رواية #هعتبرك_مت 🖤
( 1 ) الجزء الاول 🥀
ضمن مسابقة 👑 #ملكة_الاحساس 👑
للكاتبة #منار_السليني
.
#قراءة_ممتعة 🔥
.
.
.
دنيا تحرك في الطنجرة: عليك معيشة سودة هما يعدو ويخلولي في الفروخ مافهمتش انا شن يحسابوني.
تسنيم خشت للمطبخ وحاطة السماعات في وذانها وتصب في اميه.
دنيا تعيط: تسنيم يا تنسييم عطك طرش حولي السماعات نحكي معاك.
تسنيم بحتت فيها ببرود وحولت سماعة وحدة: ها شن تبي.
دنيا تنهدت: تسنيم ساعديني الله يربحك شوفي العيال برا قالبين الدنيا وولد اختك يبكي وانا نطيب ديري حاجة كويسة على عمرك.
تسنيم عقدت حواجبها وحطت السماعة: مادخلنش بيك "ومشت".
دنيا برمت للطنجرة وتقلب فيها ب غل: ان شاء الله تموتي الناس يقولو يعوينك عندك أخت تي عندي قهرتي وعازتي اخت يهودية وحقيرة ان شاء الله تلقيها قدامك "ادور في تلفونها" وين يريح مش عارفة.
لقاته اتصلت بي امها: ها يا امي الله يربحك روحو.
ريما: كنك تصرخي وطي صوتك.
دنيا تنهدت: قصدي العيال ماداروش خير وبنتك اليهودية مابتش تساعدني كلمي بنتك النسرافة تروح تاخذ عيالها مانش امهم انا.
ريما هزت رأسها: باهي باهي سكري قريب نروحو.
دنيا عقدت حواجبها: مش قلتيلي ماشية العزاء؟ كيف صار معاك هيا؟
ريما: نروحو نتفاهمو سكري توا.
سكرت عليها ولقت منير متصل بيها عاودت اتصلت بيه: خير.
منير: انتِ ماتقولي خير الا وجوك مش تمام كنك شن في!
دنيا تنهدت: واللهِ أختي حطتلي عيالها كلهم ومعاها نطيب في الغداء وحايسة عندي.
منير: اهدي كنت بنقولك حاجة بس خلاص كملي شغلك ونهدرزو.
دنيا: لا قوول عارفني فضولية.
منير: لا واللهِ خليها بعدين هي سلام توا.
دنيا هزت رأسها وجت بتكمل كلامها لقاته مسكر حطت التلفون وفتحت على الطنجرة وحطت حبوب الفاصولياء.
______________________
عمر خش وسكر الباب بصوت عالي: جدتي.
الجده شافتله ودموعها نزلو: جاء وجه الخير❤.
عمر ابتسم وقرب باس يدها ورأسها وحضنها وهوا يطبطب على ظهرها واختفت ابتسامته لما شاف شهد مقعمزة وراها.
شهد ناضت وهيا مبتسمة: حمد لله على سلامتك.
الجده شافتلها بحقد وناضت: نخليك انتَ وخطيبتك تهدرزو على راحتكم.
أنت تقرأ
هعتبرك مت ( روايات ليبية )
Romanceللكاتبة #منار_سليني .تدور أحدات الرواية علي علاقة حب تنتهي و لكن الحب يبقي ، فهل الحبيب سيتخطى مرحلة الفراق ، او سيظل متأتر بها ، قصة حب درامية رومانسية بين طرفين تتحول الي رماد 💔 غيّرهُ الكّونُ والفّسـاد.. ولاح في وجهه السّواد..كأنـه دمنـة امّحت...
