا ماشيين هسحبهم ليكي.
يتغدوا وبعد كدة تطلب من خالد توصيلها. يوصلها خالد لاقرب مكان يوصل للڤيلا ويمشي و هى تكمل.
تعرض عليها عمتها الغدا ترفض وكان باين عليها الزعل .
سارة : مالك يا حببتي حد زعلك ؟!
جوري : لا يا عمتو مفيش سلامتك .
سارة : لا باين عليكي الزعل ، وبعدين مش قلنا انك هتروحي الشركة بعد الجامعة لية مروحتيش ؟!
جوري بزعل : روحت وملقتش عمو قاسم والزفت السكرتيرة رفضت اني استناه .
سارة تبحلق في جوري : معقولة السكرتيرة تعمل كدة ،ازاي تدي نفسها الحق تعمل كدة ،هى متعرفش انتى مين ؟!
جوري : كانت هتغلط وتقول انها تعرفها، بس افتكرت انها مخبية عليها انها راحت قبل كدة. فقالت : لا ما .....انا قلت ليها ان انكل قاسم جوز عمتو،لكن برضو مرديتش تدخلني.
سارة : متزعليش يا قلبي. لما يرجع قاسم انا هكلمه يعرفها انتى مين. واي وقت تروحي الشركة.مر الوقت ورجع قاسم من الشغل على العشا وطبعا كانت عينه بتدور على جوري، خرجت جوري ال تجاهلت قاسم ومرديتش تبص ليا خالص،وكان قاسم مستغرب اوي هى ليه بتعمل كدة !!
سارة تبص لقاسم وهى بتاكل: حبيبي البنت السكرتيرة ال عندك دي قليلة الذوق اوى ، تصدق جوري راحت الشركة النهاردة والبنت رفضت تخليها تستناك؟!
قاسم استغرب الكلام دة : ايه دة معقولة ،امته روحتي يا جوري ؟! اكيد لما كنت برة النهاردة .
سارة : المفروض يا قاسم تعرف البنت دي. ان جوري تدخل الشركة في اي وقت؟
جوري كانت ساكتة مش بتتكلم ومش عاوزة تبص لقاسم.
قاسم : انا بكرة هعرف شغلى معاها حاضر .
في اليوم التاني تركب جوري العربية مع قاسم علشان تروح الجامعة و بعد ما يوصل رودي. ومحمد المدرسة تقعد جوري في مكانها ورا قاسم ومتنزلش تركب جنبه.
قاسم يبص ليها في المراية: ممكن اعرف زعلانة ليه دلوقت ، انا مكنتش هناك ومعرفش ال حصل .
جوري : انت قلت ليها اني مدخلش مكتبك وانت مش موجود ؟!
قاسم : لا والله انا منبه عليها اي حد غريب من الشركة ، وبعدين متصلتيش بيا ليه ؟!
جوري : تؤ تؤ انا زعلانة ، البنت دي لازم تتأدب كويس ،علشان تقولي انا ...انا مينفعش تدخلي المكتب !!
قاسم : معلش انا هعرفها ان وقت ما تيجي الشركة تدخلي اي مكان تحبيه.
تعالى بقا اقعدي جنبي .
جوري : تؤ تؤ لما اشوف هتعمل ايه مع البنت.
وتصر جوري على موقفها وتنزل وتدخل الجامعة وبعدين تخرج بدري وتروح الشركة علشان تشوف قاسم هيعمل ايه مع ريم السكرتيرة. يا ترى هيعمل ايه ؟
تابع