....
حباب بابا الله يخليك . خل نصير حالنه حال الناس الي دتشوف مسلسلات .
عافني وراح .
واني ركضت ورا . بابا الله يخليك اكو مسلسل اسمها * تحت موسى الحلاق * ديعيدون بيها الله يخليك خل نلحك عليها ...
الله كريم . الله كريم بويه .
ادري بكلمه الله كريم يعني لا . سكتت واني ضاله انتظر يوميه يسولفلي عن * تحيه كاريوكا * وكامت وحده من البنات تقلد ركصتها وحيل تهز بجسمها واني متهستره اريد اشوووفه للفلم مال الفتوه .
وحاولت اطلعلي جذبه وما لكيت غير هاي
بابا سمعت يكولون الي يحط تلفزيون ينطو جائزه ويروح للحج .
طبت امي شكو شعندج انتي يوميه جايبه فلم ...
.
حست بيه اجذب بس رادت تسايرني
بابا انتي مودينج ادىسين لو تجيبين كالات شلج شغل بهلحجي .
ضلت امي تباوع لابويه وكالتله : قحط جيبه راح تموت هاي . ....
وابويه بين مصدك بين ممصدك الحجي وكال الله كريم .
واني كاعده واكول يا ربي مروتك يصدكون ويجيبونه خل اشوف فلم السهره وبلفعل نفس اليوم ابويه اشتره تلفزيون .
بس منظر حاطينه واني كلبي لايب نار شوكت يعدلون الاريل ونشوف يا الهي .
بلليل يكعد ابويه يسولف لامي عن الاخبار المتناقله بين الناس : نسمع اخبار انو احمد حسن البكر مجرد كركتير كدام الناس والحل والربط كله بأيد صدام حسين .
واوحد ع اساس كايل للبكر شلونه الكرسي . كايله البكر اني لو اكدر ابول على هذا الكرسي لان كلشي ما اكدر اسوي كله بيد صدام حسين .
وضل ابويه ينقل لامي حجي الناس بلكهاوي وهو يكول الها . اكو اخبار انو صدام حسين هو يكون حاكم العراق القادم .
وهلاشعاعات سرعان ما تحققت بسنه ١٩٧٩ تولى الحكم صدام حسين المجيد .
بعد ما تنازل عن منصبه احمد حسن البكر . وبدت الاشعات والكلام يكثر حول سياسه صدام بقمع المنخرطين بلدين ولا سيما المعممين .
.
الشارع العراقي امتاز بتقبله للاشعاعات بذاك الوقت وهذا الي خله اي اشعاعه تأثر عليه .
وبده يداول كلمه اعدام قتل تشريد تهريب . بدت المدرسه تخلي صور صدام حسين بكل مكان حته فوك الصبوره كانما اجتاح العراق بهيمنته وسلطانه .
واني راجعه من المدرسه صادفت هلوجهه النحس هذا . ضحك .
واني دايره وجههي عنه .
وهو يكلي .
دسلمي عاد عابت لهل حمررررره
خلاني اشتاط غضب ودموعي وكعن وسبقني . ولمن شافني سكت بدون حته بدون ميكمل .
تلكتني امي ها علويه شبيج تبجين ...
يمه مجاي افهم الرياضيات ...
والله يا ربي انتي شعندج للثالث وابطل شتردين تصيرين قابل ؟؟؟
لا بله ابطل والله يا ربي لو اموووت !!! فدوه يوم خل اروح لبيت صديقتي اقره وارجع .
باوعتلي صفح . بيت صديقتج علوووويه ....
اي بيت صديقتي . يوم انتي شبيج معندج ثقه بيه ...
ومنين اجنج هلصديقات ...
يمه المدرسه كالت اقرن سويه بلرياضيات مدام بيوتكم قريبه ...
اييي خوش عود اكل لابوج والله كريم . هاي اذا ما بطلتي هلسنه ...
شنووووو والله يا ربي عفتها ورحت ودخلت بنار جديده اسمها : التبطبل واحتمال يصير مصيري مثل ميصير خواتي يخلصن الثالث متوسط ويعرسن !!!! وهاي وحده فكره شلت حالي وما فكرت غير اكل لابويه احلفه بلامام الكاظم ميبطلني ولا يزوجني .
وبلفعل انتظرت السيده الوالد شوكت يجي ولمن كمل غده رحت ركضت لكيته جاي يصلي وانتظرته لمن خلص صلا .
بابا اريد احجي وياك شي ...
تفضلي علويتي ...
بابا صدوك تبطلني نفس خواتي وتزوجني ؟؟؟ ....
منيلج هلحجي هذا ومنو كلج ....
بابا اريد اعرف جاوبني على اسألتي حباب ....
هو الزواج ستر للمرأه بس مو هسه غير لمن يجيج واحد من ولد عمج ....
باااااباااا شنو ولد عمي الله يخليك ....
ليش انتي خاله واحد ابالج ...
لا بابا انت شتكول ليش هيج اخذت حجايتي بغير قصد . بس كل ما بلموضوع اني انسانه طموحه واتمنى اكمل دراستي وادخل جامعه واشوف مستقبلي اصير دكتوره او محاميه او مهندسه هذا حلمي وبس . وضميت الحلم البكلبي وهو اكون ممثله مثل هند رستم الي الكل جاي يتباها بجمالها وانوثتها الطاغيه واو فاتن حمامه الي خلت عمر الشريف يعشقها ااااخ يا نار كلبي ....
نزل راسه ابويه : بابا اني ما اريد منج تفكيرين هسه بأي شي وحته زواج ماكو . وركز بعيوني حته يقراهن ويفتهم بنته بشنو تخطط وكال : الرجال الي تردين تزوجي اذا اني مموافق عليه مستحيل تزوجي ...
ولاني اعرف تفكير اهلي ولشنو قصد وفهمت من خلال حجيه انو احتمال حابتلي واحد وجاوبته بدهاء : بابا راح اوعدك وعد اذا خليتني اكمل دراسه مراح اتزوج اله لمن انت تكولي شفتلج الانسان الي اريده واني راح اقبل بي لان اني مقتنعه برأيك ...
اطمأن وضحك : عفيه بنيتي الدكتوره . يلا شدي حيلج حته نعلكلج لافته
ونكتب بيها اسم الدكتوره العلويه ليله عبد الغني الياسري ....
طفرت عليه كانو حققلي وشبكته شكرا بابا حبيبي يا احلى سيد .
اكول بابا ...
هااا ...
شنو اطورت اشو راحت ايام الدختوره .....
هههههه والقرعان والقراعه .كلهم يروحن يبويه ....
طبت امي : هاااا خير اشو بيها يا احلى سيد .
