#1
الحُب ...
هسه مادامنه كلنا بنوتات وكاعدين هالكعدة الحلوة ف خلي نحجي بلسان الشباب مراح اكلك اي حب الله واهل البيت شكو بيها ومن هالكلام خو صحيح ذني بس لا ... خلي ندك عالوتر الحساس ونحجي عن الحب اللي محتلنه حاليا ...اللي بين الشباب والبنات
سؤال .. الحب حلال لوحرام؟
الجواب : طبعا طبعا حلال
بس شوكت يصير حلال؟ بعد العقدالشرعي بين الولد والبنية ..
اما كلام الحب اللي بينهم قبل العقد ميجووووووووووووووووووز ...
#2
وحدة مثلا تكول اني احبه ويحبني والله يشهد حبنا صادق ومابيناتنه حرام !!
زين شلون بله مابيناتكم حرام؟ من تحجون يعلمج احكام التلاوة؟
لو يتلو ع مسامعج القران!!!
اكيد سالفة وضحكة وصورة وحبيبي وحياتي وهاي سوالف الحب !
يعني عبالج من متدزيله صورتج هايهيه انت صح؟
لو من ميحجي وياج كلام موحلو معناتها انتو صح؟
لاياحبيبتي❤️ كل هذا وهم ...وكل هذا ميجوز .. لتصدكين باليكلج احبج حتلو هو صدك يحبج ... تحبني؟
تعال دك باب بيت اهلي واخطب وبعدين حبني ع راحتك ..خلي ببالج سمعة اهلج وثقتهم بيج وخلي الله بين عيونج قبل كلشي .. كل الاخذت ع علاقة محرمة ماتوفقت ...دتشوفين شكد ناس تزوجت ع حب ومن اول اسبوع تصير مشاكل؟؟
برايكم ليش؟
اني اكلكم ليش .. لان البداية الماترضي الله نهايتها ماراح ترضيك .. بفترة الحب مثل متسموها كل شخص يبدي يظهر صفاته الملائكية ويسوي نفسه هو ولاغيره بس حتى يلفت نظر الطرف الثاني والولد مصدك والبنية مصدكة وبس يتزوجون وباول مشكلة راح تبدي المشاكل لان واحد ينصدم بالثاني !
ومو بس هيج .. لان من البداية صار بيناتهم كلشي بعد ماكو شي يكتشفوه بعد الزواج لان كل واحد مفصل الثاني تفصيل لذلك نشوف باول منعطف البنية تشكي من اهمال زوجها والولد يشكي من زوجته !
وهم متزوجييييين عن ححححححححب !تخيلو! وغير انو اول مشكلة حيواجهوها بنسبة ٩٠%انو يتأخرون يلا يصير عدهم اطفال !
#3
دائما اكولها وهالمرة هم اكولها .. مو عيب الواحد يغلط العيب يعرف الغلط وميصححه!
حبيبة قلبي ❤️ وعيونج الحلوة لو يحبج جان خاف عليج من النار .. جان ماخلص شهوته براسج .. جان اجه خطبج وسكّت الحجي ... جان كلج مادامج تحبيني روحي كعدي ببيت اهلج واني اجيج متعني وادك بابج.. جان ماكلج دزيلي صورتج ...جان مادزلج اغنية حتى يثبتلج حبه ويترجم مشاعره براسج ....جان ماواعدج وطلعتوا سوه ...جان خاف عليج من الحجاية الموزينة ...لويحبج ماعافج يومية تحلمين احلام وردية قبل متنامين ..جان حققها الج قبل متحلمين بيها...لويحبج جان ماعاف مشاعرج تخلص بالبجي وكلما تشوفين عروس تموتين الف موته وتتمنين روحج بمكانها وتدورين ختم ودعاء يسهل الزواج.... لويحبج جان ماخله دمعتج تنزل ...كعدي من نومج يحلوة الوكت مو حلو ..والدنيا غبرة تودينه بداهية وتجيبنه بداهية .. داري روحج وديري بالج ع شيبات ابوج ... لاتضيعين تربات امج لاجل شخص مافكر لحظة بعرضه قبل ميحجي وياج .. حبي نفسج ودلليها واهتمي بيها وباوعي لليعرف قيمتج ويجيج متعني ...لاتصدكين من يكلج اهلي ميرضون .. اذا يدري باهله ميرضون ليش يورطج وياه من البداية؟ لايكلج ماعندي امكانية لان ربج يكول ( ان يكونوا فقراء يغنهم الله من فضله ) ..لايكلج موبيدي ...كلشي بيده .. ديري بالج ..
أنت تقرأ
ريحانات🌱
General Fictionلطفاً للنساء فقط "الدين لا يعني الابتعاد عن الحياة❤" __نصائح ،نقاشات،تطوير ،عناية،مهام .. كل ما يخصكِ.. تنويه:مايذكر منقول 🌱 تجدونها ايضا في تليجرام 👇 @halabnatt @rasel313
